ءسان-سالتانات سالىعىنىڭ ەرەجەلەرى ءالى قارالىپ جاتىر - قارجى ۆيتسە-ءمينيسترى
استانا. KAZINFORM - قارجى ۆيتسە-ءمينيسترى ەرجان ءبىرجانوۆ جاڭا سالىق كودەكسى پارلامەنت قاراۋىنا قاشان ەنگىزىلەتىنىن ناقتىلادى. سونىمەن قاتار، ول ءسان-سالتانات سالىعىنىڭ قاعيدالارىنا قاتىستى پىكىر ءبىلدىردى.
«جوسپار بويىنشا جۇمىس توبى قۇجاتتى دايىنداپ، 15-مامىرعا دەيىن پارلامەنتكە ەنگىزۋى كەرەك»، - دەدى ە. ءبىرجانوۆ سەناتتا تىلشىلەر سۇراعىنا جاۋاپ بەرە وتىرىپ.
ونىڭ ايتۋىنشا، ءسان-سالتانات سالىعىنىڭ قاعيدالارىن تالقىلاۋ ءارى اياقتالمادى.
«ءسان-سالتانات سالىعى جاڭا سالىق كودەكسى اياسىندا دايىندالىپ جاتىر. وسى ءسان-سالتانات سالىعى بويىنشا ناقتى ءبىر ەرەجەلەر ايقىندالدى دەگەن شەشىم جوق، سەبەبى ونىڭ ءبارى جاڭا كودەكسپەن بىرگە ەنگىزىلەدى»، - دەدى ۆيتسە-مينيستر.
ونىڭ سوزىنە قاراعاندا، قازىر اتالعان ءسان-سالتانات سالىعىنىڭ نورمالارىن تالقىلاۋ كەزىندە قانداي دا ءبىر قارسىلىق كەزدەسپەگەن.
«قازىر ۇشاقتار، ياحتالار جانە قىمبات جەكە تۇرعىن ۇيلەرگە قاتىستى ماسەلەلەر قارالىپ جاتىر»، - دەدى ەرجان ءبىرجانوۆ.
بۇدان بۇرىن حابارلانعانداي، 7-قاڭتاردا وتكەن ۇكىمەتتىڭ كەڭەيتىلگەن وتىرىسىندا مەملەكەت باسشىسى قاسىم-جومارت توقايەۆ جاڭا سالىق كودەكسىن ازىرلەۋ بارىسىنا كوڭىلى تولمايتىنىن ايتتى.
وسىعان دەيىن ءسان-سالتانات سالىعى بايلىققا ەمەس، اسىرا بايلىققا سالىناتىنى ايتىلعان ەدى.
اۆتور
رۋسلان عابباسوۆ