دارىگەرلەر جۇرەگى توقتاپ قالعان 12 جاسار قىزدىڭ ءومىرىن ساقتاپ قالدى

اتىراۋ. KAZINFORM - اتىراۋدا 12 جاسار قىزدىڭ جۇرەگى توقتاپ قالعان. جەرگىلىكتى دارىگەرلەر ناۋقاستىڭ ءومىرىن ساقتاپ قالدى.

اتىراۋ وبلىستىق بالالار اۋرۋحاناسىنىڭ باسپا ءسوز قىزمەتىنەن ءمالىم ەتكەندەي، 12 جاسار قىز قانت ديابەتىمەن اۋىرعان. ناۋقاس كەنەتتەن ەسىنەن تانىپ، اۋرۋحاناعا جەدەل جەتكىزىلگەن.

«ناۋقاسقا بالالار كارديولوگى تاميللا مارات قىزى حولتەرلىك ە ك گ جاساپ، وندا 4 سەكۋندتان استام 141 ەلەۋلى ءۇزىلىستى انىقتادى. سونىمەن بىرگە 3-دارەجەلى اۆ بلوكادا جۇرەكتىڭ توقتاپ قالۋ قاۋپى تۋىندادى. سول سەبەپتەن، ناۋقاستىڭ جاعدايى قيىن دەپ باعالاندى»، - دەپ حابارلادى اۋرۋحانانىڭ باسپا ءسوز قىزمەتى.

اۋرۋحانا دارىگەرلەرى جاسوسپىرىمنىڭ ءومىرىن ساقتاپ قالۋعا كەڭەس الۋ ءۇشىن استاناداعى ۇلتتىق عىلىمي كارديولوگيا ورتالىعىنىڭ اريتمولوگتارىنا جۇگىنگەن. ناۋقاستى سانيتارلىق اۆياتسيانىڭ كومەگىمەن ەلورداداعى ورتالىققا جەتكىزۋ ماسەلەسى قوزعالدى.

«اتىراۋداعى كارديولوگيا ورتالىعىندا ناۋقاستىڭ جۇرەگىندەگى وڭ جاق قارىنشاعا بەلسەندى فيكساتسياسى بار تۇراقتى سىرتقى كارديوستيمۋلياتور يمپلانتاتسيالاندى. وتانى اريتمولوگ-دارىگەر ق. يسپەرگەنوۆ، اسسيستەنت-رەنتگەنوحيرۋرگ ا. ماكسيموۆ، رەانيماتولوگ ت. لەس ۇلى، كارديولوگ ج. ورالبەكوۆا، بالالار كارديولوگى ت. مارات قىزى جاساعان. وتا ءساتتى ءوتىپ، ناۋقاستىڭ جۇرەگىنە ءريتمدى كارديوستيمۋلياتور قويىلدى»، - دەپ ءمالىم ەتتى اۋرۋحانانىڭ باسپا ءسوز قىزمەتىنەن.

قازىر 12 جاسار جاس ءوسپىرىمنىڭ ومىرىنە ءتونىپ تۇرعان قاۋىپ جوق.

اۆتور
جولداسبەك شوپەعۇل