جوبانىڭ ماقساتى - ونەر ارقىلى وسكەلەڭ ۇرپاقتىڭ بويىندا وتانسۇيگىشتىك سەزىمدى قالىپتاستىرۋ، تۋعان جەرگە دەگەن قۇرمەتتى ارتتىرۋ، ۇلتتىق قۇندىلىقتاردى دارىپتەۋ جانە ەل بىرلىگىن ناسيحاتتاۋ.
بەينەجوبانىڭ كوركەمدىك جەلىسىندە ونەر مەكتەبىنىڭ دومبىرا سىنىبىندا وقيتىن وزگە ۇلت وكىلدەرىنىڭ وتان تۋرالى ديالوگى كورىنىس تاپقان. ولار ورتاق شاڭىراقتىڭ قادىرى مەن قازاقستاندا ءومىر سۇرەتىن ءتۇرلى ەتنوس وكىلدەرىن بىرىكتىرەتىن باستى قۇندىلىق - وتان تۋرالى وي قوزعايدى.
ديالوگتان كەيىن جوبا ۇلتتىق ونەردىڭ قۇدىرەتىمەن جالعاسادى. № 2-ونەر مەكتەبىنىڭ 100 دەن استام دومبىراشى وقۋشىسى قازاق حالقىنىڭ رۋحىن، ۇلتتىق بولمىسى مەن ەلدىك مۇراتىن ايشىقتايتىن «ەر تۇران» كۇيىن ورىندايدى. كۇيدىڭ كۇمبىرلەگەن ءۇنى ارقىلى جاس ونەرپازدار حالقىمىزدىڭ باي مۋزىكالىق مۇراسىن ۇلىقتاپ، ۇلتتىق رۋحتى اسقاقتاتادى.
سونىمەن قاتار 20 عا جۋىق جاس سۋرەتشى ءوز شىعارماشىلىعى ارقىلى قازاقستانعا دەگەن سۇيىسپەنشىلىگىن بىلدىرەدى. ولار ەلىمىزدىڭ تابيعاتىن، تۋعان جەردىڭ سۇلۋلىعىن، بەيبىت ءومىر مەن جارقىن بولاشاققا دەگەن سەنىمدى بەينەلەيتىن تۋىندىلار ۇسىنادى.
مۋزىكا مەن بەينەلەۋ ونەرىن توعىستىرعان بۇل جوبا جاس ۇرپاقتىڭ تۋعان ەلگە دەگەن قۇرمەتىن ونەر تىلىمەن جەتكىزەتىن شىعارماشىلىق باستاماعا اينالدى.
رەسپۋبليكا كۇنى - مەملەكەتتىلىگىمىزدى ايشىقتاپ، ەلدىگىمىزدى بەكەمدەيتىن، ورتاق وتانىمىزعا دەگەن ماقتانىش سەزىمىن نىعايتاتىن مەرەكە. «ءبىزدىڭ ءۇن - وتان» بەينەجوباسى وسى قۇندىلىقتاردى جاس ۇرپاقتىڭ ونەرى ارقىلى دارىپتەۋگە باعىتتالعان.
ايتا كەتەيىك، رەسپۋبليكا كۇنى قارساڭىندا استانانىڭ بارلىق مەكتەبىندە وقۋشىلارعا ارنالعان ءبىرىڭعاي سىنىپ ساعاتتارى ۇيىمداستىرىلدى. ساباقتاردا ەل تاريحى، ەگەمەندىكتىڭ ماڭىزى مەن ۇلتتىق قۇندىلىقتار تۋرالى ايتىلدى.