ءماجىلىس ۇلتتىق قوردان بالالارعا تولەم جاساۋ زاڭىن قابىلدادى

بۇگىن ءماجىلىستىڭ جالپى وتىرىسىندا «كەيبىر زاڭنامالىق اكتىلەرگە قازاقستان رەسپۋبليكاسىنىڭ ۇلتتىق قورىنان بالالارعا تولەم جاساۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى ەكىنشى وقىلىمدا قارالىپ، قابىلداندى، دەپ حابارلايدى قازاقپارات ءتىلشىسى.

زاڭ جوباسى پارلامەنت ماجىلىسىنە بيىلعى 23-مامىردا ەنگىزىلدى. وعان پارلامەنت دەپۋتاتتارى باستاماشىلىق ەتتى. 14- ماۋسىمدا ءماجىلىستىڭ جالپى وتىرىسىندا زاڭ جوباسى ءبىرىنشى وقىلىمدا ماقۇلداندى.

«قۇجاتتا ۇلتتىق قوردىڭ جىل سايىنعى ينۆەستيتسيالىق كىرىسىنىڭ 50 پايىزىن بالالارعا 18 جاسقا تولعانعا دەيىن ولاردىڭ ارنايى جيناقتاۋ شوتتارىنا اۋدارۋ ەسكەرىلگەن. زاڭ جوباسىنىڭ نەگىزگى ماقساتىندا بالالاردىڭ 18 جاسقا تولعانعا دەيىن نىسانالى جيناقتاۋشى شوتتارىندا اقشالاي جيناق تۇرىندە مەملەكەتتەن العاشقى كومەك الۋى قامتىلعان. سونىمەن قاتار قۇجاتتا تۇرعىن ءۇي جاعدايىن جاقسارتۋعا نەمەسە جيناقتاۋ ارقىلى ءبىلىم الۋعا مۇمكىندىك بەرۋ تالاپتارى قاراستىرىلعان»، - دەدى دەپۋتات بەرىك بەيسەنعاليەۆ.

ايتۋىنشا، بالا 18 جاسقا تولعانعا دەيىن ەسەپكە جازىلعان قاراجات ۇلتتىق قوردا بولادى جانە ق ر ۇلتتىق بانكى قارجاتتى ينۆەستيتسيالاۋدى جالعاستىرادى.

«بارلىق بالالارعا تەڭ ءتاسىل قامتاماسىز ەتىلەدى، ياعني بالانىڭ تۋعان كۇنىنەن باستاپ نەمەسە بالانىڭ قازاقستان رەسپۋبليكاسىنىڭ ازاماتتىعىن العان كۇنىنەن باستاپ 18 جاسقا تولعانعا دەيىن ونىڭ باعدارلاماعا قاتىسقان ءتيىستى جىلى ءۇشىن ءاربىر بالانىڭ شوتىنا بىردەي سوما اۋدارىلاتىن بولادى. شوتتا جيناقتالعان قاراجاتتى 18 جاسقا تولعاننان كەيىن عانا پايدالانۋ مۇمكىندىگى بەرىلەدى. سونىمەن قاتار تولەنەتىن قاراجات سالىق سالۋدان بوساتىلادى»، - دەدى دەپۋتات.

زاڭ جوباسىن قاراۋ بارىسىندا جۇمىس توبىنىڭ وتىرىستارىندا جەكەلەگەن نورمالاردى جەتىلدىرۋ ماقساتىندا ءبىرقاتار تۇزەتۋلەر قابىلداندى، ونىڭ ىشىندە:

- قازاقستان رەسپۋبليكاسىنىڭ ۇكىمەتى مەن مەملەكەتتىك ورگاندارىنىڭ قۇزىرەتى، سونداي-اق كۆازيمەملەكەتتىك ۇيىمدار مەن نىسانالى جيناقتاردى ەسەپكە جازۋدى، ەسەپكە الۋدى، تولەۋدى جانە قايتارۋدى جۇزەگە اسىراتىن ۇيىمداردىڭ قۇزىرەتى ناقتىلاندى؛

- نىسانالى جيناقتار مەن ولاردىڭ تولەمدەرىن توقتاتا تۇرۋ، تىيىم سالۋ، تاركىلەۋ مۇمكىندىگىن شەكتەۋ جونىندەگى شارالار ناقتىلاندى؛

- ءبىرىڭعاي جيناقتاۋشى زەينەتاقى قورىنىڭ نىسانالى تالاپتاردى ەسەپكە الۋدى جۇرگىزۋ ءتارتىبىن باقىلاۋدى جۇزەگە اسىرۋ بويىنشا قازاقستان رەسپۋبليكاسى قارجى نارىعىن رەتتەۋ جانە دامىتۋ اگەنتتىگىنىڭ قۇزىرەتى ناقتىلاندى؛

- كامەلەتكە تولماعاندار مەن كامەلەتكە تولعانداردىڭ نىسانالى جيناقتارعا قاتىسىپ، كەيىننەن تولەمدەردى الۋ، سونداي-اق وسى تولەمدەردى الۋ قۇقىعىن توقتاتۋ قۇقىقتارى ناقتىلاندى؛

- نىسانالى جيناقتارعا قاتىسۋشى نەمەسە الۋشى قايتىس بولعان نەمەسە سوتتىڭ شەشىمى بويىنشا قايتىس بولدى دەپ تانىلعان جاعدايدا، مۇراگەرلەردىڭ نىسانالى جيناق تولەمدەرىن الۋ قۇقىقتارى ناقتىلاندى.