عيماراتتان قاشىپ شىقتىق - ىستانبۇلدا جۇرگەن وتانداسىمىز جەر سىلكىنىسى جايلى

ىستانبۇل. KAZINFORM - ىستانبۇلدا جۇرگەن اباي ەسىمدى وتانداسىمىز جەر سىلكىنىسى ورىن العاندا قورقىنىشتى بولعانىن ايتادى.

- ساۋدا ۇيىندە ءجۇر ەدىك، 6,2 بال جەر سىلكىنىسى بولىپ، عيمارات دىرىلدەپ كەتتى. جۇرگەن جۇرتتىڭ ءبارى جاپاتارماعاي دالاعا ۇمتىلدى. ەندى دالادا ءجۇرمىز، - دەيدى اباي.

تۇركيانىڭ توتەنشە جاعدايلار جانە تابيعي اپاتتار باسقارماسىنىڭ سايتىندا جاريالانعان اقپاراتقا قاراعاندا، سيليۆري جاعالاۋىندا قۋاتى 6,2 بال جەر سىلكىنىسى تىركەلگەن.

سيليۆري - تۇركيانىڭ ەۋروپالىق بولىگىندەگى ءمارمار تەڭىزىنىڭ جاعالاۋىندا ورنالاسقان قالا جانە ىستانبۇل ولكەسىنىڭ اۋدانى. جەر سىلكىنىسىنىڭ 6,92 شاقىرىم تەرەڭدىكتە ورىن العانى ناقتىلانىپ وتىر.

الەۋمەتتىك جەلىدە ەلدىڭ ىشكى ىستەر ءمينيسترى الي ەرليكايانىڭ مالىمدەمەسى تارادى.

وندا: «قۋاتى 6,2 بال بولاتىن جەر سىلكىنىسى سيليۆريدە، ءمارمار تەڭىزىندە، ىستانبۇلدا ورىن الدى. كورشى ولكەلەردە دە سەزىلگەن جەر سىلكىنىسىنە وراي AFAD جانە ءبىزدىڭ ءتيىستى مەكەمەلەرىمىزدىڭ بارلىق كومانداسى دالالىق سكانەرلەۋدى باستادى. جەر سىلكىنىسىنەن زارداپ شەككەن ازاماتتارىمىزدىڭ تەزىرەك ساۋىعىپ كەتۋىن تىلەيمىن. اللا ەلىمىزدى جانە حالقىمىزدى اپاتتان ساقتاسىن»، - دەلىنگەن.

بۇعان دەيىن ەگەي تەڭىزىندە جەر سىلكىنىسىنىڭ جيىلەۋى تۇركيا مەن گرەكياعا قاتەر توندىرەتىنى حابارلانعان.