ءسىزدى جۇمىسسىز قالدىراتىن 10 سەبەپ

استانا. قازاقپارات - جۇمىس بەرۋشى الدىنا ءار تۇرلى ادامدار كەلەتىندىكتەن، ادامداردى ءسوزسىز تۇسىنەتىن مامانعا اينالادى. ياعني، ادامداردى كەڭسەگە كىرگەن ساتتەن باستاپ باقىلاۋعا الىپ، ىم-يشارالارىنان ءتۇرلى سيگنالدار قابىلدايدى.

ادام بالاسى ول ىم-يشيرالاردى باسقارا المايتىندىقتان، ايتىلعان سوزگە قاراعاندا الدەقايدا سەنىمدىرەك، - دەيدى «العاشقى كەزدەسۋدە جاقسى اسەر قالدىرۋ: ىم-يشارا ءتىلى جانە حاريزما» كىتابىنىڭ اۆتورى پاتتي ۆۋد.

تۇسىنە بىلگەن ادامعا قيمىل-قوزعالىستار سوزگە قاراعاندا جىلدام مالىمەت بەرەدى. نازارلارىڭىزعا ءسىزدى جۇمىسسىز قالدىرۋى مۇمكىن 10 قاتە قيمىل-قوزعالىستى ۇسىنامىز:

1. ءالسىز قول الىسۋ

جۇمىسقا الۋشى كىرگەن ساتىڭىزدە قولىن ۇسىنسا، كوزىنە تىك قاراپ، كۇلىمسىرەڭىز. ارتىنشا قولىن الىڭىز. قول الىسۋ قاتتى ەمەس، اقىرىن ەمەس، ورتاشا بولۋى ءتيىس.

«ءسىزدىڭ قولىڭىزدى العان ادام قانشالىقتى مىقتى ەكەندىگىڭىزدى ءتۇسىنۋى كەرەك. الايدا ارتىق كەتىپ قولىن «سىندىرىپ» جىبەرمەڭىز. قول الىسقاندا ءبىر-بىرىنە تيگەن الاقاندار جاقسى اسەر قالدىرادى. سول سەبەپتى جۇمىس بەرۋشىنىڭ قولىن العاندا بارلىق بەس ساۋساعى سياتىنداي ەتىپ، ءوزى قالاي قىسسا، ءدال سولاي قىسىڭىز»، - دەيدى وسى سالانىڭ مامانى پاتتي ۆۋد. ءار ەلدە ءتۇرلى كورىنىس تاباتىن قول الىسۋدىڭ مادەنيەتىن دە ەسكەرگەنىمىز ءجون.

2. جەكە كەڭىستىككە باسىپ كىرۋ

جۇمىس بەرۋشىنىڭ جەكە كەڭىستىگىنە قۇرمەتپەن قاراڭىز. تىم جاقىنداپ، قۇشاقتاۋدىڭ قاجەتى جوق. (كەيبىر ادامدار جۇمىس بەرۋشىنى جۇمىس بەرگەن جاعدايدا قۋانىشتان قۇشاقتاپ الۋى مۇمكىن).

3. قولداردى ايقاستىرۋ

قولىڭىزدى ايقاستىرىپ وتىرۋ ارقىلى جاعىمسىز اسەر الىپ، ءبىر نارسەدەن قورعانىپ وتىرعانىڭىزدى بىلدىرەسىز. ونىڭ ورنىنا قولدارىڭىزدى قوزعالتىپ وتىرىڭىز. وسى ارەكەتىڭىزدىڭ ارقاسىندا ەنەرگياعا تولى ءارى ەكسپرەسسيۆتى ادام ەكەنىڭىزدى كورسەتەسىز. ىم-يشارالاردىڭ ارقاسىندا ميىمىز اقپاراتتاردى جىلدام قابىلداپ، داۋىسىمىزدىڭ ىرعاعى وزگەرەدى.

