ءتورت اتاسىنان بەرى شاڭعى جاسايتىن التاي قازاعى: شاڭعى - سپورت ءتۇرى عانا ەمەس، كولىك قۇرالى بولعان
شاڭعىنىڭ ەڭ كونە مەكەنى - التاي. وسى ايماقتا تۇراتىن قازاق حالقى بايىرعى ونەردى اتادان بالاعا مۇرا ەتىپ كەلەدى. سونداي كاسىپ يەلەرىنىڭ ءبىرى 70 جاستاعى سلامبەك ساعىش ۇلى Kazinform تىلشىسىنە قار شاڭعىسىنىڭ ءارى سپورت، ءارى كولىك رەتىندەگى ەرەكشەلىگى جايلى ايتىپ بەردى.
سلامبەك ساعىش ۇلى التاي عانا ەمەس، الىس- جاقىن شەتەلگە دە شاڭعى جاسايتىن شەبەر رەتىندە تانىمال. شاڭعى تەبەتىندەر مىڭداعان شاقىرىمدى ارتقا تاستاپ، ارنايى كەلىپ تاپسىرىس بەرەدى.
«بايىرعى قار شاڭعىسىن جاسايتىن وتباسىنىڭ وكىلىمىن. ياعني، ءتورتىنشى ۇرپاعىمىن. بۇل ونەردى اكەمنىڭ جانىندا ءجۇرىپ ۇيرەندىم. ءوز بەتىمشە العاشقى قار شاڭعىسىن 17 جاسىمدا جاسادىم. سودان بەرى وتباسىلىق كاسىبىمىزگە اينالدى. وسىدان 20 جىل بۇرىن شەبەرحانا اشتىم. مۇندا جابدىق جاساپ قانا قويماي، شاكىرت تە تاربيەلەيمىن. بۇل اتا كاسىپتى دارىپتەپ، دامىتۋ كەرەك دەپ ويلايمىن. ءوزىمنىڭ ەكى ۇلىم بار. ولاردى دا وسىعان باۋلىدىم»، - دەيدى ول.
ايتۋىنشا، شاڭعى تازا تابيعي ونىمنەن عانا جاسالادى. سونىسىمەن قۇندى ءارى ەرەكشە.
«جىلقى تەرىسىمەن قاپتالعان قار شاڭعىسى سامىرسىن مەن قايىڭنان جاسالادى. ونىڭ وڭايلىقپەن سىنا قويمايتىن مىقتىلىعى وسىدان. تاعى ءبىر ايتا كەتەتىن جايت، قار شاڭعىنى تەك التايلىقتار عانا جاساي الادى. ونىڭ ولشەمى ادام بويىنان ءبىر قارىس ۇزىن، ەنى ەكى ەلى بولادى»، - دەپ ءتۇسىندىردى شەبەر.
سلامبەك ساعىش ۇلى التاي - تاۋلى، قىراتتى، قىسى ۇزاق ايماق ەكەنىن تىلگە تيەك ەتتى.
«بۇل ايماقتى مەكەندەگەن حالىق ءۇشىن شاڭعى - سپورت ءتۇرى عانا ەمەس، قارىم-قاتىناس قۇرالى بولعان. بۇرىندارى تەحنيكا دامىماي تۇرعان زاماندا قالىڭ قار ادام تۇگىلى جانۋارلاردىڭ دا ارى-بەرى جۇرۋىنە كەدەرگى جاساعان. سوندىقتان التايلىقتار شاڭعىنى پايدالانعان. قازىردىڭ وزىندە سۇرانىس جوعارى. جىلىنا 50-گە جۋىق شاڭعىعا تاپسىرىس الامىز. قۇنى - 1000 يۋان (68-70 مىڭ تەڭگە)»، - دەيدى شەبەر.
ايتا كەتەيىك، بيىل «ءبىر بەلدەۋ، ءبىر جول» قازاق-قىتاي بىرلەسكەن باستاماسىنا - 10 جىل.
وسىعان وراي قىتاي ەلى ورتالىق ازيا مەملەكەتتەرىنىڭ ب ا ق وكىلدەرىنە باسپا ءسوز تۋرىن ۇيىمداستىردى.
اۆتور
الما مۇقانوۆا