ءۇندىستاننىڭ تانىمال ارحەولوگيالىق جادىگەرىنىڭ كوشىرمەسى استاناعا جەتكىزىلدى
استانا. KAZINFORM – ق ر پرەزيدەنتى ءىس باسقارماسىنا قاراستى پرەزيدەنتتىك ورتالىقتا ءۇندىستاننىڭ بيحار شتاتىنىڭ بيحار مۋزەيىنىڭ جادىگەرلەرىنەن كورمە اشىلدى.
«ادامزات، ەسكەرتكىشتەر جانە تابيعات تۋرالى تريپتيح» حالىقارالىق كورمەسى قازاقستانداعى ءۇندىستان ەلشىلىگى سۆامي ۆيۆەكاناندا مادەني ورتالىعىمەن بىرلەسىپ ۇيىمداستىرىلعان.
كورمە تاقىرىپتارى ءبىر- بىرىمەن ساباقتاسىپ، ادامزاتتى، ەسكەرتكىشتەر مەن تابيعاتتى بايلانىستىراتىن ءبىرتۇتاس جەلى قۇرادى. بيحار مۋزەيىنىڭ كۋراتورى مۋميتا گوشتىڭ ايتۋىنشا، كوشپەلى كورمە تۋرالى باستامانى قازاقستانداعى ءۇندىستان ەلشىلىگى كوتەرگەن.
«بيحار مۋزەيى - ەجەلگى پاتنا قالاسىندا ورنالاسقان ءۇندىستاننىڭ ەڭ جاس ءارى ءىرى مۋزەيلەرىنىڭ ءبىرى. 2015 -جىلى اشىلعان مۋزەي قورىندا 40 مىڭنان استام جادىگەر بار. مۋزەي 10 سەكسيادان قۇرالادى، اسىرەسە ارحەولوگيا، تاريح، ونەر باعىتتارىندا ەجەلگى زاماننان قازىرگى كۇنگە دەيىنگى ارالىقتى قامتيتىن قۇندى جادىگەرلەرى بار. اسىرەسە بۇگىنگى كورمەگە بيحار مۋزەيىنىڭ ەڭ تانىمال ەكسپوناتى - «ياكشي ديدارگاندج» ءمۇسىنىنىڭ كوشىرمەسى اكەلىندى. ءبىزدىڭ زامانىمىزعا دەيىنگى 2,5 مىڭ جىل بۇرىنعى ايەل ءمۇسىنى ارقىلى سول زامانداعى ايەل سۇلۋلىعى، قوعامنىڭ ايەلگە دەگەن قۇرمەتىن كورە الامىز»، - دەدى م. گوش اگەنتتىك تىلشىسىنە بەرگەن سۇحباتىندا.
بۇل كورمە پرەزيدەنتتىك ورتالىقتا ءبىر اي تۇرادى، ەگەر قىزىعۋشىلىق جوعارى بولسا، مەرزىمى تاعى ۇزارتىلادى. ەكسپوزيتسيادا 39 سۋرەتشى مەن 4 فوتوگرافتىڭ ەلۋدەن استام ونەر تۋىندىلارى قازاقستاندىق كەلۋشىلەر نازارىنا ۇسىنىلعان.
ارپانا كاۋردىڭ «كۇن مەن ءتۇن» تۋىندىسى جارىق پەن كولەڭكەنى، ءومىر مەن ءولىم تۋرالى ەكىۇدايلىقتى شىنايى بەينەلەيدى.
لالۋ پراساد شوۋدىڭ «بابۋ مەن بيبي» تۋىندىسى سۋرەتشىنىڭ دارىنى مەن بەنگال مادەنيەتى مەن ەستەتيكاسىنا ەرەكشە قۇمارلىعىن كورسەتەدى. ورتا تاپتاعى بەنگال ەرلەرى مەن ايەلدەرىنىڭ ستيلدەندىرىلگەن بەينەلەرى مودەرنيزمدى داستۇرمەن ۇيلەستىرەدى.
