«دارىن» جوباسى: بالاڭىزعا ماتەماتيكانى وڭاي ۇيرەتۋدىڭ جولى
استانا. قازاقپارات - ءبىلىم - ادامدى تۇلعا رەتىندە قالىپتاستىرىپ، دامىتاتىن قۇرال. ال مەكتەپ كەزىندە بەرىلەتىن ءبىلىمدى تولىقتاي بويعا ءسىڭىرۋ - اسا ماڭىزدى پروتسەسس. ماتەماتيكا - وقۋشىلاردىڭ جارتىسى جاقسى كورسە، جارتىسى ۇناتپايتىن كۇردەلى ءپان.
Bugin.kz ءتىلشىسى بالاڭىزدىڭ زەيىنىن اشىپ، ماتەماتيكانى وڭاي تۇسىنۋگە كومەكتەسەتىن باعدارلامالار تۋرالى «iDaryn» ونلاين پلاتفورماسىنىڭ نەگىزىن قالاۋشى ەرعالي اقتىلەك مىرزامەن تىلدەستى.
«iDaryn» ونلاين پلاتفورماسىنىڭ قۇرىلۋ تاريحى قانداي جانە بۇل باعدارلامانى جاساۋعا نە سەبەپ بولدى؟
«ءبىز 2019 -جىلى «Daryn.online» جوباسىن باستاعاندا تەك جاراتىلىستانۋ باعىتىنداعى پاندەردى عانا قامتىعانبىز. 2020 -جىلى كارانتين رەجيمى جاريالانىپ، بارلىق ءپاندى جوباعا ەنگىزدىك. كەيىننەن ۇبت- عا دايىندىق كۋرستارىن جاسادىق. 2020-2022 -جىلدارى 20 مىڭعا جۋىق وقۋشىنى ۇ ب ت-عا دايىندادىق. شاكىرتتەردى دايىنداۋ كەزىندە كوبىسىنىڭ جاراتىلىستانۋ باعىتىنداعى پاندەردەن اقسايتىنىن بايقادىق»، دەيدى اقتىلەك مىرزا.
جوبا جەتەكشىسىنىڭ ايتۋىنشا، ماتەماتيكا ءپانى - جاراتىلىستانۋ پاندەرىنىڭ نەگىزى. ياعني، فيزيكا، حيميا، بيولوگيا، گەوگرافيا، ينفورماتيكا پاندەرىن ۇيرەنۋ ءۇشىن ءبىرىنشى ماتەماتيكانى ءبىلۋ كەرەك. ونسىز ۇيرەنۋ مۇمكىن ەمەس.
«وسىلايشا، 2022 -جىلدىڭ مامىر ايىندا ماتەماتيكانى كەز كەلگەن ادامعا وڭاي، تەز، قىزىقتى تۇسىندىرەتىن جوبا جاساۋعا كىرىستىك»، دەپ جوبانىڭ تاريحى تۋرالى قىسقاشا پىكىر ءبىلدىردى.
ماتەماتيكانى بالالارعا، اسىرەسە 5-6-سىنىپ وقۋشىلارىنا ۇيرەتەردە نەنى ەسكەرۋ قاجەت؟
«5-8 جاس ارالىعىندا بالانىڭ شىعارماشىلىق داعدىسى دامۋعا قولايلى جاس بولسا، 8-13 جاس ارالىعى سىني ويلاۋ داعدىسىن دامىتۋعا قولايلى جاس دەپ سانالادى. سەبەبى 5-8 جاستا بالا قيالعا ەرىك بەرسە، 8-13 جاس ارالىعىندا شىنايى ومىرگە قاتىستى تانىمدىق جانە اناليتيكالىق سۇراقتارى كوپ بولادى. 5-6-سىنىپ وقۋشىلارى جاسى 10-12 ارالىعىنداعى بالالار. وسى كەزەڭدە بالاعا ماتەماتيكانى ۇيرەتۋ ارقىلى سىني ويلاۋ جۇيەسىن دامىتۋ كەرەك»، دەيدى اقتىلەك مىرزا.
سول سەبەپتى «iDaryn» كومانداسى ماتەماتيكانى بارىنشا جەڭىل، قىزىقتى ۇيرەتۋ ءۇشىن پلاتفورما جاساپ شىققان.
iDaryn پلاتفورماسىنىڭ باسقا ونلاين باعدارلامالاردان ايىرماشىلىعى قانداي؟
ايىرماشىلىعىمىز:
«ءبىز بارلىق تاپسىرمالاردى سيمۋلياتور ارقىلى بەرەمىز، ياعني 100 گە جۋىق ءارتۇرلى تيپتەگى 2000 نان استام تاپسىرمالار بار.
تاپسىرما وقۋشىنىڭ دەڭگەيىنە سايكەس بەرىلەدى.
iDaryn موبيلدى قوسىمشاسىن قولدانۋ وتە وڭاي جانە 24/7 پايدالانۋ مۇمكىندىگى بار.
