ءمايىتى كوشەدەن تابىلعان استانالىق جاس ءوسپىرىمنىڭ ءولىمىنىڭ سەبەبى انىقتالدى

استانا. KAZINFORM - بۇگىندە 14 جاسار جاس ءوسپىرىمنىڭ ءمايىتىنىڭ تابىلۋ فاكتىسى بويىنشا سوتقا دەيىنگى تەرگەۋ امالدارى جالعاسىپ جاتىر.

بۇل تۋرالى ەلوردانىڭ پوليتسيا دەپارتامەنتى حابارلادى.

«14 جاسار جاس ءوسپىرىمنىڭ ءمايىتىن تابۋ فاكتىسى بويىنشا سوتقا دەيىنگى تەرگەۋ ءجۇرىپ جاتىر، ءىستىڭ بارلىق ءمان-جايى وبەكتيۆتى، جان-جاقتى زەرتتەۋگە باعىتتالعان. سوت-مەديتسينالىق ساراپتامانىڭ قورىتىندىسىنا سايكەس، جاس ءوسپىرىم گاز قوسپاسىنان ۋلانعان»، - دەلىنگەن حابارلامادا.

اتالعان وقيعاعا قاتىستى باسقا دا دەرەكتەر ايتىلماي وتىر، سەبەبى قىلمىستىق-پروتسەستىك كودەكسىنىڭ 201-بابىنا سايكەس جاريا ەتۋگە جاتپايدى.

ەسكە سالا كەتسەك، 11-قىركۇيەكتە استانادا جاس ءوسپىرىمنىڭ ءمايىتى تابىلعانىن حابارلاعان بولاتىنبىز.

كامەلەتكە تولماعان جاس ءوسپىرىمنىڭ ءمايىتىن تەكسەرۋ بارىسىندا كوزگە كورىنەتىن دەنە جاراقاتتارى انىقتالماعان. ءىزىن سۋىتپاي ول فاكتى بويىنشا قىلمىستىق ءىس قوزعالدى.

جەلىدە تاراعان اقپاراتقا سۇيەنسەك، 14 جاستاعى جاس ءوسپىرىم - ەلورداداعى №16 مەكتەپتىڭ وقۋشىسى بولعان.

اۆتور

داۋلەت ىزتىلەۋ