ءماجىلىس سالىق كودەكسىن تاعى پىسىقتاپ، مەديتسينالىق ساقتاندىرۋ ماسەلەسىن تالقىعا سالادى
استانا. KAZINFORM - بۇگىن ءماجىلىستىڭ جالپى وتىرىسىندا دەپۋتاتتار جاڭا سالىق كودەكسىن جانە وعان ىلەسپە زاڭ جوبالارىن 2-وقىلىمدا تالقىلاپ، ءبىرقاتار حالىقارالىق قۇجاتتى راتيفيكاتسيالاۋعا قاتىستى زاڭ جوبالارىن جۇمىسقا الادى.
وتكەن جۇمادا، 25-ءساۋىر كۇنى ءماجىلىس سپيكەرى ەرلان قوشانوۆتىڭ توراعالىعىمەن بيۋرو وتىرىسى ءوتىپ، بۇگىنگى جالپى وتىرىستىڭ كۇن ءتارتىبى ناقتىلانعان ەدى.
سونىمەن، جالپى وتىرىستا دەپۋتاتتارعا مىندەتتى الەۋمەتتىك مەديتسينالىق ساقتاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن ءبىرىنشى وقىلىمدا قاراۋ ۇسىنىلادى.
زاڭ جوباسىن قازاقستان رەسپۋبليكاسى پرەزيدەنتىنىڭ 2024 -جىلعى 2-قىركۇيەكتەگى «ادىلەتتى قازاقستان: زاڭ مەن ءتارتىپ، ەكونوميكالىق ءوسىم، قوعامدىق وپتيميزم» اتتى حالىققا جولداۋىن ىسكە اسىرۋ ماقساتىمەن ۇكىمەت ازىرلەدى. سوندىقتان زاڭ جوباسى بويىنشا دەنساۋلىق ساقتاۋ ءمينيسترى اقمارال ءالنازاروۆا نەگىزگى بايانداما جاسايدى.
ەستە بولسا، مەملەكەت باسشىسى سول جولداۋىندا مىندەتتى الەۋمەتتىك مەديتسينالىق ساقتاندىرۋ جۇيەسىنىڭ ەنگىزىلۋى دەنساۋلىق ساقتاۋ سالاسىنا قوسىمشا رەسۋرستار اكەلىپ، جەكە مەنشىك مەديتسيناعا زور پايداسىن تيگىزگەنىن اتاپ وتكەن بولاتىن.
- بيىل دەنساۋلىق ساقتاۋ سالاسىنا بيۋدجەتتەن 3,3 تريلليون تەڭگە قارجى ءبولىندى. ءبىراق، ونىڭ ناتيجەسى ءالى كورىنىپ جاتقان جوق. مەديتسينالىق ساقتاندىرۋ جۇيەسىنە قاتىسۋشىلار اراسىندا مىندەتتەردىڭ دۇرىس بولىنبەۋى بۇرمالانعان اقپاراتتىڭ كوبەيۋىنە اكەپ سوقتىردى. ناۋقاستارعا مەملەكەت كەپىلدىك بەرگەن قىزمەتتەردى اقىلى نەگىزدە الۋدى نەمەسە بىرنەشە اي بويى كەزەك كۇتۋدى ۇسىنۋ جايتتارى از ەمەس. بۇعان جول بەرۋگە بولمايدى. بيۋدجەتتىڭ مۇمكىندىگى مەن مىندەتتەمەسىن ەسكەرە وتىرىپ، مەملەكەت كەپىلدىك بەرەتىن مەديتسينالىق كومەكتىڭ ءبىرىڭعاي بازالىق توپتاماسىن جاساۋ قاجەت. ال ودان اسىپ كەتكەن شىعىننىڭ ءبارى ساقتاندىرۋ جۇيەسى ارقىلى تولەنۋگە ءتيىس. تسيفرلاندىرۋ بولماسا، مۇنداي اۋقىمدى وزگەرىستەردى ءساتتى جۇزەگە اسىرۋ مۇمكىن ەمەس. ءبىر-بىرىنە بايلانىسى جوق ونداعان باعدارلاما مەن اقپاراتتار بازاسىنىڭ ورنىنا ءبىرىڭعاي مەملەكەتتىك مەديتسينالىق اقپارات جۇيەسىن جاساۋ كەرەك. جاڭا جۇيە، مەنشىك تۇرىنە قاراماستان، مەملەكەتتىك تاپسىرىس الاتىن مەديتسينا مەكەمەلەرىنىڭ بارىنە تولىق باقىلاۋ جاسالۋىن جانە مالىمەتتەردىڭ شىنايى بولۋىن قامتاماسىز ەتۋى قاجەت. ۇكىمەت وسى ماڭىزدى ماسەلەنى شەشۋگە دەرەۋ كىرىسىپ، بۇل باعىتتاعى جۇمىستىڭ بارىسى جونىندە ماعان جانە دەپۋتاتتىق كورپۋسقا ەسەپ بەرىپ وتىرۋعا ءتيىس، - دەگەن ەدى قاسىم-جومارت توقايەۆ.
