ۆەدومستۆو مالىمەتىنشە، بۇگىندە قولدانىستاعى زاڭنامادا ءدىني مازمۇنداعى ماتەريالداردى ينتەرنەت رەسۋرستاردا، ونىڭ ىشىندە الەۋمەتتىك جەلىلەردە تاراتۋدى رەتتەۋ قاراستىرىلماعان.
- الايدا قۇقىق قولدانۋ پراكتيكاسىن ەسكەرگەن ءجون. كوميتەتتىڭ ۇستانىمى - ازاماتتارعا ءتۇسىندىرۋ جۇمىستارىن جۇرگىزۋ جانە ەسكەرتۋ جاساي وتىرىپ، اكىمشىلىك شارالاردى بارىنشا ازايتۋ. ءبىراق قاجەتتىلىك تۋىنداعان جاعدايدا، اكىمشىلىك سيپاتتاعى ءتيىستى شارالاردى قابىلداۋ ورىندى،-دەلىنگەن حابارلامادا.
سونىمەن قاتار ءدىن ىستەرى كوميتەتى ءدىني اقپارات تاراتقان تۇرعىندار جاۋاپقا تارتىلمايتىن ناقتى شارتتاردى اتادى.
- ءتيىستى مەملەكەتتىك ورگاندار ازاماتتاردى كونفەسسياارالىق نەمەسە ءدىني الاۋىزدىقتى قوزدىرۋعا، ەكسترەميزمدى نەمەسە تەرروريزمدى ناسيحاتتاۋعا ءارى اقتاۋعا باعىتتالعان مالىمەتتەرى جوق ءدىني مازمۇنداعى ماتەريالداردى جاريالاعانى، ءدىني مەرەكەلەرمەن قۇتتىقتاعانى ءۇشىن جاۋاپقا تارتپايدى،-دەلىنگەن رەسمي جاۋاپتا.
ال بۇل شەڭبەردەن شىعىپ، قوعامعا ىرىتكى سالۋعا، ەلدە دۇربەلەڭ تۋعىزۋعا اكەلەتىن ارەكەتتەرگە بارعاندار زاڭ الدىندا جاۋاپ بەرەدى.
- دەسترۋكتيۆتى ءدىني اعىمداردىڭ يدەيالارىن قولداۋ، كونستيتۋتسيالىق قۇرىلىس نەگىزدەرىن كۇشتەپ وزگەرتۋ، انتيمادەني جانە انتيۇلتتىق مەسسەدجدەردى ناسيحاتتاۋ، ميتينگىلەرگە شاقىرۋ، «جيھادقا» قاتىسۋعا ۇندەۋ، سونداي-اق كونفەسسياارالىق ارازدىقتى قوزدىرۋ ارقىلى قوعامدا الاۋىزدىق تۋدىرۋعا كەسىرىن تيگىزەتىن ازاماتتارعا قاتىستى ءتيىستى شارالار قابىلدانادى،-دەپ مالىمدەدى كوميتەت.
ايتا كەتەيىك، بۇعان دەيىن ءدىني قاۋىم ادەپ پەن ءبىلىمدى قاتار دارىپتەۋدىڭ ماڭىزىن ايتقانىن جازعانبىز.