4. شاشتى تۇرتپەكتەۋ ادەتى

«بۇل كۇيزەلىسكە تاپ بولىپ، سودان شىعۋدىڭ جولىن تابا الماي وتىرعاندىعىڭىزدى كورسەتەدى. بۇنداي بالا قىلىقتارمەن جۇمىس بەرۋشىنى مەزى ەتىپ الۋىڭىز مۇمكىن»، - دەيدى پاتتي.

5. ورىندىققا بۇكىرەيىپ نەمەسە قيسىق وتىرۋ

تىك وتىرىڭىز. باسقاشا وتىرۋىڭىز ارقىلى ءوزىڭىزدىڭ سەنىمسىز نەمەسە ۇيالشاق ادام ەكەندىگىڭىزدى بىلدىرەسىز. مۇنىمەن قاتار، باسقاشا وتىرۋىڭىز قارسى بەتتە وتىرعان ادامعا سىزگە دەگەن سەنىمسىزدىك ۇيالاتادى.

6. كوز-كوزبەن كوز تۇيىسكەندە جالتاقتاۋ

«جۇمىسقا تۇرۋشى جان-جاققا قاراپ تۇرىپ ءسوز سويلەسە ەشتەڭە ەتپەيدى. بۇنى دۇرىس ارەكەت دەپ قابىلداعان ءجون. الايدا جۇمىس بەرۋشى سويلەگەن كەزدە ونىڭ كوزىنە تىك ءارى مۇقيات قاراۋ كەرەك. كوزبەن كوزدى ءتۇيىستىرۋدى بايلانىس ورناتۋدىڭ قۇرالى دەپ قاراڭىز»، - دەيدى پاتتي ۆۋد.

7. مەنىڭ بۇل ىسكە قاتىسىم جوق

«ەكسپرەسسيۆتى تۇر جاساي بىلگەنىڭىز وزىڭىزگە جاقسى. بۇل باسقالارىنا قاراعاندا تارتىمدىراق كورىنەدى. الايدا بەتتىڭ قيمىل-قوزعالىسىن ۇنەمى باقىلاۋدا ۇستاعان ءجون. ساعات، ۇيالى تەلەفون سەكىلدىلەرگە ۇنەمى قاراي بەرەتىن بولساڭىز، اينالاڭىزداعىلارعا جاعىمسىز اسەر تۋدىرىپ، بۇل ىسكە ەشقاندايدا قاتىسىڭىز جوق ەكەندىگىن بايقاتاسىز.

8. كۇلمەۋ

جۇزىڭىزدە كۇلكىنىڭ جوقتىعى جۇيكەسى توزعان، ومىرگە دەگەن قىزىعۋشىلىعى تومەن، جىلدام ءتىل تابىسىپ كەتە المايتىن ادام ەكەنىڭىزدى بىلدىرەدى. ۇنەمى كۇلىمسىرەپ جۇرۋگە تىرىسىڭىز، الايدا بارلىعى شىنايى بولۋ كەرەكتىگىن دە ۇمىتپاڭىز.

9. مازاسىزدانۋ

تىرناعىڭىزدى تىستەپ، بەتىڭىزدى تۇرتپەكتەپ، قالتاڭىزداعى مايدا تيىنداردى سىڭعىرلاتپاڭىز. ءسىزدىڭ مازاسىز ادام ەكەندىگىڭىزدى اشكەرەلەپ، وزگەلەردىڭ كوڭىلىن بولەدى.

10. ۇستەل استىنداعى قولدار

قولدارىڭىزدىڭ ۇستىنە وتىرىپ نەمەسە تىزەلەرىڭىزدىڭ ورتاسىنا جاسىرىپ قويۋدىڭ قاجەتى جوق. ورنىنا جيهازدىڭ جيەگىنە، ۇستەلدىڭ ۇستىنە قويىڭىز نەمەسە ىم-يشارا بەلگىلەرىن كورسەتىپ وتىرىڭىز. جۇمىسقا الۋشى قولىڭىزعا قاراپ ءسىزدىڭ قانشالىقتى ادال جان ەكەنىڭىزدى بىردەن ايتىپ بەرە الادى.

دايىنداعان: قارلىعا بۇيەنباي

massaget.kz