ۇسىنىلىپ وتىرعان تۇزەتۋلەر مەديتسينالىق كومەكتىڭ ءبىرىڭعاي پاكەتىن قالىپتاستىرۋعا باعىتتالعان. بۇل تەگىن مەديتسينالىق كومەكتىڭ كەپىلدىك بەرىلگەن كولەمى مەن مىندەتتى الەۋمەتتىك مەديتسينالىق ساقتاندىرۋ جۇيەسى اياسىندا كورسەتىلەتىن مەديتسينالىق قىزمەت تۇرلەرىن ايقىنداۋ ارقىلى جۇزەگە اسىرىلادى.
سونىمەن قاتار دەپۋتاتتار جاڭا سالىق كودەكسى جوباسى مەن وعان سالىق سالۋ ماسەلەلەرى بويىنشا قۇرىلىس جانە تۇرعىن ءۇي قۇرىلىسىنا ۇلەستىك قاتىسۋ سالاسىنداعى ىلەسپە تۇزەتۋلەردى، تۇرعىن ءۇي- كوممۋنالدىق شارۋاشىلىق ماسەلەلەرى جونىندەگى زاڭنامالىق جاڭالىقتاردى ەكىنشى وقىلىمدا تالقىلايدى. سونداي-اق وسىعان بايلانىستى سالىق كودەكسى مەن اكىمشىلىك قۇقىق بۇزۋشىلىق تۋرالى كودەكسكە ەنگىزىلەتىن وزگەرىستەردى قارايدى. نەگىزگى بايانداماشى قارجى جانە بيۋدجەت كوميتەتىنىڭ مۇشەسى بەرىك بەيسەنعاليەۆ بولماق.
ايتا كەتەرلىگى، 9-ءساۋىر كۇنى وتكەن ءماجىلىستىڭ جالپى وتىرىسىندا دەپۋتاتتار جاڭا سالىق كودەكسىن تالقىعا سالعان ەدى. قۇجاتتى دەپۋتاتتارعا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعارين تانىستىرعان بولاتىن.
قۇجات جوباسىن 4 ساعات بويى تالقىلاعان دەپۋتتاردىڭ باسىم كوپشىلىگى جاڭا رەداكسيانى ءبىرىنشى وقىلىمدا قولداپ داۋىس بەردى. قالىس قالعاندار سانى - 9، قارسى بولعاندار - 7,1 دەپۋتات داۋىس بەرمەدى.
