ءىلياس جانسۇگىر ۇلىنىڭ وقىرمان قولىنا جەتپەي قالعان شىعارمالارى جارىق كوردى

استانا. قازاقپارات - اقىننىڭ توتە جازۋمەن عانا جارىق كورگەن، ءبىراق كوپتىڭ قولىنا جەتپەگەن شىعارمالارى قازىرگى قازاق الىپپەسىنە اۋدارىلىپ وقىرمانعا جول تارتتى. الاش تانۋشى ەلدوس توقتارباي ءىلياس جانسۇگىر ۇلىنىڭ العاشقى كىتابىنىڭ اتىمەن اقىننىڭ بۇرىن جاريالانباعان شىعارمالارىن وقىرمان قاۋىممەن قاۋىشتىردى، دەپ حابارلادى turkystan.kz.

«ءىلياس جانسۇگىر ۇلى - مەنىڭ سۇيىكتى اقىنىم. ورەن جۇيرىكتىڭ 130 جىلدىعىنا وراي دەپ نەشە جىل ۇيقى كورمەي تۇنىمەن جۇمىس قىلىپ ەدىم، مىنە، سونىڭ ناتيجەسى رەتىندە العاشقى كىتاپ (بەتاشار. بۇرىن جاريالانباعان شىعارمالار) قولىما ءتيدى. اللاعا شۇكىر! ەندى، بۇيىرتسا، 4 كىتاپ باسىلىپ جاتىر… ءبارى ساتىمەن بولسىن! «بەتاشار» - اقىننىڭ العاشقى كىتابى (1927). سول العاشقى كىتابىنىڭ اتىمەن بۇرىن جاريالانباعان شىعارمالارىن قايتادان جيناقتاپ، وقىرمان نازارىنا ۇسىندىم. قابىل الىڭىزدار!»، - دەدى كىتاپتى قۇراستىرۋشى ەلدوس توقتارباي.

بۇل كىتاپقا ءىلياس جانسۇگىر ۇلىنىڭ «بەتاشار»، «وتىرىك»، «ساعاناق»، «بالالارعا بازارلىق»، «جاڭا جولدا»، «قۇل» ت. ب. ەڭبەكتەرى ەنگەن.

«وسى كىتابىمدى يلفا ءىلياس قىزىنىڭ رۋحىنا ارنادىم. اياۋلى اپامنىڭ رۋحى شات بولسىن! بۇل كىتاپقا پىكىر جازىپ، ءارقاشان مەنى قولداپ جۇرەتىن الاشتانۋ مەن ادەبيەتتانۋداعى قوس الىبىم، اياۋلى تۇرسىن قۇداكەلدى ۇلى مەن ايگۇل سەرىك قىزى ۇستازدارىما جانە دوسىم جاڭاگۇل شىڭعىسحان قىزىنا ريزاشىلىق ايتامىن» - دەدى الاشتانۋشى عالىم.

ايتا كەتەيىك، كىتاپ جەتىسۋ وبلىسى اكىمىنىڭ قولداۋىمەن جارىق كوردى.