ءيتتى ۇرىپ، ورتەپ ولتىرگەن ەكى ادامنىڭ باس بوستاندىعى 6 ايعا شەكتەلدى
اتىراۋ. KAZINFORM - اتىراۋدا ەكى جىگىتتىڭ ءبىرى ءيتتى باعاناعا بايلاپ، ارتىنشا ۇرعان. ال، ەكىنشىسى يتكە جانارماي شاشىپ ورتەگەن. سوت ءيتتى ولتىرگەن ەكەۋدىڭ باس بوستاندىعىن 6 ايعا شەكتەدى.
بۇل تەرىس ارەكەت جۇرتشىلىقتىڭ نارازىلىعى مەن ءتۇرلى پىكىرىنە ارقاۋ بولدى. جەرگىلىكتى پوليتسيا كۇدىكتىنىڭ ءبىرىن قاماۋعا العان ەدى.
اتالعان قىلمىستىق ءىس اتىراۋ وبلىستىق كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتىندا قارالدى. ويتكەنى، سوتتالۋشىنىڭ ءبىرى كامەلەت جاسىنا تولماعان.
سوتتىڭ مالىمەتىنە سۇيەنسەك، وقيعا بيىلعى جازدا بولعان. ءيتتى قاتىگەزدىكپەن قورلاعان ەكى ايىپتالۋشىنىڭ ارەكەتى ق ر قىلمىستىق كودەكسىنىڭ 316-بابىنىڭ 3-بولىگىنىڭ 2-جانە 5-تارماعىمەن سارالانعان.
«سوتتالۋشىلار ءوزارا ءسوز بايلاسۋ ارقىلى كوشەدەن ءيتتى ۇستاپ الىپ، باعاناعا بايلاعان. ءبىرى ءيتتىڭ ۇستىنە جانارماي قۇيىپ، ارتىنشا ورتەگەن. ال، ەكىنشىسى ءيتتى تەمىرمەن بىرنەشە رەت ۇرعان. سونىڭ ناتيجەسىندە ءيت ءولىپ قالعان. سوتتالۋشىلاردىڭ كىناسى كۋالاردىڭ ايعاقتارىمەن، وقيعا بولعان جەردى قاراۋ حاتتاماسىمەن، ساراپتاما قورىتىندىلارىمەن تولىق دالەلدەندى»، - دەپ حابارلادى اتالعان سوتتان.
پروكۋرور سوتتالۋشىلارعا جارتى جىل مەرزىمگە باس بوستاندىعىن شەكتەۋ جازاسىن تاعايىنداۋدى ۇسىندى. ال، سوتتالۋشىلار كىناسىن تولىق مويىنداپ، جەڭىل جازا بەرۋدى سۇراعان.
سوت ايىپتالۋشىلاردى ق ر قىلمىستىق كودەكسىنىڭ 316-بابىنىڭ 3-بولىگىنىڭ 2) تارماعىمەن كىنالى دەپ تانىدى. ايىپتالۋشىلاردان جاريا تۇردە نەمەسە ماسس-مەديانى، تەلەكوممۋنيكاتسيا جەلىلەرىن نەمەسە ونلاين-پلاتفورمالاردى پايدالانا وتىرىپ، جاسادى دەگەن ايىپ الىنىپ تاستالدى. ويتكەنى، اتالعان ايىپ بەلگىسى دالەلدەنبەگەن.
«سوتتالۋشىلاردىڭ جازاسىن جەڭىلدەتەتىن ءمان-جاي رەتىندە جاسى مەن بۇرىن سوتتى بولماعانى تانىلدى. جازانى اۋىرلاتاتىن ءمان-جايلاردىڭ جوقتىعى ەسكەرىلىپ، ولاردىڭ باس بوستاندىعىن 6 اي مەرزىمگە شەكتەۋ جازاسى تاعايىندالدى»، - دەپ ءمالىم ەتتى سوتتان.
سوت ۇكىمى زاڭدى كۇشىنە ەنگەن جوق.
ەسكە سالا كەتەلىك، بۇعان دەيىن اتىراۋ وبلىسىندا ءيتتى ورتەگەن جىگىت قاماۋعا الىنعانىن جازعان بولاتىنبىز.