ءمۇفتيات مەككەگە كەتكەن قازاقستاندىقتار تۋرالى مالىمدەمە جاسادى

  استانا. KAZINFORM - قازاقستان قاجىلىق ميسسياسى مەككەگە وتانداستارىمىزدىڭ ءدىن امان ەكەنىن حابارلادى. قاجىلىق ميسسياسىنىڭ قۇرامىندا 4 دارىگەر جانە 16 تۋروپەراتوردىڭ ءارقايسىنداعى 1 دارىگەر ەم-شارامەن اينالىسىپ جاتىر.

بۇعان دەيىن مەككەدەگى اپتاپ ىستىقتان بىرنەشە ادامنىڭ قازا تاپقانى تۋرالى حابارلانعان ەدى. قازاقستان قاجىلارىنىڭ اراسىندا قايتىس بولعان ەشكىم جوق.

ميسسياداعى دارىگەرلەر توبىنىڭ جەتەكشىسى ارداق ايتباي ۇلىنىڭ ايتۋىنشا، مەديتسينالىق ورتالىق كومەگىنە 14-16-ماۋسىم كۇندەرى 703 قاجى جۇگىنگەن. ولاردىڭ قاتارىندا جۇرەك- قان تامىرلارى، جوعارى جانە تومەن تىنىس جانە اسقازان- ىشەك اۋرۋلارى، سونداي- اق باسقا دا (مازول جاراقاتى، اللەرگيا، كونيۋنكتيۆيت، ت. ب. ) سىرقات بويىنشا 120 قاجى بىرنەشە رەت تەكسەرىلگەن.

«15-ماۋسىمدا مۇزداليفادا قان قىسىمى كوتەرىلگەن قاجىعا جەدەل العاشقى كومەك كورسەتىلىپ، دارىگەردىڭ باقىلاۋىمەن قوناقۇيگە جونەلتىلدى. 16-ماۋسىمدا مينا جازىعىندا ترانزيتورلىق يشەميالىق ۇستاما بويىنشا ءبىر قاجىعا العاشقى مەديتسينالىق كومەك كورسەتىلىپ، ستاتسيونارعا جاتقىزىلدى. جاماراتتا شايتانعا تاس لاقتىرىپ كەلە جاتقان جولدا قانتى تومەندەپ، ەسىنەن تانىپ جاتقان ايەل ادامعا تەز ارادا كومەك كورسەتىلىپ، ول دا ستاتسيونارعا جەتكىزىلدى»، - دەدى ارداق ايتباي ۇلى.

قازىرگى تاڭدا اتالعان ناۋقاستار دارىگەرلەردىڭ تولىق باقىلاۋىندا، جاعدايى ءبىرقالىپتى. ودان بولەك، ەلدەن جەتكىزىلگەن ءدارى- دارمەك قورى دا جەتكىلىكتى.

ەسكە سالا كەتسەك، مەككەگە قاجىلىققا بارعان 550 ادام اپتاپ ىستىقتان كوز جۇمدى.