ءمارمار تەڭىزى لاستانىپ جاتىر

استانا. KAZINFORM - تۇركيانىڭ سولتۇستىك-باتىسىنداعى ءمارمار تەڭىزى لاستانىپ جاتىر. كەيىنگى جىلدارى تەڭىز بەتىن قوقىس پەن ءوندىرىس قالدىقتارى باسىپ قالعان. بۇلاي جالعاسا بەرسە، تەڭىزدەگى تىرشىلىكتىڭ جويىلىپ كەتۋ قاۋپى بار.

سول سەبەپتى عالىمدار تابيعي اپاتتىڭ الدىن الۋ ءۇشىن ەكوجۇيەنى قالپىنا كەلتىرىپ، تەڭىزدەن بالىق اۋلاۋعا تىيىم سالۋدى ۇسىندى. مارجانى مول، تەڭىز تىرشىلىگى ءارالۋان، ەكوجۇيەسى باي ءمارمار تەڭىزىنىڭ قازىرگى جاعدايى الاڭداتارلىق. ويتكەنى سۇلۋ تەڭىز قوقىسقا تولىپ تۇر. سۋ بەتى قالدىقپەن لاستانسا، تەڭىز تابانى ۋلى حيميكاتپەن تۇنشىعىپ تۇر. وندىرىستىك قالدىقتار، ەگىستىك سۋى مەن پەستيتسيدتىڭ توقتاۋسىز اعىنى لاستانۋ دەڭگەيىن ودان سايىن ۋشىقتىرىپ جىبەرگەن.

ساراپشىلاردىڭ ايتۋىنشا، تەڭىزدى لاستاۋشى - ەرگەنە وزەنىنىڭ سۋ ارناسى. بۇرىن مۇندا اۋىل شارۋاشىلىعى القابى سۋارىلاتىن. قازىر مىڭداعان وندىرىستىك كاسىپورىننىڭ نەگىزگى وشاعىنا اينالعان. ال بۇل جەردەن شىققان قالدىقتار تىكەلەي تەڭىزگە قاراي اعادى. ءسويتىپ تەڭىزدەگى ەكوجۇيەنىڭ تەپە-تەڭدىگى بۇزىلىپ، سۋ استىنداعى تىرشىلىككە قاۋىپ ءتوندىرىپ تۇر.

مۋرات كاپيكيران، شاڭحاي ينجەنەرلىك پالاتاسىنىڭ ءتوراعاسى:

- الداعى ۋاقىتتا تەڭىزدەگى وتتەگى دەڭگەيىنىڭ ازايۋ قاۋپىن ەسكەرسەك، ءمارمار تەڭىزى سىلدىراعان سۋدىڭ ەمەس، ساسىعان جۇمىرتقانىڭ يىسىمەن تانىلۋى مۇمكىن.

ءمارمار تەڭىزىنىڭ تاعدىرى - تۇرىك اعايىننىڭ عانا ەمەس، كۇللى ادامزاتتىڭ ماسەلەسى. ونى لاستانۋدان قۇتقارۋ ءۇشىن وندىرىستىك اعىندارعا قاتاڭ باقىلاۋ ورناتۋ قاجەت. «ايتپەسە ءمارمار تەڭىزى ماڭگىلىك لاستانۋ ايماعىنا اينالۋى مۇمكىن»، - دەيدى ساراپشىلار.

24.kz