ءماجىلىس دەپۋتاتتارى قازاق مەكتەپتەرىندە ورىس ءتىلىن 5-سىنىپتان باستاپ وقىتۋدى سۇرادى
كەشە ماجىلىستە الەۋمەتتىك-مادەني دامۋ كوميتەتىنىڭ «وقۋ باعدارلامالارىنىڭ مازمۇنىن جاڭارتۋ» ماسەلەسىنە ارنالعان تاقىرىپتىق وتىرىس ءوتتى. جيىن بارىسىندا ءماجىلىس دەپۋتاتتارى رينات زايىتوۆ پەن داۋلەت مۇقايەۆ قازاق سىنىپتارىنداعى ورىس ءتىلى وقۋلىقتارىنىڭ كۇردەلىلىگىن سىنعا الدى، - دەپ حابارلايدى Massaget.kz.
داۋلەت مۇقايەۆ ورىس ءتىلى وقۋلىقتارىنىڭ تاپسىرمالارىنىڭ شامادان تىس اۋىر ەكەنىن ايتىپ، باعدارلامالاردى جەڭىلدەتۋدى ۇسىندى.
«ورىس تىلىندە ولەڭ جاتتاپ كەل دەگەن تاپسىرما بەرىلەدى. اتا-انا رەتىندە ولاردى وقىتۋ ماعان دا، بالالارعا دا قيىن. ورىسشا وقيتىن بالالارعا جۇرگىزىلەتىن قازاق ءتىلىنىڭ وقۋلىعىن قاراساڭىزدار، جەپ-جەڭىل، بەس ءارىپتى قويىپ، مىندا «قاي ءارىپ جەتپەي تۇر» دەپ سۇرايدى. ۇ ب ت-دا دا سونداي. ءبىز بالالارىمىزدان ورىس ءتىلدى فيلولوگ دايىنداپ جاتقان سياقتىمىز. «پريچاستنىي وبوروت، دەەپريچاستنىي وبوروت» دەگەن سويلەمدەرى بار. ودان كەيىن وزگە دە ولەڭدەردى جاتتاتىپ، ءبىز بالالاردى قيناپ جاتىرمىز. مەكتەپتەگى وقۋلىقتاردى جەڭىلدەتۋ كەرەك دەپ ەسەپتەيمىن. ەكىنشىدەن، قازاق ءتىلىنىڭ گرامماتيكاسىن مۇلدەم جوعالتىپ جاتىرمىز. پەداگوگ بولا وتىرىپ، «иә» دەگەن ەكى ءارىپتى «я» دەپ جازاتىنداردى ءوز كوزىممەن كورگەنمىن. я دەپ جازىپ وتىرعان مۇعالىمنىڭ ءوزى بالالارعا قانداي ءبىلىم بەرەدى؟! سىزدەردىڭ پرەزەنتاتسيالارىڭىزدىڭ وزىنەن بىرنەشە قاتە كوردىم»، - دەپ پىكىر ءبىلدىردى ول.
ال رينات زايىتوۆ قازاق مەكتەپتەرىندە ورىس ءتىلىن وقىتۋدى باستاۋىش سىنىپتان كەيىن عانا قولعا الۋ كەرەك دەپ پىكىر ءبىلدىردى.
«بالالاردىڭ ورىس تىلىندە وقي المايتىنى مەنىڭدە باسىمدا بار جاعداي. بەسىنشى سىنىپقا دەيىن تەك انا تىلىندە وقىتۋعا رۇقسات بەرىڭىزدەر. مەن بالامدى كوپ تىلدە وقىتقىم كەلمەيدى. ناتيجەسىن وسى جەردە وتىرعان ءبىراز ادامداردان كورىپ وتىرمىن، نە قازاقشا، نە ورىسشا سويلەي المايدى»، - دەدى دەپۋتات.
جيىن بارىسىندا جاۋاپتى مەكەمە باسشىلارىنىڭ قويىلعان سۇراقتارعا تولىق جاۋاپ بەرە الماۋى دەپۋتاتتاردىڭ نارازىلىعىن تۋدىردى.
«وقۋلىقتىڭ ىشىندە نە بار ەكەنىن وزدەرىڭىز بىلمەيسىزدەر مە؟ نەگە سۇيەنىپ جاۋاپ بەرىپ وتىرسىزدار؟ ادەپتى بالا دەگەننىڭ انىقتاماسىن ايتا الماي وتىرسىزدار، ۇيات! اتام قازاق «ادەپتى بالا ارلى بالا، ادەپسىز بالا سورلى بالا» دەگەن. دايىندىقسىز كەلسەڭىزدەر، نەسىنە سۇراق قويامىن؟» - دەپ اشۋلاندى زايىتوۆ.
ايتا كەتەيىك، وتىرىستىڭ بايانداماشىسى وقۋ-اعارتۋ ءبىرىنشى ۆيتسە-ءمينيسترى ناتاليا جۇمادىلدايەۆا جيىنعا كەلمەدى.