ءۇندىستاندا ءدىني راسىمدە 100 دەن ارتىق ادام قازا تاپتى

نيۋ-دەلي. KAZINFORM - ءۇندىستاننىڭ ۋتتار-پرادەش شتاتىندا 2-شىلدەدە ءدىني شارا كەزىندە كەپتەلىس سالدارىنان 100 دەن اسا ادام قازا تاپتى. بۇل تۋرالى NDTV حابارلادى.

قايعىلى وقيعا جۇزدەگەن ادام قاتىسقان ساتسانگ (سىيىنۋ ءراسىمى) كەزىندە بولعان. قوعامدىق دەنساۋلىق ساقتاۋ ورتالىعىنان تۇسىرىلگەن ۆيدەودا بىرنەشە ءمايىتتى اۆتوبۋسپەن الىپ بارا جاتقانىن جانە تۋىستارىنىڭ جىلاپ جاتقانىن كورۋگە بولادى.

مالىمەتتەرگە قاراعاندا، قازا تاپقاندار اراسىندا ايەلدەر مەن بالالار دا بار. ءتۇرلى جاراقات العان 15 ادام اۋرۋحاناعا جەتكىزىلگەن. ۋتتار-پرادەش شتاتى باسشىسى يوگي اديتياناتح قاراماعىنداعىلارعا قايعىلى جاعدايدى باقىلاۋعا الۋدى بۇيىردى. قازىر وقيعا ورنىندا دارىگەرلەر مەن پوليتسەيلەر جۇمىس ىستەپ جاتىر.

دەنساۋلىق ساقتاۋ ورتالىعىنىڭ حابارلاۋىنشا، 50-60 ادام قايتىس بولعان. كەيىن وكرۋك شەنەۋنىكتەرى تاعى 27 ادامنىڭ قايتىس بولعانىن راستادى.

كەشكە باس ينسپەكتور شالابح ماتحۋر ولاردىڭ سانى 116 عا دەيىن وسكەنىن ايتتى.

- ءۇندىستان پرەزيدەنتى دراۋپادي مۋرمۋ قازا بولعانداردىڭ وتباسىلارىنا كوڭىل ايتتى، - دەلىنگەن حابارلامادا.

مارقۇمداردىڭ وتباسىنا كومەك كورسەتىلىپ، شارانى ۇيىمداستىرۋشىلارعا قاتىستى قىلمىستىق ءىس قوزعالادى.

اۆتور
جاراسقان نۇرىبايەۆ