ءۇشارال قالاسى اۋەجايىندا جاڭا تەرمينال سالىنادى

تالدىقورعان. KAZINFORM - قۇرىلىستىڭ ەكى نۇسقاسى قاراستىرىلۋدا: ءبىرىنشىسى - عيماراتتاردى كەلۋ جانە كەتۋ ايماقتارىنا بولە وتىرىپ، قولدانىستاعى تەرمينالدىڭ جانىنان شاعىن تەرمينال سالۋ؛ ەكىنشىسى - بىردەن ۇلكەن تەرمينال سالۋ.

بۇل تۋرالى كولىك ءمينيسترى مارات قارابايەۆتىڭ جەتىسۋ ءوڭىرى تۇرعىندارىمەن كەزدەسۋىندە بەلگىلى بولدى. قازىرگى ۋاقىتتا جەرگىلىكتى اتقارۋشى ورگان جوبانىڭ تەحنيكالىق- ەكونوميكالىق نەگىزدەمەسىن تالداپ، ازىرلەۋدە.

سونداي-اق، بۇگىنگى تاڭدا «سارىوزەك- كوكتال» جولىنىڭ 45-68- شاقىرىمدارى اراسىندا كۇردەلى جوندەۋ، ال 68-110 شاقىرىمدارى اراسىندا ورتاشا جوندەۋ جۇمىستارى اياقتالدى. كەلەسى جىلى 0-دەن 45- شاقىرىمعا دەيىن ورتاشا جوندەۋ جۇمىستارى جۇرگىزىلەدى. تيىسىنشە، جول تولىعىمەن رەتكە كەلتىرىلەدى.

جالپى ۇزىندىعى 762 شاقىرىمدى قۇرايتىن «تالدىقورعان- قالباتاۋ- وسكەمەن» جولىن قايتا جاڭعىرتۋ جۇمىستارى دا 2024 -جىلدىڭ سوڭىنا دەيىن اياقتالادى.

ءوڭىر تۇرعىندارىمەن ەركىن فورماتتا وتكەن كەزدەسۋدە ۆەدومستۆو باسشىسى مينيسترلىكتىڭ قۇزىرەتىنە كىرەتىن جانە وسى وڭىرگە قاتىستى سۇراقتارعا بارىنشا اشىق جاۋاپ بەردى.

قازاقستاندىقتاردىڭ سۇراقتارى اۆيابيلەتتەردى قايتارۋ، حالىقارالىق جۇك تاسىمالدارىنىڭ جۇرگىزۋشىلەرىنە ۆيزا بەرۋ جانە ت. ب. ماسەلەلەرگە قاتىستى بولدى.

اۆتور
اسحات رايقۇل