قازاقستاننىڭ تابيعاتى الەمنىڭ ميلليونداعان كورەرمەنىنە ۇسىنىلدى. تانىمال تريەۆەل-دوكۋمەنتاليست دجو حاتتاب YouTube ارناسىندا قازاقستانعا ارنالعان جاڭا ۆيدەوسىن جاريالاپ، ەلدىڭ تابيعاتى مەن زاماناۋي كەلبەتىن ەرەكشە فورماتتا كورسەتتى.
بەينەماتەريالدى تۇسىرۋگە قازاقستاندىق تريەۆەل-بلوگەر داستان مۇحامەدراحىم (ByDastann) مەن امەريكالىق بلوگەر MegaAmerican دە قاتىسقان. داستان شەتەلدىك قوناقتارعا قازاقستان بويىنشا جول كورسەتىپ، ءتۇسىرىلىم بارىسىندا ەلدىڭ تابيعي جانە مادەني ەرەكشەلىكتەرىن تانىستىرعان. بۇل ساپار تۋرالى بۇعان دەيىن دە حابارلانعان بولاتىن.
ۆيدەونىڭ باستى ەرەكشەلىگى - قازاقستاننىڭ ءارتۇرلى لاندشافتتارىنىڭ ءبىر تۋىندىدا توعىسۋى. كادرلاردا ىلە الاتاۋىنىڭ تابيعاتى، گۇلگە ورانعان جايلاۋلار، ماڭعىستاۋدىڭ عاجايىپ ءارى عارىشتىق پەيزاجدارى جانە ەلورداداعى فۋتۋريستىك ساۋلەت كورىنىس تاپقان.
قازاقستاندىق كورەرمەندەردى اسىرەسە بەينەنىڭ ۆيزۋالدى ساپاسى تاڭعالدىردى. دجو حاتتابتىڭ جۇمىستارى كينەماتوگرافيالىق ستيلىمەن ەرەكشەلەنەتىنى بەلگىلى. ونىڭ YouTube ارناسىندا 20 ميلليوننان استام جازىلۋشى بار، سوندىقتان قازاقستان تۋرالى مۇنداي كونتەنتتىڭ حالىقارالىق اۋديتورياعا شىعۋى ەلدىڭ تۋريستىك الەۋەتىن تانىتۋعا مۇمكىندىك بەرەدى.
بۇعان دەيىن حاتتاب قازاقستانعا كەلگەن كەزدە ىلە الاتاۋىنداعى جايلاۋدا ۇلتتىق كيىم كيىپ، اتقا ءمىنىپ، بۇركىتشىلەرمەن كەزدەسكەن. ول قازاقتىڭ ءداستۇرلى تاعامدارىنان ءدام تاتىپ، كوشپەلى مادەنيەتپەن جاقىنىراق تانىسقان. ساپار بارىسىندا كولساي سياقتى تۋريستىك ورىندارعا دا بارعان.
قازاقستاندىقتار جاڭا چەللەندج باستادى
داستان مۇحامەدراحىم ءوز وقىرماندارىنا جاڭا ۆيدەونى بەلسەندى قولداپ، پىكىر قالدىرۋعا شاقىردى. ونىڭ ايتۋىنشا، بۇل وزىندىك چەللەندجگە اينالىپ، قازاقستاندىقتار دجو حاتتابتىڭ ەڭ تانىمال ۆيدەولارىنىڭ بىرىمەن پىكىر سانى بويىنشا باسەكەگە تۇسە الادى.
بلوگەر مىسال رەتىندە حاتتابتىڭ سالۆادورداعى اسا قاتاڭ رەجيمدەگى تۇرمە تۋرالى دەرەكتى فيلمىن كەلتىردى. اتالعان ۆيدەو 100 ميلليوننان استام قارالىم جيناپ، ونداعان مىڭ پىكىر قالدىرىلعان حاتتابتىڭ ەڭ رەزونانستى جۇمىستارىنىڭ بىرىنە اينالعان. اشىق اناليتيكالىق دەرەكتەر دە بۇل ۆيدەونى ونىڭ ارناسىنداعى 100 ميلليوننان اسقان ەڭ تانىمال جۇمىستاردىڭ ءبىرى رەتىندە كورسەتەدى.
ەندى قازاقستاندىق كورەرمەندەر قازاقستان تۋرالى جاڭا فيلمنىڭ وسى كورسەتكىشكە قانشالىقتى جاقىندايتىنىن باقىلاپ وتىر. داستاننىڭ ايتۋىنشا، ەلدەگى اۋديتوريانىڭ بەلسەندىلىگى جوعارى بولسا، قازاقستان تۋرالى ۆيدەو حاتتابتىڭ ەڭ كوپ تالقىلانعان تۋىندىلارىنىڭ بىرىنە اينالۋى مۇمكىن.
ايتا كەتەيىك، دجو حاتتابپەن بىرگە قازاقستانعا امەريكالىق تريەۆەل-كرەاتور دجوشۋا پلاتيلەرو، ياعني MegaAmerican دە كەلگەن. ال داستان مۇحامەدراحىم 2026 -جىلعى WIBA Awards حالىقارالىق سىيلىعىندا «الەمنىڭ ۇزدىك تريەۆەل- بلوگەرى» اتانعان.
وسىلايشا، قازاقستاننىڭ تاۋى، دالاسى، شولەيتتەرى مەن زاماناۋي قالالارى ەندى وتاندىق اۋديتورياعا عانا ەمەس، الەمنىڭ ونداعان ميلليون كورەرمەنىنە ۇسىنىلىپ وتىر.