«بارلىق كۇش كوروناۆيرۋستىق ينفەكتسيامەن كۇرەسكە جۇمىلدىرىلعان. ءبىرىنشى باسىمدىق - حالىقتى قورعاۋ. ول ءۇشىن قالاداعى بارلىق سالا تارتىلدى. ەڭ الدىمەن ءبىزدىڭ دارىگەرلەر، ەمحانالار مەن ۇيىمدار تاراپىنان قاجەتتى تالاپتار ورىندالىپ جاتىر. باستى ماسەلە - بۇكىل قالا بويىنشا كوروناۆيرۋستىق ينفەكتسيانىڭ تارالۋىنا جول بەرمەۋ»، - دەدى باقىتجان ساعىنتايەۆ.
سونىمەن قاتار، ول باس دارىگەرلەردى اشىق ديالوگقا شاقىرىپ، وزەكتى ماسەلەلەردى تالقىلاۋدى جانە ولاردى جەدەل شەشۋ ءۇشىن قاجەتتى شارالاردى بىرلەسىپ اتقارۋ كەرەكتىگىن ايتتى.
ونلاين جيىن بارىسىندا جەكە قورعانىس قۇرالدارىمەن قامتاماسىز ەتۋ، ينفەكتسيالىق ستاتسيونارلاردا دارىگەرلەردىڭ جانە بارلىق ساناتتاعى مەديتسينالىق قىزمەتكەرلەردىڭ قاۋىپسىزدىگى ءۇشىن قاجەتتى سانيتارلىق-ەپيدەميولوگيالىق نورمالاردى ساقتاۋ، مەديتسينالىق قىزمەتكەرلەرگە ۇستەمەاقى تولەۋ، تۇرعىن ءۇي جاعدايلارى جانە ناۋقاستارمەن جۇمىس ىستەيتىن بارلىق مەديتسينالىق قىزمەتكەرلەردى تاماقتاندىرۋ، سونىمەن قاتار تۇرعىنداردىڭ COVID-19 تەستىنە تاپسىرۋ ماسەلەلەرى قاراستىرىلدى.
اتقارىلعان جۇمىستار جايلى قالالىق قوعامدىق دەنساۋلىق باسقارماسىنىڭ باسشىسى ت. ابىلدايەۆ جانە تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ا. مولداعاسىموۆا باياندادى.
ءوز كەزەگىندە مەديتسينالىق قوعامداستىق وكىلدەرىنىڭ اتىنان 1№ قالالىق كلينيكالىق اۋرۋحانانىڭ باس دارىگەرى ە. قاليەۆ ءسوز سويلەدى. بۇگىنگى تاڭدا الماتى قالاسىندا 21370 ادام COVID-19-عا تەكسەرۋدەن ءوتتى. زەرتحانالىق تۇردە راستالعان كوروناۆيرۋستىق ينفەكتسيا جۇقتىرعان 350 جاعداي تىركەلدى.
جۇقپالى اۋرۋحانالاردا 299 ناۋقاس ەم الىپ جاتسا، پروۆيزورلىق ورتالىقتاردا 256 ادام، كارانتيندىك وقشاۋلاۋدا — 366، ءۇي كارانتينىندە — 7097 ادام بار. مەديتسينالىق ۇيىمدار بارلىق جەكە قورعانىس قۇرالدارىمەن، ونىڭ ىشىندە 4500 دەن استام بىرنەشە رەت پايدالانۋعا جارامدى قورعانىس مەديتسينالىق كوستيۋمدەرىمەن قامتاماسىز ەتىلگەن.
ق ر پرەزيدەنتىنىڭ تاپسىرماسى بويىنشا، الماتى قالاسىندا كوروناۆيرۋسپەن كۇرەسكە جۇمىلدىرىلعان دەنساۋلىق ساقتاۋ ۇيىمدارى قىزمەتكەرلەرىنىڭ ۇستەمەاقىسىنىڭ تولەندى. قالعان ەكى كارانتيندىك ۇيىم ماماندارىنىڭ ۇستەمەاقىسىن تولەۋ بويىنشا جۇمىستار جۇرگىزىلۋدە. توتەنشە جاعداي كەزىندە مەديتسينا قىزمەتكەرلەرى وزدەرىنىڭ تالاپ-تىلەكتەرىنە سايكەس قوناقۇيلەرگە، حوستەلدەر مەن جاتاقحانالارعا، سونداي-اق تۋىسقاندارىنىڭ ۇيلەرىنە ورنالاستىرىلدى.
سونىمەن قاتار قوناقۇيلەردە تۇرۋعا نيەت بىلدىرۋشىلەر ءۇشىن دە قوسىمشا جاتىن ورىندار بار. بۇل رەتتە تۇرۋ جانە تاماقتانۋعا ارنالعان شىعىندار جەرگىلىكتى بيۋدجەت قاراجاتى ەسەبىنەن جابىلاتىن بولادى.
بۇدان وزگە جيىن بارىسىندا توتەنشە جاعدايدىڭ 1- مامىرعا دەيىن ۇزارتىلعانى جانە 20- ساۋىردەن باستاپ ونەركاسىپ جانە قۇرىلىس كاسىپورىندارى، قىزمەت كورسەتۋ سالاسىنىڭ بەلگىلى ءبىر سەكتورلارىنىڭ جۇمىسىن ىسكە قوسۋدى ەسكەرە وتىرىپ، كوروناۆيرۋستىق ينفەكتسيانى تاراتپاۋ بويىنشا سانيتارلىق-ەپيدەميولوگيالىق نورمالاردىڭ ودان ءارى ساقتالۋىن قامتاماسىز ەتۋ جونىندەگى شارالار قارالدى. سونداي-اق جاڭا مودۋلدىك جۇقپالى اۋرۋلار اۋرۋحاناسىنىڭ جۇمىسىن جولعا قويۋ ماسەلەسى ءسوز بولدى.
ياعني، اۋرۋحاناعا مەديتسينالىق قىزمەتكەرلەردى تارتۋ جانە ونىڭ تەحنيكالىق قۇرالدارمەن جابدىقتالۋىنا ەرەكشە كوڭىل ءبولۋ.
مەگاپوليس اكىمى كەزدەسۋدى قورىتىندىلاي كەلە، COVID-19 ىندەتىمەن كۇرەس جولىندا جۇرگەن بارلىق ماماندارعا ءتارتىپ پەن سانيتارلىق-ەپيدەميولوگيالىق نورمالاردى قاتاڭ ساقتاۋ كەرەكتىگىن اتاپ ءوتتى.
«باۋىرجان مومىش ۇلىنىڭ ءسوزى بار «ءتارتىپسىز ەل بولمايدى، تارتىپكە باس يگەن قۇل بولمايدى». ءبىر جاعادان باس، ءبىر جەڭنەن قول شىعارا وتىرىپ، جۇمىلا جۇمىس ىستەۋ قاجەت. اسىرەسە، ءدال بۇگىنگىدەي سىن شاقتا ءاربىر جۇمىس ورنىندا قاتاڭ ءتارتىپ كەرەك»، - دەدى باقىتجان ساعىنتايەۆ.
سونداي-اق، ول اكىمدىك، قۇقىق قورعاۋ قىزمەتى، اسكەري قىزمەتشىلەر دە قالانىڭ ەپيدەميولوگيالىق قاۋىپسىزدىگىن قامتاماسىز ەتۋ ماقساتىندا جان-جاقتى قولداۋ كورسەتەتىنىن تىلگە تيەك ەتتى.