«دارىن» سىيلىعىنىڭ يەگەرلەرىنە 1 ميلليون تەڭگەدەن بەرىلەدى

استانا. قازاقپارات – 26-ماۋسىمنان باستاپ «دارىن» سىيلىعىنا ۇمىتكەرلەردىڭ قۇجاتىن قابىلداۋ باستالدى. وتىنىمدەر 27-تامىزعا دەيىن قابىلدانادى.

بۇل تۋرالى «دارىن» مەملەكەتتىك جاستار سىيلىعى جانە «تاۋەلسىزدىك ۇرپاقتارى» گرانتى ماسەلەلەرى بويىنشا وتكەن باسپا ءسوز كونفەرەنسياسىندا ق ر مادەنيەت جانە اقپارات ءمينيسترىنىڭ جاستار جانە وتباسى ىستەرى كوميتەتىنىڭ ءتوراعاسى مالىمدەدى.

- بيىل 26-ماۋسىمدا «دارىن» سىيلىعىنا ۇمىتكەرلەردىڭ قۇجاتىن قابىلداۋ باستالدى. وتىنىمدەردى قابىلداۋ 27-تامىزعا دەيىن جۇرگىزىلەدى. تولىق اقپاراتتى قازاقستان رەسپۋبليكاسى مادەنيەت جانە اقپارات مينيسترلىگىنىڭ رەسمي سايتىنان بىلە الاسىزدار، - دەدى قايرات قامباروۆ.

مەملەكەتتىك جاستار سىيلىعىنا ۇمىتكەرلەر ەكى كەزەڭنەن تۇراتىن ىرىكتەۋ ارقىلى جان-جاقتى تەكسەرىلىپ، باعالانادى.

- سىيلىق الۋعا ۇسىنىلعان ۇمىتكەرلەردى كوميسسيا 2 كەزەڭدە قارايدى. 1-كەزەڭدە جان-جاقتى قاراۋ ماقساتىندا كوميسسيا مىناداي باعىتتار بويىنشا 6 سەكسيا قۇرادى:

1. ەسترادا، كلاسسيكالىق مۋزىكا، حالىق شىعارماشىلىعى؛

2. ادەبيەت، تەاتر جانە كينو؛

3. جۋرناليستيكا جانە قوعامدىق قىزمەت؛

4. سپورت؛

5. ديزاين جانە بەينەلەۋ ونەرى؛

6. عىلىم.

2-كەزەڭدە كوميسسيا سەكسيا وتىرىسى شىعارعان ناتيجەنى نەگىزگە الا وتىرىپ، سىيلىق بەرۋ تۋرالى شەشىم قابىلدايدى، - دەيدى كوميتەت ءتوراعاسى.

«دارىن» سىيلىعى ۇمىتكەرلەرىنە قويىلاتىن نەگىزگى تالاپتار:

* 14-35 جاس ارالىعىنداعى جاستار؛

* حالىقارالىق جانە رەسپۋبليكالىق كونكۋرستاردىڭ، فەستيۆالدار مەن كورمەلەردىڭ لاۋرەاتتارى؛

* رەسپۋبليكالىق جانە حالىقارالىق دەڭگەيدەگى سپورتتىق جارىستاردىڭ جۇلدەگەرلەرى مەن جەڭىمپازدارى؛

* سونداي-اق عىلىمي قىزمەتكەرلەر بولۋى ءتيىس.

لاۋرەاتتارعا 1 ميلليون تەڭگە كولەمىندە قارجىلاي سىيلىق تابىستالادى.

- ورتالىق، جەرگىلىكتى مەملەكەتتىك ورگاندار، وقۋ ورىندارى، شىعارماشىلىق ۇيىمدار مەن قوعامدىق بىرلەستىكتەر سىيلىق الۋعا لايىقتى جاستاردىڭ كانديداتۋراسىن ۇسىنادى. سىيلىققا يە بولعان جاستارعا «دارىن» مەملەكەتتىك جاستار سىيلىعىنىڭ لاۋرەاتى اتاعى بەرىلەدى. توسبەلگى، ديپلوم جانە اقشالاي سىياقى تابىستالادى. 2024-جىلدان باستاپ، «دارىن» سىيلىعىنىڭ كولەمى 1 نوميناتسيا بويىنشا 1 ميلليون تەڭگەگە كوتەرىلدى، - دەيدى مينيسترلىك مامانى.

وسىعان دەيىن مادەنيەت مينيسترلىگى ۆەدومستۆولىق ماراپاتتاردىڭ ورىنسىز تاراتىلۋ دەرەگى تىركەلگەن جوق ەكەندىگى تۋرالى ءمالىم ەتتى.