ءماجىلىس قازاقستان ەكونوميكاسىنا ەلەۋلى ۇلەس قوساتىن قۇجاتتى ماقۇلدادى

استانا. KAZINFORM - بۇگىن ءماجىلىستىڭ جالپى وتىرىسىندا «2009-جىلعى 9-ماۋسىمداعى ەۋرازيالىق تۇراقتاندىرۋ جانە دامۋ قورىن قۇرۋ تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ قابىلداندى.

ق ر قارجى ۆيتسە-ءمينيسترى داۋرەن كەڭبەيىلدىڭ ايتۋىنشا، ەۋرازيالىق تۇراقتاندىرۋ جانە دامۋ قورى 6 مەملەكەت تاراپىنان 2009-جىلى داعدارىسقا قارسى ايماقتىق مەحانيزم رەتىندە قۇرىلدى.

قازاقستان مەن رەسەي - بۇل قوردىڭ دونورلارى. قوردىڭ نەگىزگى مىندەتى - بيۋجەتتى قولداۋعا جانە بازالىق ينفراقۇرىلىمدى دامىتۋ جونىندەگى ءىرى مەملەكەتتىك جوبالار مەن الەۋمەتتىك سەكتورعا تۇراقتاندىرۋشى قارجىلاندىرۋدى قامتاماسىز ەتۋ.

- جيناقتالعان تاجىريبە مەن الەمدىك ەكونوميكالىق ساياساتتاعى وزگەرىستەردى ەسكەرە وتىرىپ، قوردىڭ قىزمەتىن قايتا قاراۋ قاجەت. حاتتاماعا سايكەس، كەلەسىدەي تۇزەتۋلەر ەنگىزىلىپ وتىر. ولار: قوردى تولىققاندى دەربەس حالىقارالىق ۇيىمعا اينالدىرۋ، قوردىڭ شتاب-پاتەرىن استانا قالاسىندا اشۋ، جوبالار مەن باعدارلامالاردى قارجىلاندىرۋ ءۇشىن ۇلتتىق ۆاليۋتالاردى پايدالانۋ، تەحنيكالىق كومەكتى ۇسىنۋ، قوردا داۋىس بەرۋ پرينتسيپىن انىقتاۋ. بۇل تۇرعىدا قوردى تولىققاندى دەربەس حالىقارالىق ۇيىمعا اينالدىرۋ قوردىڭ جۇمىسىن جانداندىرۋعا مۇمكىندىك بەرەدى. جاڭا مارتەبەنى الۋ ارقىلى قوردىڭ قىزمەتى قازاقستاننىڭ ەكونوميكاسىنا دا ەلەۋلى ۇلەس قوسادى دەگەن سەنىمدەمىز، - دەدى د. كەڭبەيىل.

بۇدان بۇرىن حابارلانعانداي، بۇگىن ءماجىلىس دەپۋتاتتارى «جاساندى ينتەللەكت تۋرالى» نەگىزگى زاڭ مەن ەكى ىلەسپە زاڭنىڭ جوبالارىن ءبىرىنشى وقىلىمدا ماقۇلدادى.