- قازىرگى تاڭدا گرانتتىق جانە باعدارلامالىق نىسانالى قارجىلاندىرۋ اياسىندا بارلىعى 2217 عىلىمي جوبا جۇزەگە اسىرىلىپ جاتىر. اتاپ ايتقاندا، 2024- 2026 -جىلدارعا ارنالعان گرانتتىق قارجىلاندىرۋ بويىنشا 1077 جوبا، ال باعدارلامالىق نىسانالى قارجىلاندىرۋ شەڭبەرىندە 30 جوبا ىسكە اسىرىلىپ كەلەدى. سونىمەن قاتار، 2025- 2027 -جىلدارعا ارنالعان گرانتتىق قارجىلاندىرۋ بويىنشا 1031 جوبا جانە باعدارلامالىق نىسانالى قارجىلاندىرۋ باعىتىندا 79 جوبا قامتىلعان، - دەلىنگەن كوميتەتتىڭ Kazinform اگەنتتىگىنە بەرگەن جاۋابىندا.
2016 -جىلدان باستاپ «عىلىم قورى» ا ق عىلىمي نەمەسە عىلىمي-تەحنيكالىق قىزمەت ناتيجەلەرىن كوممەرتسيالاندىرۋ جوبالارىن گرانتتىق قارجىلاندىرۋ بويىنشا كونكۋرستار وتكىزىپ كەلەدى. وسى كەزەڭدە، ياعني 2016-2025 -جىلدارى جالپى 7 كونكۋرس ۇيىمداستىرىلدى.
- قولداۋ كورسەتىلگەن جوبالاردىڭ ەلىمىزدىڭ عىلىمي- تەحنيكالىق جانە ەكونوميكالىق دامۋىنا قوسقان جيىنتىق ۇلەسى 143,3 ميلليارد تەڭگەنى قۇرادى. بۇل كورسەتكىش ءونىمدى ساتۋدان تۇسكەن تابىستى، تارتىلعان جەكە قوسا قارجىلاندىرۋدى، سالىق تولەمدەرىن جانە جوبالاردىڭ ماتەريالدىق-تەحنيكالىق بازاسىن نىعايتۋعا باعىتتالعان ينۆەستيتسيالاردى قامتيدى. اتاپ ايتقاندا، ءونىم ساتۋدان تۇسكەن تابىس 61,7 ميلليارد تەڭگەگە جەتتى، 28,2 ميلليارد تەڭگە جەكە قوسا قارجىلاندىرۋ تارتىلدى، بيۋدجەتكە 13,2 ميلليارد تەڭگە سالىق تولەندى. سونىمەن قاتار 40,1 ميلليارد تەڭگەگە نەگىزگى قۇرالدار ساتىپ الىنىپ، 2,5 مىڭعا جۋىق جۇمىس ورنى قۇرىلدى. بۇگىندە 30 جوبا ەكسپورتقا شىقتى، ال 8 جوبا بويىنشا ءونىم ساتۋ كولەمى 1 ميلليارد تەڭگەدەن استى، - دەپ اتالىپ وتكەن مينيسترلىك اقپاراتىندا.