عىلىم مينيسترلىگى ستۋدەنتتەر شاكىرتاقىسىنىڭ كەشىگۋ سەبەبىن ءتۇسىندىردى

عىلىم جانە جوعارى ءبىلىم مينيسترلىگى ستۋدەنتتەر شاكىرتاقىسىنىڭ كەشىگۋ سەبەبىن ءتۇسىندىردى، دەپ حابارلايدى قازاقپارات ءتىلشىسى.

«بۇل ماسەلە عىلىم جانە جوعارى ءبىلىم ءمينيسترىنىڭ باقىلاۋىندا تۇر. جاڭا باعدارلاماعا كوشۋگە بايلانىستى شاكىرتاقى تولەۋ مەرزىمى 2-3 كۇنگە شەگەرىلدى. كەشە شامامەن 5 جوعارى وقۋ ورنىنىڭ ستۋدەنتتەرى شاكىرتاقىلارىن الدى. بۇگىن كەشكە دەيىن بارلىق ستۋدەنت شاكىرتاقىلارىن تولىق كولەمدە الاتىن بولادى. مينيستر باقىلاۋدا ۇستاپ وتىر. شاكىرتاقى ەكى كۇنگە كەشىكتى»، - دەپ ءمالىم ەتتى مينيسترلىكتىڭ باسپا ءسوز قىزمەتىنەن.

كەشە باسپا ءسوز بەتىندە ەلورداداعى جوعارى وقۋ ورىندارىنىڭ ستۋدەنتتەرىنە ستيپەنديا كەشىكتىرىلىپ جاتقانى جازىلعان ەدى. مۇنداي اقپارات مەسسەندجەرلەردەگى ستۋدەنتتىك توپتاردا تاراعان.

ايتا كەتەيىك، 2021 -جىلدان بەرى شاكىرتاقى ستۋدەنتتىڭ ەسەپشوتىنا تىكەلەي تۇسەدى. ياعني، شاكىرتاقىنى ج و و ەمەس، عىلىم جانە جوعارى ءبىلىم مينيسترلىگى جىبەرەدى.