د د ۇ مايمىل شەشەك ۆيرۋسىنا بايلانىستى جاھاندىق توتەنشە جاعداي جاريالادى

استانا. KAZINFORM - افريكادا كەڭ تارالعان، اسىرەسە كونگو رەسپۋبليكاسىندا اسەرىن كۇشەيتكەن مايمىل شەشەك ۆيرۋسىنا (M-pox) بايلانىستى جاھاندىق توتەنشە جاعداي جاريالاندى.

بۇل تۋرالى دۇنيەجۇزىلىك دەنساۋلىق ساقتاۋ ۇيىمى (د د ۇ) حابارلادى.

دۇنيەجۇزىلىك دەنساۋلىق ساقتاۋ ۇيىمىنىڭ باس ديرەكتورى تەدروس ادانوم گەبرەيسۋسكە د د ۇ توتەنشە كوميتەتى M-pox ۆيرۋسىنا قارسى توتەنشە جاعداي ورناتۋعا كەڭەس بەرگەنى جانە ول ۇسىنىستى بىردەن قابىلداعانى اتاپ ءوتىلدى.

ديرەكتور دۇنيەجۇزىلىك دەنساۋلىق ساقتاۋ ۇيىمى قۇرعان توتەنشە جاعدايلار جونىندەگى كوميتەت وتىرىسىنىڭ قورىتىندىسى بويىنشا افريكادا جانە باسقا ايماقتاردا مايمىل شەشەگىنىڭ ودان ءارى حالىقارالىق دەڭگەيدە تارالۋ الەۋەتىنە باعا بەردى. ونىڭ ايتۋىنشا، كونگو دەموكراتيالىق رەسپۋبليكاسىندا M-pox ۆيرۋسىن جۇقتىرۋ جاعدايلارى 10 جىلدان استام ۋاقىت بويى تىركەلىپ، جىلدان جىلعا كوبەيىپ كەلەدى.

- وتكەن جىلمەن سالىستىرعاندا تىركەلگەن اۋرۋلاردىڭ سانى ايتارلىقتاي ءوستى. ناۋقاستاردىڭ سانى 14 مىڭنان اسادى. اۋرۋعا بايلانىستى 524 ءولىم انىقتالدى، - دەلىنگەن د د ۇ حابارلاماسىندا.

نەگىزىنەن دەنەدە ۆيرۋس تۋدىرعان بورتپەلەرگە قول تيگىزۋ، وسى بورتپەلەرمەن لاستانعان كيىمدەردى، توسەك-ورىنداردى، سۇلگىلەردى جانە سول سياقتىلاردى پايدالانۋ اۋرۋدىڭ تارالۋىنا سەبەپ بولادى.

ۆيرۋستىڭ العاشقى بەلگىلەرى 5-21 كۇندە پايدا بولادى. مايمىل شەشەك ادەتتە جوعارى تەمپەراتۋرانى، باس اۋرۋىن، ارقا مەن بۇلشىقەتتەردىڭ اۋىرسىنۋىن، ليمفا تۇيىندەرىنىڭ ءىسىنۋىن، شارشاۋدى، قالتىراۋدى جانە سۋشەشەك ءتارىزدى تەرى بورتپەلەرىن تۋدىرادى. ارنايى ەمى جوق، ءبىراق اۋرۋ ۆيرۋسقا قارسى پرەپاراتتارمەن ەمدەلەدى. كوپ جاعدايدا اۋرۋ جەڭىل وتەدى جانە ناۋقاستار بىرنەشە اپتا ىشىندە قالپىنا كەلەدى.

د د ۇ 2022 -جىلى مايمىل شەشەگىنىڭ اتاۋىن M-pox دەپ وزگەرتتى.

ايتا كەتەيىك، بۇعان دەيىن د د ۇ مايمىل شەشەگى جاعدايىنا بايلانىستى شۇعىل وتىرىس وتكىزەتىنىن حابارلاعان ەدىك.