ءماجىلىس دەپۋتاتى كيىك مۇيىزىنە قاتىستى سوتتالعانداردىڭ ماسەلەسىن كوتەردى

استانا. KAZINFORM - بۇگىن ءماجىلىستىڭ جالپى وتىرىسىندا دەپۋتات ابزال قۇسپان كيىك مۇيىزىنە قاتىستى ءىستى بولعان ادامداردىڭ ماسەلەسىن كوتەردى.

«كيىكتىڭ دەريۆاتتارى ءۇشىن كورىنەۋ زاڭسىز، ادىلەتسىز سوتتالىپ جاتقان اۋىل ازاماتتارىنىڭ جاعدايىن ايتقىم كەلىپ وتىر. كيىكتىڭ دەريۆاتتارى، ياعني ءمۇيىزى ءۇشىن سوتتالىپ جاتقاندار - اڭ اتۋدى كاسىپ قىلعان براكونەرلەر ەمەس نەمەسە ۇيىمداسقان قىلمىستىق توپتار ەمەس، قاراپايىم اۋىل تۇرعىندارى. ولاردى ادىلەتسىز سوتتالدى دەۋىمە ناقتى دالەل رەتىندە وقىپ تانىسقان جۇزدەن استام سوت اكتىسى بار. كيىكتى اتپاعان، ءبىراق ونىڭ ءمۇيىزىن ساتقان (جيناعان، ساقتاعان، تاسىمالداعان) ادامداردى قورشاعان ورتاعا ميلليونداعان، ءتىپتى ميللياردتاعان تەڭگەگە زالال كەلتىردى دەپ، جاپپاي سوتتاۋ پراكتيكاسى 2021 -جىلدىڭ تامىز ايىنان باستالدى. وعان نەگىز - جوعارعى سوتتىڭ سول كەزدەگى قىلمىستىق ىستەر جونىندەگى القا ءتوراعاسى بولعان ابدراشيت جۇكەنوۆتىڭ وبلىستىق سوت باسشىلارىنا جولداعان نۇسقاۋ- حاتى. حات قىلمىستىق كودەكستىڭ 339-بابىن تۇسىندىرۋ/رازياسنەنيە دەپ اتالعانىمەن، ءمانى بويىنشا تىكەلەي نۇسقاۋ فورماسىندا راسىمدەلگەن. ول حاتتىڭ جازىلۋىنا ءوز كەزەگىندە سول كەزدەگى باس پروكۋرور عيزات نۇردىۋلەتوۆتىڭ اقپاراتى نەگىز بولعان»، - دەدى ابزال قۇسپان ق ر باس پروكۋرورى بەرىك اسىلوۆتىڭ اتىنا جولداعان ساۋالىندا.

ونىڭ ايتۋىنشا، وسىنىڭ سالدارىنان، كيىكتى اتۋعا قاتىسى جوق ازاماتتار بۇرىن قىلمىستىق كودەكستىڭ 339-بابىنىڭ 1-بولىگىمەن سوتتالىپ كەلسە، 2021 -جىلدىڭ تامىز ايىنان باستاپ ولاردىڭ ارەكەتى سول باپتىڭ 3-بولىگىمەن دارەجەلەنىپ، مويىندارىنا جۇزدەگەن ميلليوننان بىرنەشە ميللياردتاعان سوماعا ايىپپۇلدار سالىنىپ، ناقتى باس بوستاندىعىنان ايىرۋعا سوتتالىپ جاتىر.

«بۇل جەردە مەن زەردەلەگەن سوت اكتىلەرىندەگى نەگىزگى قاتەلىك - ول كەز كەلگەن قىلمىستىق ىسكە قاتىستى قولدانىلاتىن باستى پرينتسيپ - قىلمىستىق ارەكەت پەن ودان كەلگەن زالالدىڭ اراسىنداعى سەبەپ- سالدارلىق بايلانىستىڭ انىقتالماۋى. بارلىق جاعدايدا ءىس ءبىر سسەناريمەن جۇرەدى، ياعني كيىكتىڭ مۇيىزدەرى تابىلادى، ءىس قوزعالىپ، ۇكىمەت تاراپىنان ەكولوگيا مينيسترلىگىنىڭ ۋاكىلەتتى كوميتەتى ارقىلى كيىكتىڭ قۇنى شىعارىلادى (ءبىر كيىك 2,5 ميلليون). ال تەرگەۋ ورگاندارى مەن سوت ازاماتتى كيىكتى ءولتىرۋ ارقىلى تابيعاتقا اسا ءىرى مولشەردە زيان كەلتىرگەنى ءۇشىن سوتتايدى. ول كيىكتىڭ ءولۋ سەبەبى انىقتامايدى. ودان باسقا، سوت سول كيىكتىڭ مۇيىزدەرىن ءبىر تيىندىق قۇنى جوقتىعى سەبەپتى، قاجەتى بولماۋىنا بايلانىستى ورتەۋگە ۇكىم شىعارادى. سوتتىڭ دا، ۇكىمەتتىڭ دە ارەكەتتەرىندە زاڭ بىلاي تۇرسىن، ەشقانداي لوگيكا جوق»، - دەدى دەپۋتات.

بۇل تۇرعىدا ول جاز كەزىندە وسى جاعدايلارمەن سوتتالعان ازاماتتاردىڭ تۋىستارىمەن جۇزدەسىپ، ب ق و ادۆوكاتتار القاسىندا جينالىس وتكىزگەنىن ايتتى.

«ءبارىنىڭ ايتاتىنى - جوعارعى سوتتان كەلگەن نۇسقاۋ حات. پاۆلودار قالاسىنداعى تۇرمەدە جازاسىن وتەپ جاتقاندارمەن دە كەزدەستىم. ول جەردە 58 ازامات وتىر، ءارقايسىسىنىڭ موينىندا مىنا عۇمىرلارىندا وتەپ بولا المايتىن زالال بار، وسىنىڭ سالدارىنان كوپتەگەن وتباسىلار اجىراسىپ جاتىر. ەڭ سوراقىسى، ىشتەرىندە بىردە- ءبىر براكونەر جوق»، - دەدى ول.

وسى ورايدا ا. قۇسپان باس پروكۋرور تاراپىنان بۇعان دەيىن جوعارعى سوتقا جولدانعان اقپاراتتى كەرى قايتارۋدى سۇرادى.

«ەكىنشىدەن، جوعارعى سوتتىڭ وبلىستىق سوت ءتوراعالارىنا جولداعان 2021 -جىلعى تامىزداعى نۇسقاۋ- حاتتىڭ كۇشىن جويۋ كەرەك. ۇشىنشىدەن، قىلمىستىق كودەكستىڭ 339-بابى، 3-بولىگىمەن شىققان سوت ۇكىمدەرىنە تالداۋ جۇرگىزىپ، نارازىلىق بەرۋدى سۇرايمىن»، - دەدى دەپۋتات.

اۆتور

رۋسلان عابباسوۆ