ءشامشى قالداياقوۆتىڭ ۇرپاقتارى كومپوزيتوردىڭ اندەرىنەن قانشا قالاماقى الىپ ءجۇر

استانا. KAZINFORM - ماجىلىستە كرەاتيۆتى ۇيىمداستىرۋدى دامىتۋعا ارنالعان زاڭ جوباسى تالقىلانىپ جاتىر. زاڭ جوباسىن ازىرلەپ جاتقان جۇمىس توبىنىڭ جەتەكشىسى، دەپۋتات نارتاي سارسەنعاليەۆ اۆتورلىق قوعامداردىڭ جۇمىسىن سىنادى.

«ءبىز كرەاتورلاردى تىزىمگە قوسىپ العانىمىزعا ءمازبىز، ءبىراق ولاردىڭ اۆتورلىق قۇقىعىن قورعاۋعا كەلگەندە ەشكىم باس اۋىرتقىسى كەلمەيدى. قاشانعىداي ءار كرەاتور ادۆوكات جالداپ، باسقانى جالداپ، سان سوعىپ، سابىلىپ جۇرۋگە ءماجبۇر. ەلىمىزدە 15-16 اۆتورلىق قوعام بار. ولاردىڭ جۇمىسىنا قاتىستى دا كوپتەگەن سىن بار. اۆتورلىق قوعامعا ادامنىڭ شىعارماسىن قولدانعانى ءۇشىن تۇسەتىن اقشانىڭ 70 پايىزىن قوعام ءوزى الىپ قالادى، 30 پايىزىن عانا اۆتورعا بەرەدى»، - دەدى ول.

نارتاي سارسەنعاليەۆ بىرنەشە جىل بۇرىن ءوزىنىڭ مۇقاعالي ماقاتايەۆتىڭ ولەڭىنە قالاي اۆتور اتانعانىن ەسكە الدى.

«2010 -جىلى ءبىز «الماتى» تەلەارناسىندا جۋرناليستىك زەرتتەۋ جۇرگىزىپ، ءبىر اۆتورلىق قوعامنان 20 مىڭ تەڭگەگە جۇمەكەن ناجىمەدەنوۆ پەن مۇقاعالي ماقاتايەۆتىڭ ءبىر-ءبىر ولەڭىنە اۆتور اتانعانبىز. ەشكىم تەكسەرىپ جاتقان جوق. مۇقاعالي مەن جۇمەكەندى تەكسەرمەگەندە، باسقالاردى تەكسەرەدى دەۋ قاتە شىعار.

ال ءشامشى قالداياقوۆتىڭ اندەرىن ورىنداعانى ءۇشىن اۆتورلىق قوعام كومپوزيتوردىڭ ۇرپاعىنا ءۇش ايدا 18 مىڭ تەڭگە عانا تولەگەن. جالپى بۇل قازاقتا ءشامشىنىڭ ءانىسىز وتكەن كەش بار ما؟ وكىنىشكە قاراي، بىزدەگى اۆتورلاردىڭ قۇقىعى قورعالمايتىنىن وسىدان-اق كورۋگە بولادى»، - دەدى دەپۋتات.

ادىلەت مينيسترلىگىنىڭ رەسمي مالىمەتى بويىنشا، 2023 -جىلى اۆتورلىق قۇقىق بويىنشا 300-گە جۋىق شاعىم تۇسكەن.

اۆتور
ەسىمجان ناقتىباي