ءتول اتاۋدان جيرەنگەنى قالاي: فەدەراتسيا توعىزقۇمالاقتىڭ اتىن اۋىستىرۋعا قارسى شىقتى

استانا. KAZINFORM - كەشەگى دەپۋتات ۇسىنىسىنان كەيىن قازاقستان توعىزقۇمالاق فەدەراتسياسى مالىمدەمە جاسادى. ەسكە سالا كەتەيىك، كەشە ءماجىلىس دەپۋتاتى گۇلدارا نۇرىموۆا توعىزقۇمالاق ويىنىنىڭ اتاۋىن ءبىر ىزگە كەلتىرۋ ءۇشىن توعىزات دەپ اتاۋدى ۇسىنىپ، ۇكىمەتكە ساۋال جولداعان بولاتىن.

ونىڭ ايتۋىنشا، بۇگىندە بۇل ويىننىڭ نەگىزگى ەكى اتاۋى ورنىعىپ وتىر: قازاقشا - توعىزقۇمالاق، قىرعىزشا - توعىزكورگول. ءىشىنارا تۇرىكشە مانگالا/گەچيۋرمە اتالادى.

قازاقستان تاراپى حالىقارالىق جارىس وتكىزگەندە ويىننىڭ اتى «توعىزقۇمالاق» اتالادى دا، قىرعىزستان جاعى جارىس ۇيىمداستىرعاندا بۇل ويىن «توعىزكورگول» بولىپ شىعا كەلەدى.

«عالىمدار مەن زەرتتەۋشىلەردىڭ پىكىرىنشە، بۇل ويىننىڭ جالپىتۇركىلىك اتاۋى بار، ول - توعىزات. ەتنوگراف گ. زاگرياجسكيدىڭ ەڭبەگىنەن ويىننىڭ اتاۋى XIX عاسىردا توعىزات اتالعانى ءمالىم بولىپ وتىر. وسى دەرەكتەردى ەسكەرە وتىرىپ، الداعى V دۇنيەجۇزىلىك كوشپەندىلەر ويىنىنا دەيىن جالپىتۇركىلىك بۇل زياتكەرلىك سپورتتىڭ اتاۋىن ورتاق نۇسقامەن توعىزات اتاۋىن قالىپتاستىرۋ شارالارىن قولعا الۋدى ۇسىنامىز»، - دەدى ءماجىلىس دەپۋتاتى.

وسىعان وراي ءتيىستى فەدەراتسيا باسشىسى ءاليحان بايمەنوۆ ءۇنسىز قالمادى.

ونىڭ ايتۋىنشا، عاسىرلار بويى حالىق پايدالانىپ كەلگەن ءتول اتاۋدان جيرەنۋ، قاسيەتتى ۇعىمدارعا نەمقۇرايلى قاراۋ - ۇلتتىق قۇندىلىقتار اياسىندا قوعامدى ۇيىستىرۋعا باستامايتىن ءىس ەكەنى ءسوزسىز.

«كوزىقاراقتى كەز كەلگەن ادام «بۇلار باسقانى قويعاندا ابايدى تانىماي، اۋەزوۆتى وقىماعاندار ما؟» دەپ قايران قالعان شىعار. باستاماشىلاردىڭ كىمدى وقيتىنىن بىلمەيمىز، ءبىراق قاعيدالى اقيقاتتى تۇسىنبەيتىنى انىق. توعىزقۇمالاق - ۇلتتىڭ مىڭجىلدىق تاريحى بار زياتكەرلىك ويىنى. يۋنەسكو ونى ادامزاتتىڭ مادەني مۇراسى دەپ 2020 -جىلى مويىنداعان. توعىزقۇمالاق ۇلتىمىزدىڭ الەمدىك مادەنيەتكە قوسقان ۇلەسىنىڭ جارقىن ۇلگىسى بولىپ تابىلادى. سىرتتان كەلگەن بىرەر ادام ءتۇرلى پيعىلمەن اتاۋىن بۇرمالاسا - ونداي ءتاسىلدى ءبىزدىڭ مادەنيەت پەن تاريحي جادىمىزعا قارسى سىرتقى كۇشتەر تالاي قولدانعانىن تاريحتان دا بىلەمىز. تاريحي، عىلىمي دەرەككوزدەردە، كوركەم جانە اۋىز ادەبيەتىندە، ۇلتتىڭ جادىندا ويىن تەك توعىزقۇمالاق دەپ اتالادى» دەپ كەلتىرەدى ءاليحان بايمەنوۆتىڭ ءسوزىن فەدەراتسيانىڭ باسپا ءسوز قىزمەتى.

