ءۇندىستاندا اپتاپ ىستىقتان 50 دەن استام ادام قايتىس بولدى

استانا. KAZINFORM - ءۇندىستاندا قاتتى اپتاپ ىستىقتان ءۇش كۇندە 50 دەن استام ادام قايتىس بولدى، دەپ حابارلايدى BBC.

دەمالىس كۇندەرى ەلدىڭ سولتۇستىگىندەگى ۋتتار- پرادەش شتاتىندا اپتاپ ىستىقتان 33 ادام قايتىس بولدى. ولاردىڭ ىشىندە جالپى سايلاۋعا قاتىسقان ادامدار، سونىڭ ىشىندە سايلاۋ شەنەۋنىكتەرى، كۇزەتشىلەر مەن سانيتارلىق قىزمەتكەرلەر بار.

«وديشا شتاتىندا اپتاپ ىستىقتان 20 ادام قايتىس بولدى»، - دەپ مالىمدەدى رەسمي تۇلعالار.

سونىمەن قاتار فەدەرالدىق دەنساۋلىق ساقتاۋ مينيسترلىگى 1-ناۋرىزدان 30-مامىرعا دەيىن اپتاپ ىستىقتان 56 ادام قايتىس بولعانىن مالىمدەدى. الايدا شتات بويىنشا دەرەكتەر ناقتى ساننىڭ ايتارلىقتاي جوعارى بولۋى مۇمكىن ەكەنىن كورسەتەدى.

وديشا شتاتىندا بيلىك 72 ساعات ىشىندە ىستىقتان 99 ادام قايتىس بولعانىن حابارلادى، ونىڭ 20 سى راستالدى.

سونداي-اق ەلدىڭ بيحار، مادحيا- پرادەش جانە دجاركحاند شتاتتارىندا اپتاپ ىستىقتان ادامدار ءولىمى تۋرالى حابارلاندى.

ءۇندىستاننىڭ ۇلتتىق اۋرۋلاردى باقىلاۋ ورتالىعى اپتاپ ىستىقتى «ومىرگە قاۋىپ توندىرەتىن» جاعداي دەپ اتادى، ودان بولاتىن ءولىم كورسەتكىشى 40 تان d عا دەيىن.

ءۇندىستاننىڭ سولتۇستىگى مەن ورتالىق بولىگىندە جانە باتىستىڭ ءبىر بولىگىندە سوڭعى ەكى اپتادا ادام شىداماس اپتاپ ىستىق بولدى، ەڭ جوعارى تەمپەراتۋرا بىرنەشە كۇن قاتارىنان  45-46 گرادۋس، كەي اۋدانداردا 50 گرادۋسقا دەيىن جەتتى.

دەگەنمەن، ءۇندىستاننىڭ مەتەورولوگيالىق دەپارتامەنتىنىڭ مالىمەتىنشە، مۋسسوننىڭ باستالۋىنا بايلانىستى الداعى كۇندەرى اۋا تەمپەراتۋراسىنىڭ تومەندەۋى مۇمكىن.

ەلدىڭ بىرنەشە وڭىرىندە ەنەرگيا تۇتىنۋدىڭ ارتۋىنا بايلانىستى سۋ مەن ەلەكتر قۋاتىنىڭ تاپشىلىعى قاتتى سەزىلۋدە.

ەسكە سالا كەتسەك، بۇعان دەيىن ءۇندىستان استاناسى دەليدە جاڭا رەكوردتىق اۋا تەمپەراتۋراسى تىركەلىپ، تەرمومەتر باعاناسى 49,9+  گرادۋسقا جەتكەنى تۋرالى جازعان بولاتىنبىز.

اۆتور
زارينا تۋعانبايەۆا