ءۇندىستان مەن پاكىستان شەكاراسىندا اتىس بولدى

استانا. KAZINFORM - ءۇندىستان مەن پاكىستان ارمياسى دجاممۋ مەن كاشميردەگى باقىلاۋ سىزىعىندا ءبىر-بىرىنە وق جاۋدىردى. بۇل تۋرالى PTI اگەنتتىگى ءۇندىستان اسكەري قۇرىلىمىنداعى دەرەككوزگە سىلتەمە جاساپ حابارلادى، دەپ جازادى ت ا س س.

- باقىلاۋ سىزىعىنىڭ بىرنەشە ۋچاسكەسىندە پاكىستان تاراپىنان اتىس قارۋىن قولدانۋ ارقىلى وق اتىلدى، - دەيدى دەرەككوز.

ۇندىلەر دە بۇعان وق اتۋمەن جاۋاپ قايتارعان. قازا تاپقاندار مەن جارالانعاندار تۋرالى اقپارات جوق.

PTI اگەنتتىگىنىڭ مالىمەتىنشە، بۇل اتىستار 22 - ساۋىردە پاحالگام قالاسىندا بولعان تەررورلىق شابۋىلدان كەيىن ءۇندىستان مەن پاكىستان اراسىنداعى شيەلەنىس كۇشەيگەن تۇستا بولىپ وتىر. ول شابۋىلدا 26 بەيبىت تۇرعىن قازا تاپقان بولاتىن.

پاحالگام قالاسىنداعى تەراكت

22-ءساۋىر كۇنى قارۋلى ادامدار دجاممۋ مەن كاشمير وداعى اۋماعىنداعى ايگىلى تۋريستىك قالا - پاحالگامدا تەررورلىق شابۋىل جاساعان. اسكەري كيىم كيگەن ادامدار اۆتوماتتارمەن وق جاۋدىرعان، 25 ءۇندى ازاماتى مەن 1 نەپالدىق قازا تاپتى. قىلمىسكەرلەر وقيعا ورنىنان قاشىپ ۇلگەرگەن.

كوپتەگەن ادام جارالاندى. شابۋىلدى «قارسىلىق مايدانى» اتتى توپ ءوز موينىنا الدى. بۇل توپتىڭ پاكىستاندا تىيىم سالىنعان «لاشكار- ي- تايبا» ۇيىمىنا قاتىسى بار. وسى وقيعادان كەيىن ءۇندىستان پاكىستانمەن سۋ تۋرالى كەلىسىمدى توقتاتىپ، نيۋ-دەليدەگى پاكىستاندىق كەڭەسشىلەردىڭ ەلدەن كەتۋىن تالاپ ەتتى. سونداي- اق پاكىستاندىقتارعا بەرىلگەن ۆيزالار دا جويىلدى.

ايتا كەتەيىك، اقوردا مەملەكەت باسشىسىنىڭ ءۇندىستاننىڭ پرەمەر- مينيسترىنە كوڭىل ايتقانىن حابارلادى.

ب ۇ ۇ باس حاتشىسى ءۇندىستانداعى قارۋلى شابۋىلدى قاتاڭ ايىپتادى.

ءۇندىستان باسقاراتىن كاشميردەگى تانىمال تۋريستىك ورتالىقتا قارۋلى ادامدار توبى 26 ادامدى ولتىرگەننەن كەيىن ءۇندىستان پاكىستانعا قارسى شارالارعا كوشتى.

دجاممۋ مەن كاشمير پوليسياسى پاحالگامدا شابۋىل جاساعانداردىڭ اتى- ءجونىن اشكەرەلەپ، ولار تۋرالى اقپارات بەرگەندەرگە سىيلىق جاريالادى.