ونىڭ ايتۋىنشا، ۇلتتىق ويىننىڭ اتاۋى - پارلامەنتكە دە، ۇكىمەتكە دە، توعىزقۇمالاق فەدەراتسياسىنا دا تيەسىلى ەمەس. ول ەش ادامنىڭ نە ۇيىمنىڭ مەنشىگىنە جاتپايدى.

ويىننىڭ دا، ونىڭ اتاۋىنىڭ دا يەسى - قازاق حالقى.

«ءبىزدىڭ پەرزەنتتىك پارىزىمىز - توعىزقۇمالاقتى دامىتىپ، قاناتىن كەڭگە جايۋ. قازىر الەمنىڭ 50 استام ەلىندە توعىزقۇمالاق كوزبە-كوز وينالسا، ينتەرنەت ارقىلى 100 مەملەكەت تۇرعىندارى ءتۇرلى سايىستارعا قاتىسۋدا. 6 الەم چەمپيوناتى 25-30 ەل وكىلدەرىنىڭ قاتىسۋىمەن ءوتتى. جاھانعا تانىمال زياتكەرلىك ويىندار سايتتارىندا توعىزقۇمالاق كوشباسشى ورىندا. قازاقستاندا 210 مىڭ ادام ءتۇرلى دەڭگەيدە تۇراقتى شۇعىلدانىپ ءجۇر. مۇنىڭ ءبارى - ارداگەرلەر، جاتتىقتىرۋشىلار، ويىنشىلار، ولاردى دەمەپ، قولداپ جۇرگەن فەدەراتسيا، توعىزقۇمالاق قايراتكەرلەرى، كاسىپكەرلەر، تۋريزم جانە سپورت مينيسترلىگى مەن جەرگىلىكتى اكىمدىكتەر، ءماسليحات دەپۋتاتتارىنىڭ بىرلەسە اتقارىپ جۇرگەن ءىسىنىڭ جەمىسى. پرەزيدەنت قاسىم-جومارت توقايەۆتىڭ 2022 -جىلى توعىزقۇمالاقتى دامىتۋعا نازار اۋدارۋى ورتاق ىسكە سونى سەرپىن بەردى. ءبىز ءارى قاراي دا ۇلتتىق مۇرانى ناسيحاتتاپ، دارىپتەپ، كەڭىرەك تارالۋىنا جۇمىس جاسايمىز. پەرزەنتتىك پارىزىمىزدى اتقارۋعا ەشكىم كەدەرگى بولا المايدى. قازاق باردا توعىزقۇمالاق دامي بەرمەك. ۇلت الدىندا زور مىندەتتەر تۇر. ازامات رەتىندە ەل دامۋىنىڭ وزەكتى ماسەلەلەرى بويىنشا جوعارى مىنبەرلەردەن كەلەلى وي ايتىلعانىن قالايمىز. پىكىر الۋاندىعىن سىيلاي وتىرىپ، قاسيەتتى قۇندىلىقتارمەن ويناۋعا بولمايتىنىن مالىمدەيمىز»، - دەيدى قازاقستان جانە دۇنيەجۇزى توعىزقۇمالاق فەدەراتسيالارىنىڭ پرەزيدەنتى ءاليحان بايمەنوۆ.

اۆتور

جانات قاپالبايەۆا