ءۇش وبلىستىڭ اۋماعىندا اسكەري تەحنيكالار ءجۇرىپ وتەدى - قورعانىس مينيسترلىگى
استانا. KAZINFORM - قارۋلى كۇشتەردىڭ جاۋىنگەرلىك دايىندىق باعدارلاماسى شەڭبەرىندە 11-19- ناۋرىز ارالىعىندا قاراعاندى وبلىسىنىڭ اۋماعىندا ەكى جاقتى كوماندالىق-شتابتىق وقۋ-جاتتىعۋ وتەدى.
قورعانىس مينيسترلىگى باسپا ءسوز قىزمەتىنىڭ مالىمەتىنشە، جاۋىنگەرلىك دايىندىق ءىس-شارالارى كەزىندە قاراعاندى، الماتى، جەتىسۋ وبلىستارىنىڭ اۋماعىن ساربازدار مەن تەحنيكالار باسىپ وتەدى.
«وقۋ-جاۋىنگەرلىك مىندەتتەردى پىسىقتاۋ ماقساتىندا بولىمشەلەر پوليگوندارعا تەمىر جول، اۋە جانە اۆتوموبيل كولىگى ارقىلى ارالاس تاسىلمەن مارش جاسايدى. كەيىن تۇراقتى ورنالاسۋ پۋنكتتەرىنە ورالادى. قورعانىس مينيسترلىگى اتالعان كەزەڭدە ءوڭىردىڭ جەكەلەگەن اۋداندارىندا شەكتەۋ شارالارى ەنگىزىلۋى مۇمكىن ەكەنىن حابارلايدى. وسىعان بايلانىستى ازاماتتاردان ءوتىپ جاتقان وقۋ- جاتتىعۋلارعا تۇسىنىستىكپەن قاراۋدى جانە تىنىشتىق ساقتاۋدى سۇرايمىز. سونىمەن قاتار الەۋمەتتىك جەلىلەردى پايدالانۋشىلاردان اسكەري تەحنيكانىڭ قوزعالىسى تۋرالى جالعان حابارلامالار مەن بەينەماتەريالدار تاراتپاۋدى جانە تەك رەسمي اقپارات كوزدەرىنە سەنۋدى سۇرايمىز»، - دەلىنگەن مالىمدەمەدە.
ەستەرىڭىزگە سالا كەتەيىك، قولدانىستاعى زاڭنامادا جالعان اقپارات تاراتقانى ءۇشىن قىلمىستىق جاۋاپكەرشىلىك قاراستىرىلعان.