ءماجىلىس دەپۋتاتى ەلىمىزدەگى سۋ تاسقىنى كەزىندە ايىپپۇل سوماسىن ازايتۋدى ۇسىندى

استانا. KAZINFORM - بۇگىن ءماجىلىستىڭ جالپى وتىرىسىندا «جول ءجۇرىسى تۋرالى» زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قاراۋ كەزىندە دەپۋتات ەرلان سايروۆ ەلىمىزدە ايىپپۇل سوماسىن تومەندەتۋدى ۇسىندى.

«ايىپپۇل كولەمى بويىنشا قازاقستان ت م د ەلدەرىنىڭ الدىندا تۇر. ماسەلەن، تەڭگەگە شاقساق رەسەيدە ايىپپۇل 3 مىڭ تەڭگەدەن باستالادى، بەلارۋستە 5 مىڭ تەڭگەدەن، ال قازاقستاندا 17 مىڭ تەڭگەدەن باستالادى. بۇل قازىر پروفيلاكتيكا ەمەس، ازاماتتارعا قارسى قارجىلىق رەپرەسسيا ءتارىزدى. قازىرگى قازاقستانداعى وتە كۇردەلى گۋمانيتارلىق جاعدايدا وسى ايىپپۇلدار ازاماتتاردى شارشاتىپ جىبەرەتى انىق. بۇگىن ماجىلىستە ءبىرىنشى وقىلىمدا تالقىلانعان زاڭ جوباسى اياسىندا وسى ايىپپۇلدى ازايتۋ نەمەسە بەلگىلى ءبىر راقىمشىلىق جاسايتىن جاعداي بار ما؟»، - دەپ سۇرادى ە. سايروۆ.

ءوز كەزەگىندە ق ر ىشكى ىستەر ءمينيسترىنىڭ ورىنباسارى يگور لەپەحا قابىلدانعان شارالارعا قاراماستان بىلتىر جول-كولىك اپاتى ءبىرشاما وسكەنىن ايتتى.

«ال بيىلعى ءبىرىنشى توقساندا اپاتتىلىق 70 پايىزعا ءوستى. ياعني قابىلدانىپ جاتقان شارالار جاعدايدى تۇراقتاندىرۋعا مۇمكىندىك بەرمەي وتىر. ەكىنشىدەن، بۇگىنگى زاڭ جوباسىندا ايىپپۇلدار ناقتى ءبىر جاعدايلارعا قاتىستى وسەدى. اتاپ ايتقاندا، جول ەرەجەسىن ورەسكەل بۇزعاندارعا جازا كۇشەيتىلەدى. ال كولىك جىلدامدىعىن 10 ك م/ساعات شاماسىندا اسىرعاندارعا ايىپپۇل وسپەيدى. جىلدامدىقتى تىم جوعارى اسىرعاندارعا ايىپپۇل كوبەيەدى»، - دەدى ي. لەپەحا.

بۇدان بۇرىن حابارلانعانداي، بۇگىن ءماجىلىستىڭ جالپى وتىرىسىندا «جول ءجۇرىسى تۋرالى» زاڭىنا جەكەلەگەن كولىك قۇرالدارى تۇرلەرىنىڭ ءجۇرۋىن ۇيىمداستىرۋ جانە جول قاۋىپسىزدىگىن سيفرلاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.

اتاپ ايتقاندا، كولىك قۇرالدارىنىڭ جىلدامدىعىن رۇقسات ەتىلگەن جىلدامدىقتان 60 ك م/ساعات جانە ودان جوعارى شامادا اسىرعانى ءۇشىن 40 ا ە ك مولشەرىندە ايىپپۇل سالۋدى كوزدەيتىن نەعۇرلىم قاتاڭ جاۋاپتىلىق ەنگىزۋ ۇسىنىلعان.