سونىمەن، جاڭا سالىق كودەكسىنە سايكەس، ق ق س سالىناتىن اينالىمنىڭ تومەنگى شەگى 40 ميلليون تەڭگە بولۋى مۇمكىن. وسى شەشىمنىڭ اياسىندا ۇكىمەت جەكە كاسىپكەرلىكتى تىركەۋ ءراسىمىن قاتاڭداتپاق. سونداي-اق، ءسان-سالتانات سالىعى كىمدەرگە سالىناتىنى بەلگىلى بولدى. ناقتىراق ايتقاندا، قۇنى 450 ميلليون تەڭگەدەن اساتىن جىلجىمايتىن مۇلىك يەلەرى ۇلعايتىلعان سالىق تولەيدى. ال جىلدىق تابىسى 33,4 ميلليون تەڭگەدەن اساتىن ازاماتتار تابىسىنىڭ 15 پايىزىن سالىققا تولەۋى مۇمكىن.
جالپى وتىرىسقا ءبىرقاتار حالىقارالىق قۇجاتتى راتيفيكاتسيالاۋعا قاتىستى زاڭ جوبالارى دا ەنگىزىلەدى.
ادەتتەگىدەي، ءار زاڭ دەپۋتاتتار تاراپىنان تالقىلانىپ بولعاننان كەيىن نەگىزگى بايانداماشىلار باق وكىلدەرىنىڭ الدىنا شىعىپ، تىلشىلەر تاراپىنان تۋىنداعان ساۋالدارعا جاۋاپ بەرەدى.
ال ءماجىلىستىڭ جالپى وتىرىسىنىڭ كۇن تارتىبىنە شىعارىلعان ماسەلەلەر قارالىپ بولعاننان سوڭ دەپۋتاتتار ۇكىمەت مۇشەلەرىنىڭ اتىنا دەپۋتاتتىق ساۋالدار جولداۋى مۇمكىن.
ەستەرىڭىزگە سالا كەتسەك، وتكەن اپتاداعى ءماجىلىس وتىرىسىندا دەپۋتاتتار مەملەكەت باسشىسىنىڭ 2023 -جىلعى 1-قىركۇيەكتەگى «ادىلەتتى قازاقستاننىڭ ەكونوميكالىق باعدارى» اتتى قازاقستان حالقىنا جولداۋىن ىسكە اسىرۋ اياسىندا ازىرلەنگەن زياتكەرلىك مەنشىك جانە ورمان شارۋاشىلىعى جانە ەرەكشە قورعالاتىن تابيعي اۋماقتار ماسەلەلەرى بويىنشا زاڭ جوبالارى ءبىرىنشى وقىلىمدا ماقۇلدانعان ەدى.
سونىمەن قاتار 20 عا جۋىق دەپۋتات ۇكىمەت مۇشەلەرىنىڭ اتىنا ساۋال جولدادى. ماسەلەن، دۇيسەنباي تۇرعانوۆ وسىمەن ءۇشىنشى پرەمەر-ءمينيستردىڭ اتىنا ءتورتىنشى رەت جولداعان ساۋالى جايىق وزەنىن ەرەكشە مەملەكەتتىك ماڭىزى بار سۋ وبەكتىلەرى تىزبەسىنە ەنگىزۋگە قاتىستى بولدى.
- جايىق وزەنى ءوزىنىڭ اسا زور ماڭىزدىلىعىنا قاراماستان، بۇل تىزىمگە ءالى كۇنگە دەيىن ەنگىزىلمەگەن. بۇل ماماندار مەن ءوڭىر حالقى تاراپىنان ۇلكەن الاڭداۋشىلىق پەن تۇسىنبەۋشىلىك تۋعىزىپ وتىر، - دەدى ول.
بولات كەرىمبەك «بايقوڭىر» عارىش ايلاعىنىڭ وبەكتىلەرىندە قازاقستان مەنشىگىندەگى كولىك قۇرالدارىنا تەحنيكالىق پاسپورت بەرۋ، تىركەۋ جۇمىستارىن رەتتەۋ قاجەتتىگىن ايتسا، ەرلان سايروۆ «تاۋارلى نەسيە» باعدارلاماسىن جەدەل قابىلداپ، ىسكە اسىرۋ كەرەكتىگىن العا تارتادى.
اۆتور
مارلان جيەمباي