قۇجاتقا سايكەس، 13-تامىزدان باستاپ مينيسترلىككە ءبىرقاتار جاڭا وكىلەتتىك بەرىلدى.
اتاپ ايتقاندا، مينيسترلىك قازاقستانداعى شەتەلدىك جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ ۇيىمدارى فيليالدارىنىڭ، حالىقارالىق جانە شەتەلدىك وقۋ ورىندارىنىڭ قىزمەت قاعيدالارى مەن ولاردىڭ ىنتىماقتاستىق نىساندارىن ازىرلەپ، بەكىتەدى.
سونداي-اق قازاقستان اۋماعىندا ءبىلىم بەرۋ جانە عىلىمي- زەرتتەۋ قىزمەتىن جۇزەگە اسىراتىن شەتەلدىك جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ فيليالدارى مەن شەتەلدىك وقۋ ورىندارىن تانۋ قاعيدالارىن ازىرلەپ، بەكىتۋ مينيسترلىكتىڭ قۇزىرەتىنە بەرىلدى.
بۇدان بولەك، ۆەدومستۆو دەنساۋلىق ساقتاۋ سالاسىنداعى ءبىلىم بەرۋ ۇيىمدارىنا وقۋعا قابىلداۋ قاعيدالارىن كەلىسەدى جانە مەملەكەتتىك قىزمەتشىلەردىڭ ەڭبەك ءتارتىبى قاعيدالارىن بەكىتەدى.
مينيسترلىك مەملەكەتتىك زاڭدى تۇلعالاردا باسقارۋ فۋنكتسيالارىن اتقارۋعا بايلانىستى لاۋازىمدارعا قويىلاتىن بىلىكتىلىك تالاپتارىن مەملەكەتتىك قىزمەت ىستەرى جونىندەگى ۋاكىلەتتى ورگانمەن كەلىسە وتىرىپ بەكىتەدى.
سونىمەن قاتار سەل، كوشكىن جانە قار كوشكىنى قاۋىپتەرى مەن تاۋەكەلدەرىنىڭ ءارتۇرلى ماسشتابتاعى كارتالارىن ازىرلەۋ جانە قولدانۋ قاعيدالارىن ازاماتتىق قورعاۋ سالاسىنداعى ۋاكىلەتتى ورگانمەن كەلىسە وتىرىپ ازىرلەپ، بەكىتەدى.
تاعى ءبىر جاڭا وكىلەتتىك عىلىم قالاسىن دامىتۋعا قاتىستى. مينيسترلىك ءتيىستى سالانىڭ ۋاكىلەتتى ورگانىمەن بىرلەسىپ، مۇددەلى مەملەكەتتىك ورگاندارمەن جانە ءتيىستى اكىمشىلىك-اۋماقتىق بىرلىكتىڭ جەرگىلىكتى اتقارۋشى ورگانىمەن كەلىسە وتىرىپ، عىلىم قالاسىن دامىتۋ ستراتەگياسىن ازىرلەيدى جانە كەلىسەدى. ستراتەگيادا عىلىم قالاسى قىزمەتىنىڭ باسىم عىلىمي باعىتتارى قامتىلادى.
25-تامىزدان باستاپ مينيسترلىكتىڭ وكىلەتتىگى تاعى كەڭەيەدى.
وسى كۇننەن باستاپ مينيسترلىك عىلىمي- زەرتتەۋ ينستيتۋتتارىنىڭ، جوعارى جانە (نەمەسە) جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ، سونداي-اق اككرەديتتەلگەن وزگە دە عىلىمي جانە (نەمەسە) عىلىمي-تەحنيكالىق قىزمەت سۋبەكتىلەرىنىڭ بيۋدجەت قاراجاتى ەسەبىنەن جۇرگىزىلەتىن عىلىمي زەرتتەۋلەر مەن عىلىمي جۇمىستارعا قاجەتتى تاۋارلاردى، جۇمىستار مەن كورسەتىلەتىن قىزمەتتەردى ساتىپ الۋ قاعيدالارىن ازىرلەپ، بەكىتەدى. بۇل قاعيدالار مەملەكەتتىك ساتىپ الۋ سالاسىنداعى ۋاكىلەتتى ورگانمەن كەلىسىلەدى.
سونداي-اق مەملەكەتتىك تاپسىرىس اياسىندا ساتىپ الىنعان عىلىمي جابدىقتاردى پايدالانۋ جانە ۇجىمدىق پايدالانۋداعى عىلىمي زەرتحانالار مەن اكادەميالىق ارتىقشىلىق ورتالىقتارىنا قول جەتكىزۋ قاعيدالارىن ازىرلەۋ جانە بەكىتۋ مينيسترلىككە جۇكتەلەدى.
ۆەدومستۆو عىلىم باعىتتارى جانە عىلىمي جانە (نەمەسە) عىلىمي-تەحنيكالىق قىزمەت ناتيجەلەرىن كوممەرسيالاندىرۋ بويىنشا ۇلتتىق عىلىمي كەڭەستەردىڭ تىزبەسىن ازىرلەپ، بەكىتەدى.
