«ءولتىرىپ جاتىر»: اقتوبەلىك ايەلدىڭ حابارلاماسىنا ءمان بەرمەگەن ت ج د قىزمەتكەرى سوتتالدى

اقتوبە. KAZINFORM - اقتوبە وبلىستىق ت ج د داعدارىس جاعدايلارى باسقارماسى جەدەل كەزەكشىسىنىڭ كومەكشىسى ءتۇن ىشىندە «مەنى ءولتىرىپ جاتىر» دەگەن ايەلدىڭ سوزىنە ءمان بەرمەي، ەسكەرۋسىز قالدىرعانى ءۇشىن سوتتالدى. ول 2 جىلعا باس بوستاندىعىنان ايىرىلدى.

№2 اقتوبە قالالىق سوتىندا قىلمىستىق كودەكستىڭ «سالعىرتتىق» بابى بويىنشا ءىس قارالدى. ءىس ماتەريالىنا سۇيەنسەك، وبلىستىق ت ج د- ءنىڭ قىزمەتكەرى بيىل ماۋسىم ايىندا كەزەكشىلىكتە وتىرعان كەزدە 112 نومىرىنە حابارلاما تۇسەدى. وندا ءىز-ءتۇزسىز جوعالىپ كەتكەن ايەل «مەنى ءولتىرىپ جاتىر» دەپ ايتىپ، كومەك سۇراعان. ت ج د كەزەكشىسىنىڭ كومەكشىسى سول ءتۇنى قوڭىراۋ شالعان ادام كوپ بولعانىن، ايەلدىڭ ناقتى نە ايتقانىن ەستىمەگەنىن ايتىپ، كەشىرىم سۇرادى. ال، مەملەكەتتىك ايىپتاۋشى بولسا، وپەراتور حابارلاماعا ءمان بەرمەي، مەكەنجايدى سۇراۋمەن شەكتەلگەنىن ايتتى.

جابىرلەنۋشىنىڭ وكىلى سوتتالۋشىدان 300000 تەڭگە كولەمىندەگى ماتەريالدىق جانە 5000000 تەڭگە كولەمىندەگى مورالدىق شىعىنداردى ءوندىرۋ جونىندەگى ازاماتتىق تالاپ ارىز بەردى. ارادا مەدياتسيالىق كەلىسىم بولدى.

- سوت سوتتالۋشىنى قىلمىستىق كودەكستىڭ 371-بابىنىڭ 2-بولىگىمەن كىنالى دەپ تانىپ، 2 جىل مەرزىمگە باس بوستاندىعىنان ايىرۋ جازاسىن تاعايىندادى. ول مەملەكەتتىك قىزمەتتە جانە قۇقىق قورعاۋ ورگاندارىندا قىزمەت ەتۋ قۇقىعىنان 3 جىلعا ايىرىلدى. جابىرلەنۋشىنىڭ ازاماتتىق تالاپ ارىزى قاراۋسىز قالدىرىلدى. اقتوبە وبلىستىق توتەنشە جاعدايلار دەپارتامەنتى باستىعىنا ءتيىستى شارا قولدانۋ ءۇشىن سوت جەكە قاۋلى شىعاردى. سوتتىڭ ۇكىمى زاڭدى كۇشىنە ەنگەن جوق، - دەپ حابارلادى اقتوبە قالاسى №2 سوتىنىڭ باسپا ءسوز قىزمەتى.

ايتا كەتەيىك، اقتوبەدە 9-ماۋسىم كۇنى جوعالىپ كەتكەن ايەلدىڭ دەنەسى تابىلدى. ول 112 نومىرىنە قوڭىراۋ شالىپ، كومەك سۇراعان.

ەسكە سالساق، اقتوبەدە ت ج د قىزمەتكەرىنىڭ قوڭىراۋعا ءمان بەرمەي، جۇمىسىنا سالعىرت قاراۋى بۇعان دەيىن دە تىركەلدى. ول كەزدە اناسى مەن بالاسىن ءولتىرىپ كەتىپ، ءتىرى قالعان قىز كومەك سۇراعان بولاتىن.