ءۇش قاتىن - بيجومارت قاپالبەك

استانا. قازاقپارات - باۋىرجان مومىش ۇلى «مىڭ قىز كۇيەۋگە تيسە، مىڭ ايەل بولادى. ءبىراق ىشىنەن ون-اق قاتىن شىعادى» دەگەن بولاتىن. بايقاسام، سونىڭ ۇشەۋى قاسىمدا جۇرگەن سياقتى. العاشقىسى مارقۇم وسكەن دوسىمنىڭ قوساعى - گۇلبانۋ.

وسەكەڭ كازگۋ-دىڭ قىز جايلاعان فيلولوگيا فاكۋلتەتىندە بەس جىل وقىپ، ەشكىمگە شالدىرماي، ءوزىنىڭ قىزىلورداسىنا بارىپ گۇلبانۋمەن باس قۇرىپ، ارتتارىنان ءبىر ۇل، ءبىر قىز ەرتتى.

قورقىت اتا اتىنداعى ۋنيۆەرسيتەتكە ۇلگىلى ۇستاز بولدى. ورالحان بوكەيدىڭ پوەتيكاسىنان مازمۇنى تەرەڭ عىلىمي ەڭبەك جازىپ، كانديداتتىق قورعادى. ۇلكەن ءۇي الىپ، استىنا ماشينا ءمىندى. بەينەتىنەن زەينەتى كوبەيە باستاعان قىرىقتىڭ بەل ورتاسىندا سۇم اجال ونى ارامىزدان جۇلىپ كەتتى.

وسەكەڭدى ساعىنىپ جولداستارى باس قوسىپ وتىرعان ءبىر ساتتەردە گۇلبانۋ: «دەنساۋلىعىمنىڭ كەسىرىنەن وسەكەڭە ەكى ءتۇيىر-اق بالا سىيلادىم. ەركەك دەگەن ۇرعاشىعا كوز سالماي تۇرمايدى. وسەكەڭ كەتكەننەن سوڭ باسقا جەردە ارتىندا بىردەڭە قالدى ما ەكەن دەپ قۇلاعىمدى ءتۇرىپ ءجۇردىم. ەرسۇلتانى مەن قارلىعاشىنىڭ ارتىنان ەرگەن ءىنى-قارىنداستارى بار شىعار دەپ ۇمىتتەندىم. ءبىراق ءالى ونداي قۋانىشتى ءبىر حابار ەستي الماي ءجۇرمىن» - دەدى.

ءبىز ەركەكتەر جاعى 21 - عاسىردا دا بارىنەن ۇرپاقتى جوعارى قويعان كەشەگى اجەلەرىمىزدىڭ سارقىنشاعى بار ەكەن-اۋ دەپ ءسۇيسىنىپ قالدىق. ال ايەلدەرىمىز، ءتىپتى ىشىندەگى كەز كەلگەن اڭگىمەگە ءسوز جارىستىرىپ قالاتىندارى دا ءبىر- بىرىنە قاراسىپ ءۇنسىز قالدى. كىم بىلەدى، ولار ىشىنەن وسەكەڭ جايراڭداپ قاسىندا ءتىرى وتىرسا، قالاي قىزعانباسىن، جوق بولعان سوڭ ساعىنىپ ايتقانى بولار - دەپ ويلاعان شىعار. ءبىراق گۇلبانۋدىڭ ءارى قارايعى اڭگىمەسى ولاردىڭ بۇل ويلارىنىڭ بىت-شىتىن شىعاردى.

قىزىلوردادا وسەكەڭنىڭ قانداي دا ءبىر سەبەپتەرمەن جاسى كەلسە دە سەرىگىن تابا الماي جۇرگەن كەلىستى سىنىپتاسى بولىپتى. تالاي قىزىقتى باس قوسۋلاردا الگى قىز گۇلبانۋعا مىنا تومپاقتىڭ قىزىعىن ءوزىڭ كورە بەرگەنشە ءبىزدىڭ ۇيگە دە جىبەرىپ تۇرساڭشى- دەپ قالجىڭدايتىن كورىنەدى.

جانە ول بۇل اڭگىمەسىن بىرنەشە رەت قايتالاپتى. سودان گۇلبانۋ قالجىڭنىڭ استارىندا ءبىر سىردىڭ جاتقانىن اڭداپ، ءبىر كۇنى، انا قىزدىڭ جاسى كەلىپ قالدى، سەرىگىن تابا المادى، ەڭ بولماسا بالا ءسۇيسىن، بايعۇس، ماعان بىلدىرتپەگەن بولىپ بارىپ قايتساڭشى، وبال ءتىپتى- دەپ، وسەكەڭدى ەسىنەن تاندىرا جازداپتى. ونداي «كومەككە» ەلپىلدەپ تۇراتىن وسەكەڭ اسپانديار ەمەس قوي، سالماقتى.

-ءتايت، نە دەپ وتىرسىڭ! وسى كوزگە كورىنگەنىن جەتكىزىپ الايىق - دەپتى دە قويىپتى.

قالعان ەكى دوسىمنىڭ ايەلدەرى جايلى كەلەسى جولى ايتايىن. ولاردىڭ قاتىن ەكەندەرىنە ءالى كوز جەتكىزە ءتۇسۋ قاجەت...

abai.kz

2014