سونىمەن بىرگە عىلىم جانە عىلىمي-تەحنيكالىق قىزمەت سالاسىنداعى ۆەنچۋرلىك قارجىلاندىرۋ قاعيدالارىن، عىلىمي جانە عىلىمي-تەحنيكالىق جوبالار مەن باعدارلامالارعا سۇرالاتىن قارجىلاندىرۋ كولەمىنىڭ (قۇنىنىڭ) ەكونوميكالىق نەگىزدىلىگىن باعالاۋ ادىستەمەسىن ازىرلەپ، بەكىتەدى.
مينيسترلىك ۇلتتىق عىلىمي كەڭەستەر قاراعان عىلىمي جانە عىلىمي-تەحنيكالىق جوبالار مەن باعدارلامالاردىڭ ىسكە اسىرىلۋىنا جۇرگىزىلگەن مونيتورينگ قورىتىندىلارىن بەكىتەدى.
بۇدان بولەك، ۇلتتىق عىلىمي كەڭەستىڭ شەشىمىنە سايكەس عىلىمي جانە عىلىمي- تەحنيكالىق جوبالار مەن باعدارلامالاردى قارجىلاندىرۋ كولەمىن (قۇنىن) بەكىتۋ دە مينيسترلىكتىڭ قۇزىرەتىنە كىرەدى.
قۇجاتتا عىلىم قالاسى مەن عىلىمي-تەحنولوگيالىق پاركتەردى دامىتۋعا قاتىستى ءبىرقاتار وكىلەتتىك تە قاراستىرىلعان.
اتاپ ايتقاندا، مينيسترلىك عىلىم قالاسى مەن عىلىمي-تەحنولوگيالىق پاركتى دامىتۋ ستراتەگياسىنىڭ ىسكە اسىرىلۋىنا مونيتورينگ جۇرگىزەتىن تۇلعانى ايقىندايدى. سونداي-اق وسى ستراتەگيالاردىڭ ىسكە اسىرىلۋىنا مونيتورينگ جۇرگىزۋ قاعيدالارىن ازىرلەپ، بەكىتەدى.
ۆەدومستۆو عىلىم قالاسىنا قاتىسۋشىلاردىڭ ءتىزىلىمىن جۇرگىزۋ قاعيدالارىن ازىرلەيدى جانە بەكىتەدى. بۇعان قوسا، مۇددەلى مەملەكەتتىك ورگاندارمەن جانە ءتيىستى اكىمشىلىك-اۋماقتىق بىرلىكتىڭ جەرگىلىكتى اتقارۋشى ورگانىمەن كەلىسە وتىرىپ، عىلىم قالاسىنا قاتىسۋشىلارعا قويىلاتىن تالاپتاردى ازىرلەپ، بەكىتەدى.
عىلىم قالاسىنا قاتىسۋشىلاردى تىركەۋ قاعيدالارىن، تىركەۋ تۋرالى قۇجاتتى بەرۋ ءتارتىبى مەن ونىڭ نىسانىن ازىرلەۋ جانە بەكىتۋ دە مينيسترلىككە جۇكتەلەدى.
سونىمەن قاتار مينيسترلىك ءتيىستى سالانىڭ ۋاكىلەتتى ورگانىمەن بىرلەسىپ، عىلىمي-تەحنولوگيالىق پاركتى دامىتۋ ستراتەگياسىن ازىرلەيدى. وندا پاركتىڭ باسىم عىلىمي باعىتتارى قامتىلادى.
جاڭا وكىلەتتىكتەر قاتارىندا توتەنشە جاعدايلاردىڭ الدىن الۋ جونىندەگى تالاپتاردى ورىنداۋ دا بار.
بۇدان بولەك، مينيسترلىك ەرتە كاسىبي باعدارلاۋ اياسىندا تومەنگى لاۋازىمدارعا ورنالاسۋ ءۇشىن دايارلىقتان وتكەن قازاقستان ازاماتىنىڭ وقۋىن اياقتاعان كۇننەن باستاپ مەملەكەتتىك قىزمەتتە ءۇش جىل جۇمىس ىستەۋ ءتارتىبىن مەملەكەتتىك قىزمەت ىستەرى جونىندەگى ۋاكىلەتتى ورگانمەن كەلىسە وتىرىپ بەكىتەدى.
سونىمەن قاتار قاۋلىمەن عىلىم جانە جوعارى ءبىلىم مينيسترلىگى اپپاراتى باسشىسىنىڭ وكىلەتتىكتەرى بەلگىلەندى.
قاۋلى 13-تامىزدان باستاپ قولدانىسقا ەنگىزىلدى. قۇجاتتىڭ جەكەلەگەن نورمالارى 25-تامىزدان باستاپ كۇشىنە ەنەدى.
بۇعان دەيىن قازاقستاننىڭ ەڭبەك جانە حالىقتى الەۋمەتتىك قورعاۋ مينيسترلىگىنىڭ وكىلەتتىگى كەڭەيتىلگەن ەدى.