ءۇندىستان پاكىستاننان تاۋار اكەلۋگە جانە ترانزيتكە تىيىم سالدى

استانا. KAZINFORM - ءۇندىستان پاكىستاندا وندىرىلگەن نەمەسە ول ارقىلى ترانزيتپەن جەتكىزىلەتىن تاۋارلاردى يمپورتتاۋعا تىيىم سالدى، دەپ حابارلايدى ت ا س س اقپارات اگەنتتىگى.

ءۇندىستان ۇكىمەتىنىڭ سىرتقى ساۋدا دەپارتامەنتى تاراتقان حابارلاماعا سايكەس، «پاكىستاننان شىققان نەمەسە ودان ەكسپورتتالاتىن بارلىق تاۋاردىڭ تىكەلەي نەمەسە جاناما يمپورتىنا نەمەسە ترانزيتىنە كەلەسى حابارلاما كەلگەنگە دەيىن تىيىم سالىنادى». اتاپ وتىلگەندەي، «شەكتەۋ ۇلتتىق قاۋىپسىزدىك پەن مەملەكەتتىك ساياسات مۇددەسى ءۇشىن ەنگىزىلدى».

حابارلاما 22-ساۋىردە دجاممۋ مەن كاشميردەگى تانىمال تۋريستىك قالا - پاحالگامدا قارۋلى ادامدار وق جاۋدىرعان لاڭكەستىك ارەكەتتەن كەيىن ءۇندىستان مەن پاكىستان اراسىنداعى شيەلەنىس كۇشەيگەن تۇستا جاسالدى. اسكەري كيىم كيگەن ادامدار اۆتوماتتارمەن وق جاۋدىرعان، 25 ءۇندى ازاماتى مەن 1 نەپالدىق قازا تاپتى. قىلمىسكەرلەر وقيعا ورنىنان قاشىپ ۇلگەرگەن.

لاڭكەستىك ارەكەتتەن كەيىن ءۇندىستان يسلامابادتاعى ەلشىلىگىندەگى ادامدار سانىن ەكى ەسەگە دەرلىك قىسقارتتى، پاكىستان ديپلوماتيالىق ميسسياسىنىڭ اسكەري كەڭەسشىلەرىن پەرسونا نون گراتا دەپ جاريالادى جانە شەكاراداعى ماڭىزدى «اتتاري» باقىلاۋ بەكەتىن جاپتى. ءۇندىستان بيلىگى دە يسلامابادپەن سۋدى ءبولىسۋ تۋرالى كەلىسىمدى جانە پاكىستان ازاماتتارىنا ۆيزا بەرۋدى توقتاتتى.

پوليسيانىڭ مالىمەتىنشە، شابۋىل جاسادى دەگەن ءتورت ادامنىڭ ۇشەۋى انىقتالدى: ەكەۋى پاكىستان ازاماتى جانە بىرەۋى ءۇندىستان باسقاراتىن كاشمير ازاماتى. ءتورتىنشى تۋرالى ازىرگە اقپارات جوق. ءتىرى قالعانداردىڭ كوبى سودىرلاردىڭ ۇندىلىك ازاماتتاردى ارنايى نىساناعا العانىن ايتادى.

شابۋىلعا جاۋاپكەرشىلىك پاكىستانداعى «لاشكار- ە- تايبا» ۇيىمىمەن بايلانىسى بار Resistance Front دەپ اتالاتىن شاعىن توپقا جۇكتەلدى. الايدا كەيىنىرەك ول ءوزىنىڭ شابۋىلعا قاتىسى بارىن جوققا شىعاراتىن مالىمدەمە جاسادى.

قازاقستانداعى پاكىستان يسلام رەسپۋبليكاسىنىڭ توتەنشە جانە وكىلەتتى ەلشىسى ناۋمان باشير بحاتتي ەلوردادا بريفينگ وتكىزىپ، دجاممۋ مەن كاشميردەگى قازىرگى احۋالعا پىكىر ءبىلدىردى جانە ءوز ەلىنىڭ رەسمي ۇستانىمىن جەتكىزدى.