دارىگەرگە شابۋىل جاساعان ادام ءومىر بويى وتەماقى تولەۋى كەرەك - دەپۋتات

استانا. KAZINFORM - ەلدە مەديتسينا قىزمەتكەرلەرىنە كۇش كورسەتۋ دەرەكتەرى جيىلەپ بارادى. ءماجىلىس دەپۋتاتى اسحات ايماعامبەتوۆ بۇل ماسەلەگە زاڭ جۇزىندە ناقتى ءارى قاتاڭ شارالار قابىلداۋ قاجەت ەكەنىن ايتىپ وتىر.

اسحات ايماعامبەتوۆ دارىگەرلەرگە جاسالعان شابۋىل پوليتسيا قىزمەتكەرلەرىنە شابۋىل جاساۋمەن تەڭەستىرىلىپ، قىلمىستىق جاۋاپكەرشىلىك كۇشەيتىلۋى ءتيىس ەكەنىن ايتادى.

- قازاقستاندا باسقا ەشبىر ماماندىق مەديتسينا قىزمەتكەرلەرىندەي جيى اگرەسسياعا تاپ بولمايدى. ونىڭ سالدارى قازىردىڭ وزىندە بايقالىپ جاتىر. دارىگەرلەر جۇمىستان كەتىپ جاتىر، ويتكەنى ءوزىن قاۋىپسىز سەزىنبەيدى. سوندىقتان ءبىز، بۇعان دەيىن ءۇش رەت قىلمىستىق كودەكسكە وزگەرىستەر ۇسىندىق. دارىگەرگە شابۋىل جاساعان ادامعا قاتىستى بولەك باپ، قاتاڭ جازا بولۋى كەرەك. بۇل جازا پوليتسياعا نەمەسە ورمانشىعا شابۋىل جاساۋمەن تەڭ بولۋى ءتيىس. ەگەر دارىگەر سونىڭ كەسىرىنەن جۇمىسقا جاراماي قالسا، كىنالى ادام مورالدىق تا، ماتەريالدىق تا وتەماقى تولەۋى كەرەك. قاجەت بولسا ءومىر بويى تولەسىن، - دەيدى دەپۋتات.

ول بۇل باستاما قولداۋ تاپپاعانىن ايتادى.

- الايدا وسى كۇنگە دەيىن بۇل باستامالارىمىز ۇكىمەتتىڭ قورىتىندىلارىندا قولداۋ تاپپادى، - دەدى اسحات ايماعامبەتوۆ.

دەپۋتات جاقىندا بولعان دارىگەرلەرگە قاتىستى جاعدايعا ءۇستىرت قاراۋعا بولمايتىنىن ايتتى.

- قاراعاندىدا ءبىر ازامات اعا مەدبيكەنى جۇمىس ورنىندا سوققىعا جىققان. مەدبيكە باسىنان جاراقات العان، ساۋساقتارى سىنعان، دەنەسى كوگەرىپ، شاشى جۇلىنىپ، اۋىر سوققىعا ۇشىراعان. ال قوستانايدا حيرۋرگ-ۋرولوگقا شابۋىل جاسالدى. «مەنى كەزەكسىز كىرگىزبەدى» دەپ اشۋلانعان ناۋقاس دارىگەردى ۇرعان ەكەن. سالدارىنان ول اۋىر جاراقاتپەن اۋرۋحاناعا ءتۇستى. باسىنان قان كەتكەن، سۇيەگى سىنعان. مۇنى جاي عانا «كەزدەيسوق جاعداي» دەۋگە بولمايدى. بۇل دەگەنىمىز تەك دارىگەرلەر ءۇشىن ەمەس، ءارقايسىمىز ءۇشىن قاۋىپتى شابۋىل، - دەدى ايماعامبەتوۆ.

ول مۇنداي جاعدايلار ادەتكە اينالىپ بارا جاتىر دەگەندى اتاپ ءوتتى.

- ەڭ سوراقىسى، مەديتسينا قىزمەتكەرلەرىنە قول كوتەرۋ، اسىرەسە جەدەل جاردەم مەن ەمحانا دارىگەرلەرىنە كۇش قولدانۋ ادەتكە اينالىپ بارادى. سوندىقتان وعان دەرەۋ توقتاۋ سالىپ، زاڭمەن شەكتەۋ قويۋ كەرەك. شىنى كەرەك، پرەزيدەنت بۇل ماسەلە بويىنشا ناقتى تاپسىرمانى بۇعان دەيىن دە بەرگەن ەدى: دارىگەرلەردىڭ قاۋىپسىزدىگىن قامتاماسىز ەتۋ قاجەت. ەڭ باستىسى - وسى تاپسىرمانى ورىنداۋ. حالىقارالىق تاجىريبە دە ءبىزدىڭ ۇسىنىسىمىز دۇرىس ەكەنىن كورسەتەدى. ەۋروپا ەلدەرىندە دارىگەرگە شابۋىل جاساۋ پوليتسياعا شابۋىل جاساۋمەن تەڭ. وندا مۇنداي ارەكەت ءۇشىن ناقتى، قاتاڭ جازا بار. مەملەكەت دارىگەردى قاتتى قورعايدى. بىزدە دە سولاي بولۋى كەرەك.

بۇعان قوسا، تاعى ءبىر ماڭىزدى باعىتپەن اينالىسىپ جاتىرمىز. ول - دارىگەرلەردى كاسىبي تاۋەكەلدەردەن مىندەتتى ساقتاندىرۋدى كەڭەيتۋ. جۇمىس ورنىنداعى زورلىق-زومبىلىق پەن جاراقاتتار دا ساقتاندىرۋعا كىرۋى ءتيىس.

وسى كۇزدە ءبىز بۇل زاڭدار بويىنشا ءتيىمدى شەشىم قابىلدانادى دەپ سەنەمىن، - دەدى دەپۋتات.

ايتا كەتەلىك قاراعاندى وبلىسىندا ەر ادام ەكى دارىگەردى سوققىعا جىققان ەدى.