ءۇندىستاندا اپاتقا ۇشىراعان ۇشاق دارىگەرلەرگە ارنالعان جاتاقحانا عيماراتىنا قۇلاعان

نيۋ- دەلي. KAZINFORM - ءۇندىستاننىڭ باتىسىندا اپاتقا ۇشىراعان Air India اۋە كومپانياسىنىڭ ۇشاعى دارىگەرلەرگە ارنالعان جاتاقحانا عيماراتىنا قۇلاعان. بۇل تۋرالى جەرگىلىكتى پوليتسيا وفيتسەرى بريفينگ بارىسىندا مالىمدەدى، دەپ جازدى تاسس.

اپات ورنىنا بارلىق قىزمەتتەر جۇمىلدىرىلدى، دەپ حابارلادى جەرگىلىكتى پوليتسيا وفيتسەرى.

- الدىن الا مالىمەت بويىنشا، لوندونعا باعىت العان Air India اۋە كومپانياسىنىڭ ۇشاعى دارىگەرلەر جاتاقحاناسىنا قۇلاعان. پوليتسيا مەن باسقا دا قىزمەتتەر 2-3 مينۋت ىشىندە وقيعا ورنىنا كەلىپ جەتتى. مۇندا بارلىق ءتيىستى قىزمەتتەر جۇمىس ىستەپ جاتىر، - دەدى ول.

Boeing 787 Dreamliner ۇشاعى ءۇندىستاننىڭ باتىسىنداعى احمەداباد قالاسىنىڭ اۋەجايىنان ۇشىپ شىققاننان كەيىن بىردەن قۇلاعان. ول احمەدابادتان لوندونعا باعىت العان رەيس بولعان. ۇشاق بورتىندا 242 ادام بولعان. NDTV تەلەارناسىنىڭ حابارلاۋىنشا، اپاتتان امان قالعاندار بار.