ءتىلى جۇتاڭ، ءوز ويىن اشىق جەتكىزە المايتىن بالالاردىڭ كوپتىگى كىتاپ وقىماعاندىقتىڭ سالدارى - كىتاپحاناشى
بىلتىردان باستاپ 24-قازان ەلىمىزدە كىتاپحاناشى كۇنى بولىپ بەكىتىلدى. رۋحانيات وشاعىندا ماڭداي تەرىن توگىپ جۇرگەن بۇل ماماندىق يەلەرى كوپ جاعدايدا كولەڭكەدە قالىپ قويىپ جاتادى. ال وسكەلەڭ ۇرپاقتى وتانسۇيگىشتىككە تاربيەلەپ، كىتاپ وقۋعا باۋليتىن ولاردىڭ ەڭبەكتەرى ۇشان- تەڭىز.
وسىناۋ مەرەكەگە وراي Kazinform اگەنتتىگىنىڭ ءتىلشىسى وسكەمەندەگى و. بوكەي اتىنداعى قالالىق كىتاپحانادا جەمىستى جۇمىس ىستەپ جۇرگەن جاس كىتاپحاناشى تاڭنۇر باشايدى اڭگىمەگە تارتىپ كورگەن ەدى.
- قازىر كىتاپحاناشى ماماندىعىنا بەت بۇراتىن جاستار از سەكىلدى. الدە مەن قاتەلەسەمىن بە؟ جالپى ءوزىڭىز وسى ماماندىق يەسى اتانعانىڭىزعا قانشا ۋاقىت بولدى؟
- مەنىڭ نەگىزگى ماماندىعىم - جۋرناليست. 2019 -جىلى س. امانجولوۆ اتىنداعى شىعىس قازاقستان ۋنيۆەرسيتەتىن «جۋرناليستيكا» ماماندىعىنا بويىنشا ءتامامدادىم. سوندا 4-كۋرس وقىپ جۇرگەندە ديپلومدىق جۇمىسىمدى جازۋ ءۇشىن تالاي كىتاپحاناعا بارىپ كورگەن ەدىم. ونىڭ ىشىندە و. بوكەي اتىنداعى قالالىق كىتاپحانا ءوزىم ءۇشىن وتە جايلى، ىڭعايلى بولدى. سەبەبى وندا كەلۋشىلەر ءۇشىن بارلىق مۇمكىندىك جاسالعان ەكەن. ديپلومدىق جۇمىسىمدى اياقتاعانعا دەيىن كىتاپحانانى عانا ەمەس، كىتاپحاناشى ماماندىعىنىڭ دا قىر-سىرىن ءبىلىپ قالدىم. ءسويتىپ قىزىعۋشىلىعىم ارتىپ، وسىندا جۇمىسقا تۇرۋدى ۇيعاردىم.
نەگىزىنەن مەكتەپ كەزىندە دە كىتاپقا جاقىن بولدىم. قازاقتىڭ كلاسسيك جازۋشىلارىنىڭ تۋىندىلارىن وقىعاندى جاقسى كورەتىنمىن. ونىڭ ىشىندە سۇيىكتى شىعارمالارىم - جۇسىپبەك ايماۋىتوۆتىڭ «اقبىلەگى»، عابيت مۇسىرەپوۆتىڭ «ۇلپانى»، ءسابيت مۇقانوۆتىڭ «بوتاكوزى»، ءازىلحان نۇرشايىقوۆتىڭ «ماحاببات قىزىق مول جىلدارى».
ءيا، قازىر كىتاپحاناعا جۇمىسقا كەلەتىن جاستار از. سەبەبى كوبىسى كىتاپحانانى ءالى دە كىتاپ بەرەتىن جەر رەتىندە عانا ەلەستەتەدى. ءبىراق شىندىعىنا كەلگەندە مۇندا تىرشىلىك قىج-قىج قايناپ جاتىر. ەگەر مۇعالىم نەمەسە جۋرناليست ماماندىعىن بىتىرسەڭ، بۇل ساعان ۇلكەن ومىرگە قادام باسار الدىنداعى تاعىلىمى مول مەكتەپ ەكەنىنە كوزىم انىق جەتتى.
