ءۇش جىلدا ءۇش قازا. وتكەنى دە، بولاشاعى دا بۇلىڭعىر اۋىر اتلەتيكا

اۋىر اتلەتيكادان 2006-جىلعى جازعى ازيا ويىندارىنىڭ جەڭىمپازى ۆياچەسلاۆ ەرشوۆ ومىردەن ءوتتى. بۇل اقپاراتتى قازاقستان اۋىر اتلەتيكا فەدەراتسياسى راستادى.

وسىلايشا اينالدىرعان ءۇش جارىم جىلدا ءۇشىنشى اۋىر اتلەت ومىردەن ءوتتى، دەپ حابارلايدى El.kz اقپارات اگەنتتىگى.

ازىرگە زىلتەمىرشىنىڭ ولىمىنە نە سەبەپ بولعانى ناقتى ايتىلعان جوق. ءبىراق سپورتشىنىڭ دوستارى ونىڭ سوڭعى كۇندەرى اۋىر حالدە اۋرۋحانادا جاتقانىن مالىمدەگەن بولاتىن.

ەرشوۆ 2013-جىلى مايا مانەزامەن وتاۋ قۇرعان. ەكەۋىنىڭ ورتاق ەكى بالاسى بار.

وكىنىشكە قاراي، اينالدىرعان 3-4 جىلدا ءۇش اۋىر اتلەتىمىزدەن ايىرىلىپ قالدىق. ەستەرىڭىزدە بولسا، 2021-جىلى قىركۇيەكتە ازيانىڭ، ۋنيۆەرسيادانىڭ چەمپيونى البەرت ليندەر ءوز-وزىنە قول جۇمساعانى جايلى اقپارات سپورت الەمىن دۇرسىلكىندىرىپ ەدى. ول كەزدە سەمەن باۋىرى البەرتتىڭ ولىمىنە قازاقستان ەرلەر ۇلتتىق قۇراماسىنىڭ باس باپكەرى سەرگەي سەدوۆتى كىنالاعان. «البەرت دوپينگ سىنامادان وتە الماي قالدى» دەگەن سەدوۆتىڭ ءسوزىن دە جوققا شىعارىپ، باپكەر مۇنى ءوزىن اقتاپ الۋ جانە باۋىرى ۆلاديميردى جارىسقا اپارۋ ءۇشىن ادەيى جاسادى دەگەن. ول ماماننىڭ سپورتتاعى قىسىمدى بىلاي قويعاندا، جەكە ومىرىنە دەيىن ارالاساتىنىن ايتقان. وسى جايتتان سوڭ سەدوۆ قۇرامادان شەتتەتىلدى.

ال بىلتىر جازدا ءدال سول ۆلاديمير سەدوۆتىڭ دەنەسى قاراتال اۋدانىنىڭ دوستىق اۋىلىنداعى ۇيىنەن تابىلدى. 94 كەلى سالماقتا ونەر كورسەتكەن ۆلاديمير ءبىر كەزدەرى ەلىمىزدەگى اۋىر اتلەتيكانىڭ جۇلدىزدارىنىڭ ءبىرى بولعانى راس. وليمپيادادا ءتورتىنشى ورىنعا تابان تىرەپ، الەم جانە ازيا بىرىنشىلىكتەرىندە ۇزدىك شىققان. الايدا ۆادا 2019-جىلى سەدوۆتىڭ بەيجىڭ ويىندارىنداعى سىنامالارىن قايتا تەكسەرىپ، قان قۇرامىنان تىيىم سالىنعان پرەپاراتتى انىقتادى. تيىسىنشە 2008 بەن 2016-جىلدار ارالىعىنداعى بارلىق اتاق-ماراپاتىنان ايىرىپ، سەگىز جىلعا سپورتتان شەتتەتتى. وسىلايشا ونىڭ سپورتشى رەتىندە دە، باپكەر رەتىندە دە كارەراسىنا نۇكتە قويىلعانداي. ال بۇل ءوزىن سپورتقا ارناعان جاننان ءبارىن تارتىپ العانمەن بىردەي. شاراسىزدىق شەڭبەرىندە شىرمالعان اۋىر اتلەت ومىرمەن دە قوش ايتىسۋدى ءجون كورگەن ءتارىزدى.

ەلىمىزدەگى اۋىر اتلەتيكانىڭ باسى داۋدان شىقپايتىنىنا ەتىمىز ۇيرەنگەن. سوڭعى ون جىلدان استام ۋاقىتتا دوپينگپەن ۇستالعان تالاي ساڭلاق بارىنان ءبىر-اق كۇندە قول ءۇزىپ قالىپ جاتتى. ءبىراق مەدال، چەمپيوندىق اتاقتاردان ايىرىلۋ ادام ومىرىمەن سالىستىرعاندا تۇك ەمەس.

قازاقستاننىڭ ەڭ تانىمال اۋىر اتلەتى يليا يلين ارىپتەستەرىنىڭ قازاسىنان سوڭ بۇل سپورتتاعى ءبىراز ماسەلەسىنىڭ باسىن اشقان. يليا قيىن-قىستاۋ ۋاقىتتا سپورتشىلارعا قولداۋ كورسەتەتىن ەشكىمنىڭ بولمايتىنىنا كۇيىندى.

الەمدىك اۋىر اتلەتيكادا دا، قازاقستانداعى جاعداي دا وتە اۋىر. بىزدە كۇردەلى ماسەلەلەردى كورمەيدى. ءبىز بىرگە بولۋىمىز كەرەك. ادامدار ايلىقسىز، جۇمىسسىز وتىر. ولاردىڭ جاعدايىنا ەشكىم ءمان بەرمەيدى. قولعا الىنسا، شەشىلمەيتىن ماسەلە جوق. ءبىر جەرگە باراسىڭ، سەنى جىلى شىعارىپ سالادى.

ەشكىمگە كەرەك ەمەسسىڭ. وتباسىڭدا پروبلەمالار تۋىندايدى، سەبەبى اسىراۋىڭ كەرەك. فەدەراتسيانىڭ ءوز پروبلەمالارى بار. قولىمنان كەلگەنشە جىگىتتەردى قولداۋعا تىرىسامىن. جالعىز ءوزىم نە ىستەي الامىن؟ قازىر 30 شاقتى ادام جۇمىسسىز وتىر. ولاردى نە ىستەيمىز؟ ماسەلە وسىندا. ولار سپورتشىلاردى الىپ تاستايدى، ءارى قاراي تاعدىرى نە بولىپ جاتقانىنان ەشكىم حابارسىز، - دەدى زىلتەمىرشى.

زىلتەمىرشىلەردىڭ ءولىمىن قىسىمنىڭ كوپتىگى، تالاپتىڭ قاتالدىعى، باپكەرلەردىڭ جەكە مۇددەسىن كوزدەۋى جانە ءبىر كۇندە ەشكىمگە كەرەك بولماي قالۋ سەكىلدى سەبەپتەرمەن تۇسىندىرگىسى كەلەتىندەر بار. ءبىراق ءۇش جارىم جىلدا ءۇش سپورتشىنىڭ باقيلىققا اتتانۋى ماسەلەنىڭ الدەقايدا تەرەڭ جاتقانىن تاعى ءبىر اڭعارتقانداي. وسىلايشا بۇل قازا ەلىمىزدەگى اۋىر اتلەتيكانىڭ سۇرەڭسىز كەلبەتىن كەزەكتى رەت كورسەتىپ بەردى. وسىندايدا وتكەنى بۇلىڭعىر اۋىر اتلەتيكانىڭ بولاشاعىنا دا كۇمانمەن قارايدى ەكەنسىڭ.