ءۇش ايلىق ەگىز دە بار: شىمكەنتتە قاتىگەز ەمشى اسىراپ العان بالالار تۋرالى تىڭ دەرەك شىقتى

شىمكەنت. KAZINFORM - شىمكەنتتە اسىراپ العان بالالارىنا جاۋىزدىق تانىتىپ، ءيت پەن مىسىقتىڭ ەتىن جەگىزدى دەگەن ەمشى ىسىنە قاتىستى تاعى جاڭا دەرەك شىقتى.

بۇلدىرشىندەردىڭ ءبىرى اتالعان وتباسىعا نەبارى 1,5 ايلىعىندا قامقورلىققا بەرىلگەن.

شىمكەنتتە ەمشى كامەلەت جاسىنا تولماعان 6 بالانى 2021 جانە 2023 -جىلدارى قامقورلىعىنا العان. ولاردىڭ ەكەۋى سوت شەشىمىمەن ايەلى ەكەۋىنىڭ اسىراندى بالالارى سانالسا، قالعان تورتەۋى ءوزىنىڭ قامقورشىلىق تاربيەسىندە بولعان.

بالالاردىڭ ۇلكەنى - 2008 -جىلدىڭ ساۋىرىندە دۇنيەگە كەلگەن ۇل بالا. 2021 -جىلدىڭ 7-شىلدەسىندە شىمكەنت قالالىق ءبىلىم باسقارماسى باسشىسىنىڭ №344-بۇيرىعىمەن ەمشىگە قامقورشىلىققا بەرىلگەن. 2021 -جىلدىڭ 12-قازانىندا شىمكەنت قالاسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنىڭ شەشىمىمەن جاس ءوسپىرىمدى ەمشى مەن ونىڭ ايەلى اسىراپ العان.

2021 -جىلدىڭ 17-مامىرىندا تۋعان قىز بالا 2021 -جىلدىڭ 7-شىلدەسىندە استانا قالالىق ءبىلىم باسقارماسى باسشىسىنىڭ № 336-بۇيرىعىمەن قامقورشىلىققا بەرىلگەن. ەمشى مەن ونىڭ جۇبايى 2023 -جىلدىڭ 30-قازانىندا ءبۇلدىرشىندى سوت شەشىمىمەن اسىراپ العان.

ءۇشىنشى جانە ءتورتىنشى پەرزەنت - 2021 -جىلدىڭ 26-مامىرىندا دۇنيەگە كەلگەن ەگىز ۇل مەن قىز. ەگىزدەر 3 ايعا جەتەر-جەتپەس جاستا 2021 -جىلدىڭ 18-تامىزىندا استانا قالالىق ءبىلىم باسقارماسى باسشىسىنىڭ №436-بۇيرىعىمەن ەمشىگە قامقورشىلىققا بەرىلگەن.

2020 -جىلدىڭ جەلتوقسانىندا دۇنيەگە كەلگەن جانە 2019 -جىلدىڭ ماۋسىمىندا تۋعان ەكى ۇل بالا 2023 -جىلدىڭ 19-قىركۇيەگىندە شىمكەنت قالالىق ءبىلىم باسقارماسى باسشىسىنىڭ بۇيرىعىمەن قامقورشىلىققا بەرىلگەن.

قالالىق ءبىلىم باسقارماسى بالالاردى قامقورلىققا بەرۋ جانە اسىراپ الۋ پروتسەدۋرالارى ءبىلىم جانە عىلىم ءمينيسترىنىڭ 2020 -جىلدىڭ 24-ساۋىردەگى №158 «وتباسى جانە بالالار سالاسىنداعى مەملەكەتتىك كورسەتىلەتىن قىزمەتتەر كورسەتۋ قاعيدالارىن بەكىتۋ تۋرالى» بۇيرىعىمەن بەلگىلەنگەن تارتىپپەن جۇزەگە اسىرىلعانىن العا تارتتى.

«2021 -جىلدىڭ 7-ساۋىرىندە ءبىلىم باسقارماسىنا شىمكەنت قالاسى اباي اۋدانى كوكبۇلاق تۇرعىن الابىندا تۇراتىن ازاماتتان جەتىم جانە اتا-اناسىنىڭ قامقورلىعىنسىز قالعان كامەلەتكە تولماعان بالالاردى قامقورشىلىققا الۋ ءۇشىن كانديدات رەتىندە رەسپۋبليكالىق دەرەكتەر بانكىنە ەسەپكە قويۋ ءۇشىن ءتيىستى قۇجاتتارىمەن ءوتىنىشى كەلىپ ءتۇستى. ۇسىنعان قۇجاتتار باسقارما قىزمەتكەرلەرى تاراپىنان زەردەلەنىپ تەكسەرىلدى. ساراپتاما جۇرگىزىلىپ، وتىنىشتە كورسەتىلگەن مەكەنجاي بويىنشا تۇرعىن ءۇي-تۇرمىستىق جاعدايى تۋرالى اكت جاسالدى. جوعارىدا اتالعان راسىمدەردىڭ وڭ ناتيجەسىنە بايلانىستى ازامات جەتىم جانە اتا-اناسىنىڭ قامقورلىعىنسىز قالعان بالالاردى قورعانشىلىق جانە قامقورشىلىققا الۋ ءۇشىن كانديدات رەتىندە رەسپۋبليكالىق دەرەكتەر بانكىندە تىركەلدى»، - دەدى باسقارماداعىلار.

ۆەدومستۆو مالىمەتىنشە، بەلگىلەنگەن تارتىپكە سايكەس، قالالىق ءبىلىم ءبولىمىنىڭ قورعانشىلىق جانە قامقورشىلىق ءبولىمىنىڭ قىزمەتكەرلەرى 2021 -جىلدىڭ ءساۋىر مەن ماۋسىم ايلارىندا، 2023 -جىلدىڭ قىركۇيەگىندە ەمشىنىڭ تۇرعىن ءۇيىنىڭ تۇرمىستىق جاعدايىنا قوسىمشا تەكسەرۋ جۇرگىزگەن.

ەسكە سالساق، ءبىز بۇعان دەيىن شىمكەنتتە جەرگىلىكتى تانىمال ەمشىنىڭ 6 بالانى اسىراپ الىپ، ولارعا ءيت پەن مىسىقتىڭ ەتىن بەرگەنىن، ءۇش جىلدان بەرى ازاپتاپ كەلگەنىن جازعان بولاتىنبىز.

كەيىنىرەك ەمشى تۋرالى تىڭ دەرەك شىقتى. ەمشى ىسىنەن سوڭ ءبىلىم سالاسىنىڭ ءبىرقاتار قىزمەتكەرى جازالاندى. سونىمەن قاتار قالالىق دەنساۋلىق ساقتاۋ باسقارماسىنداعىلار بالالاردىڭ قازىرگى جاعدايى تۋرالى ايتىپ بەردى.

اۆتور
جانسايا تاۋەكەل قىزى