راندجيت كۋماردىڭ «پاۆاپۋري: ءدجاينيزمنىڭ قاسيەتتى مەكەنى» ، بيدجوي دجايننىڭ «بودحگايا عيباداتحاناسىنىڭ قاسيەتتى ساۋلەسى» جانە گانەش حەتريۆالدىڭ پاتنا قالاسىنداعى «شري حارماندير ساحيب» فوتوسۋرەتتەرىندە جاي عيماراتتار ەمەس، تاريح تىلسىمىن، ادامزاتتىڭ عاسىرلار بويعى ەستەلىكتەرىن ساقتايتىن ەسكەرتكىشتەر كورىنىس تاپقان.
«بۇل - سۆامي ۆيۆەكاناندا ورتالىعىمەن بىرلەسىپ ۇيىمداستىرىلعان ەكىنشى جوبامىز. بۇگىن ءبىز ءۇندىستاننىڭ ەڭ ءىرى مۋزەيلەرىنىڭ ءبىرى - بيحار مۋزەيىنىڭ قورىنداعى ونەر تۋىندىلارىمەن تانىسۋ مۇمكىندىگىنە يە بولدىق. سۋرەت پولوتنولارى، مۇسىندەر جانە فوتوگرافيالار اۆتورلاردىڭ ادام مەن تابيعات اراسىنداعى ءوزارا ارەكەتتەستىك تۋرالى فيلوسوفيالىق ويلارىن كورسەتەدى. مادەني ارتەفاكتىلەر ءبىزدى ەجەلگى وركەنيەت اتموسفەراسىنا جەتەلەيدى، ادامزاتتىڭ الەمدەگى ورنى مەن رولى، سونداي- اق ونىڭ قورشاعان ورتاعا اسەرى تۋرالى ويلانىپ كورۋگە مۇمكىندىك بەرەدى. «ادامزات، ەسكەرتكىشتەر جانە تابيعات تۋرالى تريپتيح» كورمەسى ءۇندى حالقىنىڭ ءداستۇرى مەن مادەنيەتى ارقىلى شىعىس الەمىنىڭ تاڭعاجايىپ جۇمباق الەمىنە جاقىنداۋعا مۇمكىندىك بەرەتىنىنە سەنىمدىمىن»، - دەدى پرەزيدەنتتىك ورتالىق ديرەكتورى باقىتجان تەمىربولات كورمەنىڭ اشىلۋ سالتاناتىندا.
سونداي- اق، ق ر پرەزيدەنتتىك ورتالىعى مەن بيحار مۋزەيى (ءۇندىستان، پاتنا قالاسى) اراسىنداعى ىنتىماقتاستىق پەن ءوزارا ءىس- قيمىل تۋرالى مەموراندۋمعا قول قويىلدى. قىلقالام ونەرى بويىنشا ەكىجاقتى بايلانىستاردى جاقسارتۋعا مۇمكىندىكتەر تۋعىزادى.
«بۇل كورمە ادام رۋحىنىڭ، مادەني مۇرانىڭ جانە تابيعاتتىڭ تەرەڭ بايلانىسىن كورسەتەدى. بۇگىنگى جادىگەرلەر - ونەردىڭ تاريحتى ساقتاۋداعى كۇشىنىڭ دالەلى عانا ەمەس، ادامزاتتىڭ تابيعات پەن ەسكەرتكىشتەرگە دەگەن قۇرمەتى تۇراقتى ۇيلەسىمدىك ءۇشىن شەشۋشى مانگە يە بولاتىن بولاشاقتىڭ كورىنىسى. پرەزيدەنتتىك ورتالىقتا ءۇندىستاننىڭ ونەر تۋىندىلارى العاش رەت كورسەتىلىپ وتىر. بۇل رەتتە مەن بيحار مۋزەيىنىڭ تۇتاس ۇجىمىن بەينەلەۋ ونەرىندەگى شەبەرلىكتەرىن الەمدىك ارەناعا شىعارعانىن ەرەكشە اتاپ وتەمىن. بۇگىن بەكىتىلگەن مەموراندۋم مادەني ىنتىماقتاستىعىمىزدى ودان ءارى نىعايتادى جانە بولاشاق جوبالارعا شابىتتاندىرادى»، - دەدى ءۇندىستاننىڭ توتەنشە جانە وكىلەتتى ەلشىسى ناگەندرا پراساد.