ەلىمىزدىڭ ءار وڭىرىنەن ىرىكتەلگەن 100 اسكەري قىزمەتشى ون كومانداعا ءبولىنىپ، توزىمدىلىك، ءتارتىپ پەن كوماندالىق رۋحتى تالاپ ەتەتىن ءتۇرلى سىناقتان وتەدى. «بۇگىن. Live» رەاليتي- شوۋىندا جوبا قاتىسۋشىلارى نۇرداۋلەت ەسداۋلەتوۆ پەن اقنيەت دۇيسەن ءتۇسىرىلىم جۇمىستارى تۋرالى ايتىپ بەردى.
2024-جىلى ەفيرگە شىققان «100 Sarbaz» جوباسى قازاق تەلەۆيزياسىنداعى اسكەري سالاعا ارنالعان العاشقى ءىرى رەاليتي-جوبالاردىڭ ءبىرى بولدى. بيىل كورەرمەنگە ونىڭ جاڭا ماۋسىمى ۇسىنىلىپ وتىر.
تاڭعى 5 تە ويانۋ، تاۋلىك بويى كامەرا باقىلاۋىندا بولۋ، سۋىققا توتەپ بەرۋ جانە كۇردەلى تاپسىرمالاردى ورىنداۋ - قاتىسۋشىلاردى كۇتىپ تۇرعان سىناقتاردىڭ ءبىر بولىگى عانا. جوبانىڭ العاشقى شىعارىلىمىندا-اق ساربازداردىڭ قاتاڭ تارتىپكە باعىنۋعا جانە جاڭا جاعدايعا بەيىمدەلۋگە ءتيىس ەكەنى بايقالدى.
- ەفيردى بارلىق جاقىندارىم اسىعا كۇتتى. كورگەننەن كەيىن سىناقتاردىڭ شىنىمەن قيىن ەكەنىن ايتىپ جاتىر. بۇل ءالى باستاماسى، الدا تاعى 8 ەفير بار. رەاليتي-شوۋ بولعاندىقتان، وزىمىزگە دە قىزىق بولدى. ارينە، قيىندىقتار كەزدەستى. كورەرمەندەر دە ونىڭ وڭاي ەمەس ەكەنىن ءوز كوزىمەن كورگەن شىعار، - دەدى نۇرداۋلەت ەسداۋلەتوۆ.
جوباداعى 100 سارباز ەلىمىزدىڭ ءار وڭىرىنەن كەلگەن اسكەري قىزمەتشىلەر اراسىنان ىرىكتەلىپ الىنعان. اقنيەت دۇيسەن اقكول قالاسىنداعى اسكەري بولىمدە كادرلىق وفيتسەر بولىپ قىزمەت ەتەدى. ال نۇرداۋلەت ەسداۋلەتوۆ استاناداعى 5-مامانداندىرىلعان ءورت ءسوندىرۋ بولىمىندە ءبولىم كومانديرى بولىپ جۇمىس ىستەيدى.
- العاشقى كۇنى-اق ءبىزدى دالاعا الىپ كەلدى. سۋىق دۋش قابىلدادىق، دالادا تاماق ءىشىپ، شاتىردا ۇيىقتادىق. اسكەردەن كەلگەنىمە ون جىلدان اسىپ كەتتى، سوندىقتان بۇل جاعدايعا ۇيرەنىسۋدىڭ ءوزى كۇردەلى بولدى. دەگەنمەن، ءبارىمىز جاقسى ارالاسىپ، ون كۇننىڭ ىشىندە باۋىرداي بولىپ كەتتىك. وتە تارتىستى جوبا بولدى، - دەيدى اقنيەت دۇيسەن.
قاتىسۋشىلار كۇن سايىن دەنە شىنىقتىرىپ، تاڭعى ساعات بەستە ويانعان. تاپسىرمالار الدىن الا ايتىلماعاندىقتان، ءار كوماندا وزدەرىن قانداي سىناق كۇتىپ تۇرعانىن بىلمەگەن.
- ناعىز اسكەري كۇن ءتارتىبى بولدى دەۋگە بولادى. ون ادامنان تۇراتىن كوماندالاردى ءار جاققا الىپ كەتىپ، قانداي تاپسىرما بەرىلەتىنىن الدىن الا ايتپادى. جوبادا سۋ دا، تاۋ دا، تاس تا، ءورت تە بولدى. مۇنىڭ ءبارى قىزىقتى ءوتتى. مەنىڭشە، بۇل جوبا جاستاردىڭ اسكەري ماماندىققا قىزىعۋشىلىعىن ارتتىرادى، - دەدى جوبا قاتىسۋشىلارى.
ەسكە سالا كەتسەك، بۇل جولى قاتىسۋشىلار تابيعات اياسىندا - بۋرابايدا سىنالعان. جوباعا ەلىمىزدىڭ ءتۇرلى اسكەري قۇرىلىمدارىنىڭ ساربازدارى قاتىستى. ولاردىڭ قاتارىندا دەسانتشىلار، قۇتقارۋشىلار، ارنايى جاساق وكىلدەرى مەن اسكەري كادەتتەر بار. سونىمەن بىرگە تانىمال سپورتشىلار، اكتەرلەر مەن بلوگەرلەردەن قۇرالعان كوماندا دا ءوز كۇشىن سىنادى.