تاعى ءبىر ارتىقشىلىعىمىز - تەوريانى كەيىپكەرلەرمەن، قىزىقتى وقيعالار ارقىلى تۇسىندىرەمىز»، دەپ پلاتفورمانىڭ ەرەكشەلىكتەرىن اتاپ ءوتتى.
جوبانىڭ قۇرىلتايشىسى اقتىلەك مىرزانىڭ ايتۋىنشا، ماتەماتيكا ابستراكتىلى ءپان بولعاندىقتان ونى بەينەلەپ كورسەتۋ وتە قيىن. بىزدەگى بارلىق تاپسىرمادا جانە تەوريادا ماتەماتيكالىق ۇعىمدى بالا كوز الدىنا ەلەستەتە الاتىنداي تۇردە جاساپ شىققان. بۇل - جوبانىڭ نەگىزگى ەرەكشەلىگى.
وقۋشىلاردىڭ ماتەماتيكاعا قىزىعۋشىلىعىن ارتتىرۋ ءۇشىن قانداي امال (لايفحاكتار) قولداناسىزدار؟
«قازىرگى بالالار تەلەفوننان مۋلتفيلم كورەدى جانە ءتۇرلى ويىن ويناعاندى جاقسى كورەدى. ءبىز وسى نارسەنى پايدالانا وتىرىپ، تەوريانى كوميكستەر ارقىلى كەيىپكەرلەرمەن ءتۇسىندىرۋدى ءجون كوردىك. جوبانى جاساۋ بارىسىندا 10-12 جاس ارالىعىنداعى بالالارعا تەوريالاردى جانە تاپسىرمالاردى بەرىپ كوردىك. ولارعا بۇل وتە قىزىقتى بولدى جانە بىزگە بىرنەشە جاقسى ۇسىنىستار ايتتى. ءبىز گەيميفيكاتسيا ەلەمەنتتەرىن پايدالانا وتىرىپ، ءونىمدى ۇزدىكسىز دامىتۋ ارقىلى بالالاردىڭ قىزىعۋشىلىعىن ۇستاپ تۇرامىز»، دەيدى جوبا قۇرىلتايشىسى.
«iDaryn» پلاتفورماسىنا تىركەلۋ ءۇشىن نە ىستەۋ كەرەك؟
«iDaryn موبيلدى قوسىمشاسىن AppStore جانە PlayMarket تەن كەز كەلگەن وقۋشى جۇكتەي الادى. تىركەلۋ وتە قاراپايىم. تەلەفون نومەرىن ەنگىزەدى جانە 4 ساننان تۇراتىن كودتى ەنگىزەدى. سونان سوڭ اتى-ءجونىن ەنگىزەدى. وسىلاي ەكى قاداممەن تىركەلىپ، ءموبيلدى قوسىمشانى پايدالانا الادى».
اتا-انالارعا جانە ماتەماتيكا پانىنەن قينالاتىن وقۋشىلارعا قانداي كەڭەس بەرەسىزدەر؟
«زەيىن قويۋ، ەستە ساقتاۋ، شەشىم قابىلداۋ، پروبلەما شەشۋ قابىلەتتەرىن بىردەي دامىتۋدىڭ جالعىز جولى - ماتەماتيكادان كوپ ەسەپ شىعارتۋ. ياعني، ماتەماتيكادان مىقتى ەسەپ شىعاراتىن وقۋشىنىڭ بارلىق كورسەتكىشتەرى جوعارى بولادى»، دەپ پىكىرىن ءبىلدىردى.
سونداي-اق، اقتىلەك مىرزا جوبانىڭ جەكە كورسەتكىشتەرىن مىسالعا كەلتىردى.
«عىلىمي زەرتتەلگەن مەتوديكالاردى پايدالانىپ، 100 گە جۋىق وقۋشىنىڭ ورتاشا ۇلگەرىمىن � جوعارى دەڭگەيگە جەتكىزدىك. سەبەبى وقۋشىنىڭ ەستە ساقتاۋ، پروبلەما شەشۋ، زەيىن قويۋ، شەشىم قابىلداۋ قابىلەتتەرىن قالاي دامىتۋ كەرەكتىگىن جاقسى بىلەمىز»، دەيدى جوبا جەتەكشىسى.
«iDaryn» پلاتفورماسى تەك ەلىمىزدە عانا ەمەس، الەمدە دە تانىلىپ كەلەدى. بيىل 26-29-اقپان ارالىعىندا قاتاردا وتكەن بۇكىلالەمدىك «Web Summit Qatar 2024» ساميتىندە «iDaryn» پلاتفورماسى تانىستىرىلدى. جوبا مەنەدجەرى مەيىرحان مىرزا الەمدىك دەڭگەيدەگى ءىرى تەحنولوگيالىق كونفەرەنسياعا قازاقستاننىڭ اتىنان بارىپ، ۇزدىك پلاتفورمانى تانىستىرعان.