ءىلياس جانسۇگىروۆتىڭ 1927-جىلى جارىق كورگەن جىر جيناعى تابىلدى
جىر قۇلاگەرى اتانعان ءدۇلدىل اقىن ءىلياس جانسۇگىروۆتىڭ بۇرىن بەلگىسىز بولىپ كەلگەن تاعى ءبىر كىتابى تابىلدى، دەپ حابارلايدى Kazinform.
توتە جازۋمەن تەرىلىپ، 1927 -جىلى ماسكەۋ قالاسىنداعى باسپادان شىققان جيناقتى الماتى قالاسىنىڭ بايىرعى تۇرعىنى، كينورەجيسسەر ەربول بورانشا ۇلى جەكە كىتاپحاناسىندا ساقتاعان ەكەن. اقىننىڭ شىمشىما ولەڭدەرىنەن قۇرالعان كىتاپ «وتىرىك» دەپ اتالادى. ءىلياس اقىن رەپرەسسيا قۇرىعىنا ىلىنگەن كەزدە كوپتەگەن كىتاپتارى مەن قولجازبالارى تاركىلەنىپ، جويىلعان بولاتىن. ال ەربول بورانشا ۇلىنىڭ جەكە مۇراعاتىنان تابىلعان بۇل ءتۇپنۇسقا جيناق جانسۇگىروۆ مۇراسىنا قوسىلعان ۇلەس قانا ەمەس، قازاق ادەبيەتى تاريحىنداعى ەلەۋلى وقيعا بولىپ وتىر.
قازىر تابىلعان كىتاپ تالدىقورعانداعى ءىلياس جانسۇگىروۆ اتىنداعى وبلىستىق ادەبي مۇراجايعا قويىلعان.
بۇل ءسۇيىنشى حاباردى اتالعان مۇراجاي مەڭگەرۋشىسى نۇرگۇل جاۋىنبايەۆا جەتىسۋ ۋنيۆەرسيتەتىندە وتكەن «جانسۇگىروۆ وقۋلارى» رەسپۋبليكالىق عىلىمي-پراكتيكالىق كونفەرەنسياسىندا حابارلادى.
- بۇل كىتاپ - بۇرىن-سوڭدى ەشكىمنىڭ قولىنا تۇسپەگەن ءتۇپنۇسقا. ءسۇيىنشى حاباردى جانسۇگىروۆ وقۋلارىنا ەلىمىزدىڭ تۇكپىر-تۇكپىرىنەن كەلگەن ءىلياس تانۋشى عالىمدار مەن ستۋدەنت جاستارعا جەتكىزىپ وتىرمىز.
كىتاپتى كورىپ كوزايىم بولۋدى ويلاعان جانداردى مۋزەيگە شاقىرامىن، - دەيدى ءىلياس جانسۇگىروۆ اتىنداعى وبلىستىق ادەبي مۇراجاي مەڭگەرۋشىسى نۇرگۇل جاۋىنبايەۆا.
ال ۋنيۆەرسيتەت قابىرعاسىندا ءداستۇرلى تۇردە وتەتىن عىلىمي كونفەرەنسيادا ءىلياس جانسۇگىروۆتىڭ ءومىرى مەن شىعارماشىلىعى جان-جاقتى تالقىلاندى.
اۆتور
قالماحانبەت مۇقامەتقالي