ءۇش اي بويى زەينەتاقىسىن الماعاندارعا تولەم ۋاقىتشا توقتاتىلادى
استانا. KAZINFORM - ەگەر زەينەتكەر جەكە شوتىنان ءۇش اي بويى تولەم الماسا، ونىڭ زەينەتاقىسى ۋاقىتشا توقتاتىلۋى مۇمكىن.
بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگى زەينەتاقىمەن جانە الەۋمەتتىك قامتاماسىز ەتۋ دەپارتامەنتىنىڭ وكىلى بايان حاسەنوۆا ايتتى.
— قازىرگى قولدانىستاعى زاڭناماعا سايكەس، ەگەر اقپاراتتىق جۇيەلەردەگى مالىمەتتەرگە ساي ادام بەلگىلى ءبىر ۋاقىتقا ەلدەن كەتسە نەمەسە قانداي دا ءبىر سەبەپتەرمەن ۇزاق ۋاقىت بويى زەينەتاقىسىن الماسا، بانككە بارىپ تولەمىن تالاپ ەتپەسە، زەينەتاقى تولەمدەرى توقتاتىلۋى مۇمكىن، — دەدى ب. حاسەنوۆا ۇكىمەتتە وتكەن بريفينگتە.
مۇندا تولەمدەردى تولىق توقتاتۋ ەمەس، تەك ءمان-جايدى انىقتاعانشا ۋاقىتشا توقتاتۋ تۋرالى ءسوز بولىپ وتىر. سەبەپتەر ناقتىلانعان بويدا زەينەتاقى تولەمى قايتا بەرىلە باستايدى.
— قازىرگى ۋاقىتتا زاڭنامادا بۇل ماسەلەگە قاتىستى باسقا ەرەجە قاراستىرىلماعان جانە قاراستىرىلىپ جاتقان جوق. زەينەتاقىنى ۋاقىتشا توقتاتۋ بويىنشا وزگە نورما جوق، — دەپ تولىقتىردى ۆەدومستۆو وكىلى.
وسىعان بايلانىستى ازاماتتارعا زەينەتاقى شوتىنان قاراجاتتى ۇنەمى شەشىپ وتىرۋ نەمەسە زەينەتاقى الۋعا اسەر ەتۋى مۇمكىن جاعدايلار تۋرالى ۋاكىلەتتى ورگاندارعا الدىن الا حابارلاۋ ۇسىنىلادى.
ايتا كەتەيىك، ەلىمىزدە زەينەتاقى دا اۆتوماتتى تۇردە تاعايىندالاتىن بولدى.
جۇمىسسىزدىق مارتەبەسى اۆتوماتتى تۇردە انىقتالىپ، پرواكتيۆتى تۇردە بوس جۇمىس ورىندارى ۇسىنىلادى.
اۆتور
ايجان سەرىكجان قىزى