ءتورت تۇلىكتىڭ تاماشا قاسيەتتەرى

استانا. قازاقپارات - ءتورت تۇلىك مالدىڭ ءبىر-بىرىنە ادالدىعى، مەيىرباندىعى، دوستىعى، تەكتىلىگى ادام بالاسىن تاڭ قالدىرماي قويمايدى.

الپاۋىت بۇقا، اتان وگىز، سۇزەگەن سيىر بولسىن ەنەسى قانشا قوراش، ءالسىز بولسا دا، وعان بەتتەمەي جاسقانادى. ءتىپتى قانشا اش، ىزالى بولسا دا، الدىنداعى جەم-ءشوبىن ەنەسىنە تاستاپ، تايىپ تۇرادى. (اتا-انانى سىيلاۋ - مەيلى قانداي ساتتە دە مويىنداعى پارىز عوي)

بوتالى ىنگەن بوزداپ، كوزىنەن جاس اعىپ تۇرعان قانداي دا ءبىر بوتانى كورسە ەمىزە بەرەدى. (ولاردا مەيىر-شاپاعات تۋىستىقپەن ولشەنبەيدى. ادام بالاسىنىڭ ءبارىن ءسۇي)

ال قوي بولسا تەك باستاۋشىسىنا عانا ەرەدى. قوي باستاعان سەركە وتقا تۇسسە دە قورالى قوي ەش تايىنبايدى. (باستاۋشىسىن ءوزى ولتىرگەن كەي ەلدەر قازىر سوعىس ءورتىنىڭ ىشىندە)

وگىز اۋىر جۇكتى ەڭىستەن ورگە قاراي وڭاي الىپ جۇرەدى. (شىنايى تالانت سولاي بولۋى كەرەك ەدى)

ەشكى تۇلىگىن بەس كۇن ەرىنبەي تاڭەرتەڭ ورگىزىپ كەشكە قوراعا اكەلىپ قاماڭىز. ودان كەيىنگى كۇندەردە يەسىنسىز-اق وسى ادەتتى قايتالاي بەرەدى. (ال مىڭ كۇن تاربيەلەسەڭ دە تۇزەلمەيتىن پەندەلەر جەتەدى)

كۇيەك كەزىندە ساۋلىقتاردىڭ كوبى قوشقارلاردىڭ ىشىندەگى بىرەۋىنە «عاشىق» بولىپ، باسقا قوشقارلاردىڭ «قىزعانىشىن» قوزدىرىپ الادى. (ەندى بۇعان امال جوق....)

ەگىز تولدەر ەنەسىنەن بۇرىن ءبىر-ءبىرىن ىزدەپ تاۋىپ الادى. (عۇمىر-باقي باۋىرلارىن ىزدەمەيتىندەردى قايتەيىك)

جىلقى تۇلىگى كوبىندە ەكى-ەكىدەن دوستاسىپ الا قويادى. ءارى «دوستارىن» استە ۇمىتپايدى. سان جىلدان كەيىن كەزدەسسە دە، وقىرانىپ، قاسىنىسا كەتەدى. (باتىر بابالارىمىزدىڭ جىلقىدان وزگە دوسى جوق بولعان دەگەنگە مەن قاتتى سەنەم وسىندايدا)

دايىنداعان: الشىن ماتاي