- قازىرگى زامانداعى كىتاپحانا قانداي بولۋى كەرەك؟
- كىتاپحانا وقىرمان ءۇشىن تۇگەل مۇمكىندىكتى جاساپ بەرۋى ءتيىس. ياعني، وسىندا كەلگەن ادام كۇيبەڭ تىرشىلىكتىڭ تاۋسىلمايتىن تۇيتكىلدەرىن ءبىر ساتكە ۇمىتىپ، تازا بىلىمگە، عىلىمعا بەت قويا الۋى قاجەت. ول ءۇشىن رۋحانيات وشاعىندا قاجەتتى كىتاپتار، باسىلىمدار، زاماناۋي تەحنولوگيالار بولۋى كەرەك. ماسەلەن، ءبىزدىڭ كىتاپحانادا مۋلتفيلم جاسايتىن مۋلتستۋديا، ادامدى سيفرلى الەمگە اپاراتىن VR-كوزىلدىرىك بار، بىرنەشە ءتىلدى ۇيرەتەتىن تەگىن كۋرستار، ءتۇرلى ۇيىرمەلەر جۇمىس ىستەپ تۇر. ونىڭ ءبارى تەگىن. كەيدە «ءبىز مەكتەپتە وقىپ جۇرگەندە وسىنداي مۇمكىندىكتەردىڭ بولماعانىن قاراشى» دەپ قىنجىلاسىڭ.
- و. بوكەي كىتاپحاناسىنىڭ باسقا كىتاپحانالاردان ايىرماشىلىعى مەن ارتىقشىلىقتارى قانداي؟
- بۇل سۇراققا مەن وسى كىتاپحانانىڭ قىزمەتكەرى ەمەس، وقىرمان رەتىندە جاۋاپ بەرگىم كەلەدى. كىتاپحانا بۇگىنگى جاستار تاۋەلدى بولعان تەحنولوگيالاردى ولاردىڭ يگىلىگى ءۇشىن پايدالانۋدا. بالالاردى ويناتىپ ءجۇرىپ كىتاپ وقۋعا باۋلۋعا، ۇلتتىق سالت-ءداستۇرىمىزدى دارىپتەۋگە تىرىسۋدا. كىتاپحانا ديرەكتورى حابيبا مىرزاحان قىزىنىڭ «ءاربىر وقىرماندى قۇدالارىڭ كەلگەندەي قارسى الىڭدار» دەگەنى بار. رۋحانيات وشاعىنىڭ باستى ۇستانىمى وسى.
- بۇگىنگى جاستار كىتاپ وقي ما؟
- كوپكە توپىراق شاشۋدان اۋلاقپىن. كىتاپ وقيتىن جاستار بار. جاڭا كىتاپتاردى توسىپ، ءوزىن قىزىقتىرعان تاقىرىپتاعى تۋىندىلاردى اسىعا قولعا الاتىنداردى تالاي بايقاپ ءجۇرمىز. ولاردى كورىپ قۋاناسىڭ. ءبىراق كىتاپتىڭ بەتىن دە اشپايتىندار بارشىلىق. ءتىلى جۇتاڭ، ءوز ويىن اشىق جەتكىزە المايتىن بالالاردىڭ كوپتىگى وسى كىتاپ وقىماعاندىقتىڭ سالدارى دەپ ويلايمىن.
- جاستاردى كىتاپ وقۋعا باۋلۋ ءۇشىن نە ىستەۋىمىز كەرەك؟
- ولارعا كوپ كىتاپ وقىعان ادامنىڭ قانداي بولاتىنىن كورسەتۋىمىز قاجەت. كىمنىڭ ءتىل بايلىعى مول، ءار ءسوزى ورنىنا قاعىلعان شەگەدەي، وزىق ويلى جان بولعىسى كەلمەيدى دەيسىڭ؟ ءبىراق سول ءۇشىن كىتاپپەن دوس بولىپ، مول ەڭبەكتەنۋ كەرەك.
- كىتاپحاناشى كۇنىنىڭ ماڭىزدىلىعى نەدە، بۇل مەرەكەنى قالاي اتاپ وتكەن ءجون دەپ ويلايسىز؟
- بۇل مەرەكەنىڭ ماڭىزى زور. كىتاپحانا - رۋحاني ورتالىق، ال كىتاپحاناشى - وقىرمان مەن كىتاپ اراسىنداعى التىن كوپىر. جاستارىمىز التىن ۋاقىتىن تەلەفونعا تەلمىرىپ وتكىزبەسە ەكەن دەپ دامىل كورمەي ەڭبەكتەنىپ جۇرگەن بۇل ماماندىق يەلەرىنە لايىقتى قۇرمەت كورسەتىلسە ەكەن دەيمىز. مەملەكەت تاراپىنان كىتاپحانا ىسىنە كوبىرەك كوڭىل بولىنسە دەگەن تىلەگىمىز بار. بۇل مەرەكەدە تەك كىتاپحاناشىلار ءبىر- ءبىرىن قۇتتىقتاپ وتىرماي، رەسپۋبليكالىق دەڭگەيدەگى شارالار وتكىزىلسە نۇر ۇستىنە نۇر بولار ەدى. وسى سالادا تالاي جىل تەر توككەن جاندار ماراپاتتالسا جاستارعا دا شابىت بەرىپ، جۇمىسقا دەگەن ىنتالارىن ارتتىرار ەدى.
- اڭگىمەڭىزگە كوپ راحمەت!
اۆتور
تالعاتجان مۇحامەتبەك ۇلى