«دارىن» مەملەكەتتىك جاستار سىيلىعىنا بايقاۋ جاريالاندى
استانا. KAZINFORM - بايقاۋ «ادەبيەت»، «عىلىم»، «ديزاين جانە بەينەلەۋ ونەرى»، «جۋرناليستيكا»، «كلاسسيكالىق مۋزىكا»، «قوعامدىق قىزمەت»، «سپورت»، «تەاتر جانە كينو»، «ەسترادا»، «حالىق شىعارماشىلىعى» اتتى 10 نوميناتسيا بويىنشا وتەدى. بۇل تۋرالى مادەنيەت جانە اقپارات مينيسترلىگىنىڭ باسپا ءسوز قىزمەتى حابارلادى.
«دارىن» مەملەكەتتىك جاستار سىيلىعى - عىلىم، شىعارماشىلىق، قوعامدىق قىزمەت سالالارىندا جەمىستى ەڭبەگىمەن كوزگە تۇسكەن، سونداي- اق جوعارى سپورتتىق جەتىستىكتەرى ءۇشىن دارىندى جاستاردى مەملەكەت تاراپىنان قولداۋ ماقساتىندا ۇسىنىلادى.
سىيلىق الۋعا حالىقارالىق جانە رەسپۋبليكالىق كونكۋرستاردىڭ، فەستيۆالدار مەن ءتۇرلى شارالاردىڭ لاۋرەاتتارى، رەسپۋبليكالىق جانە حالىقارالىق دەڭگەيلەردەگى سپورتتىق جارىستاردىڭ جۇلدەگەرلەرى مەن جەڭىمپازدارى، سونداي-اق قىزمەتى يننوۆاتسيالىق بولىپ تابىلاتىن جانە ءتيىستى سالا مەن تۇتاستاي قوعامدى دامىتۋعا ىقپال ەتكەن قازاقستان رەسپۋبليكاسىنىڭ 35 جاسقا دەيىنگى ازاماتتارى ۇمىتكەر بولا الادى.
«دارىن» جاستار سىيلىعىن الۋعا كانديداتۋرالاردى ورتالىق، جەرگىلىكتى جانە وزگە دە مەملەكەتتىك ورگاندار، قوعامدىق بىرلەستىكتەر جانە قازاقستان رەسپۋبليكاسىنىڭ اۋماعىندا تىركەلگەن وزگە دە زاڭدى تۇلعالار جۇرگىزەدى جانە مىناداي قۇجاتتاردى قاعاز جانە ەلەكتروندىق تۇردە جىبەرەدى:
1) كانديداتتىڭ جەكە باسىن كۋالاندىراتىن قۇجاتتىڭ كوشىرمەسى؛
2) وسى قاعيدالارعا قوسىمشاعا سايكەس نىسان بويىنشا «دارىن» مەملەكەتتىك جاستار سىيلىعىن الۋعا ارنالعان تىركەۋ ءوتىنىمى؛
3) ءوتىنىشحات پەن سىيلىق الۋعا ىزدەنۋشىنىڭ جەتىستىكتەرى تۋرالى انىقتاما؛
4) ماراپاتتاۋ ديپلومدارىنىڭ، گراموتالاردىڭ، العىس حاتتاردىڭ كوشىرمەلەرى (بولعان جاعدايدا)؛
5) كانديداتتىڭ نەمەسە كانديدات تۋرالى ماقالالاردىڭ، جاريالانىمداردىڭ كوشىرمەلەرى (بولعان جاعدايدا)؛
6) بانكتىك شوتتىڭ بولۋى تۋرالى انىقتامانىڭ كوشىرمەسى؛
7) كانديداتتىڭ جەتىستىكتەرى تۋرالى راستايتىن ماتەريالدار (بولعان جاعدايدا).
جەڭىمپازدارعا «دارىن مەملەكەتتىك جاستار سىيلىعىنىڭ لاۋرەاتى» اتاعى بەرىلەدى جانە ولار ديپلوممەن، توسبەلگىمەن سونداي-اق قارجىلاي سىيلىقپەن ماراپاتتالادى.
«دارىن» جاستار سىيلىعى 1992 -جىلى تاعايىندالعان. ءار جىلدارى اتالعان سىيلىقتى ءتۇرلى سالاداعى 360 دان استام ازامات يەلەنگەن بولاتىن.
كونكۋرسقا قاتىسۋعا قۇجاتتار 2025 -جىلعى 26 - ماۋسىمنان 27- تامىز ارالىعىندا (قوسا العاندا) قازاقستان رەسپۋبليكاسى مادەنيەت جانە اقپارات مينيسترلىگى (قاعاز نۇسقا) مىنا مەكەنجاي بويىنشا: استانا قالاسى، ماڭگىلىك ەل داڭعىلى 8، «مينيسترلىكتەر ءۇيى» عيماراتىنىڭ 14-كىرەبەرىسىندە، ال (ەلەكتروندىق نۇسقا) premiya.daryn@mki.gov.kz پوشتاسى ارقىلى قابىلدانادى.
انىقتاما تەلەفوندارى: 87172740525، 87172741843، 87011704654 (جۇمىس كۇندەرى، ساع. 9:00 دەن 18:30 عا دەيىن).
ايتا كەتەيىك، «دارىن» مەملەكەتتىك جاستار سىيلىعىنىڭ قاعيداسىمەن مىنا سىلتەمە ارقىلى تانىسا الاسىز.