دارىگەرلەر الماتىلىق ناۋقاستىڭ اياعىن وپەراتسيا ارقىلى تەڭەستىردى

استانا. KAZINFORM - الماتىلىق ورتوپەدتەر 4-دارەجەلى دەفورماتسيالاناتىن ارتروزى بار ناۋقاستىڭ اياعىن تەڭەستىردى، - دەپ حابارلايدى Massaget.kz ءتىلشىسى.

ورتالىق قالالىق كلينيكالىق اۋرۋحاناعا 4-دارەجەلى دەفورماتسيالاناتىن ارتروزى جانە تۇراقتى ارالاس كونتراكتۋراسى بار ناۋقاس ءتۇستى. ناۋقاستىڭ اياق-قول بۋىندارى ۇزاق جىلدار بويى قوزعالماعان.

9 جىل ناۋقاس تۇراقتى اۋىرسىنۋدى سەزىپ، وڭ اياعىن سوزا الماعان.

4-دارەجەلى ارتروز ونىڭ تىزە بۋىنىنىڭ قالىپتى جۇمىسىنا كەدەرگى كەلتىرگەن: قوزعالىستار مينيمالدى بولدى، ال كونتراكتۋرا اياقتى جارتىلاي بۇگىلگەن كۇيدە بەكىتىپ، جاعدايدى ودان سايىن كۇردەلەندىرگەن. ناۋقاس ءۇشىن ءاربىر قادام جاساۋ قاتتى اۋىرسىنۋدى تۋدىردى.

و ق ك ا تراۆماتولوگيا جانە ورتوپەديا ءبولىمىنىڭ مەڭگەرۋشىسى قانات تاۋەكەلوۆ ناۋقاسقا تىزە بۋىنىن تولىق ەندوپروتەزدەۋ وتاسىن جاساۋدى ۇسىندى، ونىمەن ءبىر مەزگىلدە ارتقى بۇلشىق ەت توپتارى بوساتىلدى، بۇل اياقتى تولىعىمەن تۇزەتۋگە مۇمكىندىك بەردى.

كۇردەلى وتا ءمامس پاكەتى شەڭبەرىندە جاسالدى.

«ءبىز بۇزىلعان بۋىندى جاساندى بۋىنعا اۋىستىردىق جانە ءبىر ۋاقىتتا بۇلشىق ەتتى شىعاردىق، بۋىندى بۇگىلگەن كۇيدە ۇستايتىن تۇراقتى كونتراكتۋرانى جويدىق. وسىلايشا، ءبىز اياقتىڭ قوزعالعىشتىعىن قالپىنا كەلتىردىك. وتا ءساتتى ءوتتى»، - دەيدى قانات تاۋەكەلوۆ.

ءساتتى وتادان كەيىن ناۋقاس 9 جىلدان كەيىن العاش رەت اياعىن جازا الدى. الداعى وڭالتۋسىز-اق، قازىردىڭ وزىندە ول ايتارلىقتاي جەڭىلدىك سەزىنەدى. اۋىرسىنۋ باسىلىپ، قوزعالىستار قالپىنا كەلدى.

«2005-جىلدان باستاپ مەنىڭ اياعىم ىسىنە باستادى. مەن ونى جىلىتۋ جاستىقشاسىمەن قىزدىردىم، ويتكەنى ماعان بۋىندار «جىلۋدى جاقسى كورەدى» دەگەن. ءبىراق، وكىنىشكە قاراي، بۇل مەنىڭ اياعىمدى تۇزەتە الماۋىما اكەلدى. وسى جىلدار ىشىندە مەن توزگىسىز اۋىرسىنۋدى سەزىندىم جانە تەك اۋىرسىنۋدى باساتىن دارىلەرمەن ءومىر ءسۇردىم. ورتالىق قالالىق كلينيكالىق اۋرۋحانانىڭ دارىگەرلەرىنە راقمەت، ولاردىڭ كاسىبيلىگىنە تاعزىم ەتەمىن. كەلەسى كۇنى مەن بىردەن اياعىمدى باسىپ، اۋىرسىنۋ كەتتى»، - دەپ ءبولىستى ناۋقاس.