ەگدە جاستاعى ادامداردا قاتەرلى ىسىك باياۋ داميدى - ونكولوگ

الماتى. KAZINFORM - قاتەرلى ىسىك جاستارعا قاراعاندا قارت كىسىلەردە باياۋ داميدى. بۇل تۋرالى Kazinform تىلشىسىنە الماتىلىق ونكولوگ ايتتى.

قازاق ونكولوگيا جانە راديولوگيا عىلىمي- زەرتتەۋ ينستيتۋتىنىڭ ستراتەگيالىق جانە ينۆەستيتسيالىق دامۋ ءبولىمىنىڭ مەڭگەرۋشىسى الما جىلقايداروۆانىڭ ايتۋىنشا، بۇل قاتەرلى ىسىك اۋرۋىنىڭ كلاسسيكالىق تۇرلەرىنە عانا ءتان.

- ەگدە جاستاعى ادامداردا قاتەرلى ىسىك باياۋ داميدى. ويتكەنى، قارت كىسىلەردە قاتەرلى ىسىكتىڭ كلاسسيكالىق ءتۇرى ءجيى كەزدەسەدى. بۇل ۇزاق داميدى. ياعني، جاسى ۇلعايعان ادامداردا وبىر اۋرۋى باسقا دەرتىنىڭ اسقىنۋىنان نەمەسە جاس كەزىندەگى جاراقاتىنان پايدا بولۋى مۇمكىن. مىسالى، ەگدە جاستاعى ناۋقاستاردا ءسۇت بەزى جانە تەرى قاتەرلى ىسىگى، پروستاتا وبىرى اعزادا ۇزاق ۋاقىت داميدى جانە قاشىقتاعى مەتاستازسىز بىرتىندەپ وسەدى، - دەيدى دارىگەر.

سونداي- اق ول جاس اعزادا جاسۋشالاردىڭ ءبولىنۋ جىلدامدىعى تەز جۇرەتىنىن تىلگە تيەك ەتتى.

- ءيا، وكىنىشكە قاراي، جاستاردا كلاسسيكالىق فورما ەمەس. سوندىقتان مەتاستازدار پايدا بولىپ، قاتەرلى ىسىك تەز وسەدى. ادامداردا ءبىز ءارقاشان بىلە بەرمەيتىن باسقا دا فاكتورلار بار، ءبىراق جاستاردا كوبىنە قاتەرلى ىسىكتىڭ اگرەسسيۆتى فورمالارى كەزدەسەدى. سول سەبەپتى ەرلەر مەن ايەلدەردى جىل سايىنعى ديسپانسەرلەۋدى 18 جاستان باستاۋ كەرەك. بۇل اعزاداعى قاتار جۇرەتىن اۋرۋلاردى عانا ەمەس، سونىمەن قاتار ونكولوگيالىق اۋرۋلاردىڭ دامۋىن ەرتە انىقتاپ، ونى توقتاتۋعا كومەكتەسەدى، - دەيدى الما جىلقايداروۆا.