ءدىني ۇستانىم - ءار ازاماتتىڭ ءوز تاڭداۋى. پرەزيدەنت مەكتەپتە حيدجاب كيۋ ماسەلەسىنە توقتالدى
وقۋشىلارعا وزىق بىلىممەن قاتار ونەگەلى تاربيە بەرۋ كەرەك. بۇل تۋرالى ق ر پرەزيدەنتى قاسىم-جومارت توقايەۆ رەسپۋبليكالىق پەداگوگتەر سەزىندەگى بايانداماسىندا ايتتى، دەپ حابارلايدى قازاقپارات اقوردانىڭ باسپا ءسوز قىزمەتىنە سىلتەمە جاساپ.
«جەتىنشى ماسەلە. وقۋشىلارعا وزىق بىلىممەن قاتار ونەگەلى تاربيە بەرۋ كەرەك.
مەملەكەتتىڭ تىرەگى - ادال ازاماتتار. ەلىمىزدە وسى قاعيداعا نەگىزدەلگەن جاڭا قوعامدىق ەتيكا ورنىعۋعا ءتيىس. قازاقتا «ۇستازى جاقسىنىڭ ۇستانىمى جاقسى» دەگەن ءسوز بار. مەكتەپ ىزگىلىك قاعيدالارىن، ادامزاتقا ورتاق قۇندىلىقتاردى بالالاردىڭ بويىنا سىڭىرەتىن ورتالىققا اينالۋى كەرەك.
جاس ۇرپاق ءادىل، ادال، ۇنەمشىل، ەڭبەكقور، ءبىلىمپاز، وتانشىل ءارى جاناشىر بولۋعا ۇمتىلۋى كەرەك. ۇلتتىڭ جاڭا ساپاسى دەگەنىمىز - وسى»، - دەدى مەملەكەت باسشىسى.
سونداي-اق، پرەزيدەنت تاربيە ىسىندە ۇلتتىق پەداگوگيكا باستاۋلارىن دا نازاردا ۇستاۋ كەرەگىن ايتتتى.
«تاربيە ىسىندە ۇلتتىق پەداگوگيكا باستاۋلارىن دا نازاردان شىعارماعان ءجون. بالالارىمىزدىڭ بويىنا قازاقتىڭ سالت-ءداستۇرى مەن قۇندىلىقتارىن ءسىڭىرۋ اسا ماڭىزدى.
حالقىمىز قاشاندا ۇلكەنگە قۇرمەت، كىشىگە ىزەت كورسەتە بىلگەن. قادىر-قاسيەت، ابىروي، پارىز سەكىلدى ۇعىمدارعا ات ءۇستى قاراماعان. ياعني، ءتول مادەنيەتىمىز دە جاستار تاربيەسىندە ماڭىزدى ءرول اتقارادى. ەڭبەكقورلىقتى دارىپتەۋ ءۇشىن بالالاردى جاستايىنان ەڭبەككە باۋلۋ قاجەت»، - دەدى قاسىم-جومارت توقايەۆ.
ودان بولەك، ءدىني ۇستانىمعا بايلانىستى مەكتەپ توڭىرەگىندە تۋىندايتىن ماسەلەنى دە تىلگە تيەك ەتتى.
«مەن قوعامدا ءجيى تالقىلاناتىن تاعى ءبىر ماسەلەگە توقتالعىم كەلەدى. قازاقستان - كونستيتۋتسيا بويىنشا زايىرلى مەملەكەت. بۇل قاعيدا بارلىق جەردە، سونىڭ ىشىندە ءبىلىم بەرۋ مەكەمەلەرىندە قاتاڭ ساقتالۋعا ءتيىس.
مەكتەپ - ەڭ الدىمەن، ءبىلىم ورداسى. بالالار مەكتەپكە ءبىلىم الۋ ءۇشىن بارادى. ال ءدىني ۇستانىم - ءار ازاماتتىڭ جەكە ماسەلەسى، ءوز تاڭداۋى. ەلىمىزدە ءدىن بوستاندىعىنا زاڭمەن كەپىلدىك بەرىلگەن. بالالارىمىز ەسەيىپ، دۇنيەتانىمى تولىق قالىپتاسقان سوڭ ءوز تاڭداۋىن جاساعانى دۇرىس دەپ سانايمىن. ەڭ باستىسى، كوزقاراسى ايقىن، ساناسى سەرگەك ءارى داستۇرگە بەرىك ۇرپاق تاربيەلەۋ كەرەك.
جالپى، زايىرلى دەگەن ءسوزدىڭ مازمۇنى تەرەڭ، وتە اۋقىمدى. حالقىمىزعا قاتىستى ايتاتىن بولساق، بۇل - سالاۋاتتى ءومىر سالتىن ۇستانۋ، پراگماتيكالىق كوزقاراستا بولۋ جانە ءداستۇرلى دىنىمىزگە، ۇلتتىق سانانى ارقاۋ ەتكەن سالتىمىزعا شىنايى قۇرمەت دەگەن ءسوز»، - دەدى مەملەكەت باسشىسى.
ءسوز سوڭىندا قاسىم-جومارت توقايەۆ ۇستازدار قاۋىمىنىڭ الدىنداعى زور مىندەتتى اتاپ ءوتتى.
«ءبىلىم بەرۋ سالاسىنىڭ الدىندا اۋقىمدى مىندەت تۇر. بۇل - ۇلتتىڭ جاڭا ساپاسىن قالىپتاستىرۋ. ءاربىر بالا مەكتەپتەن ساپالى ءبىلىم الىپ، جاقسى ادام، ادال ازامات بولىپ شىعۋى كەرەك. ءبارىمىز وسى ماڭىزدى ماقسات جولىندا تاباندى ەڭبەك ەتۋىمىز قاجەت.
ۇلى اباي «ۇستازدىق ەتكەن جالىقپاس، ۇيرەتۋدەن بالاعا» دەگەن. سىزدەر وسى قاستەرلى ميسسيانى ءاردايىم ابىرويمەن اتقاراسىزدار دەپ سەنەمىن.
مەملەكەت ۇستازداردىڭ مارتەبەسى، بەدەلى جوعارى بولۋىنا ءاردايىم باسا ءمان بەرەدى»، - دەپ ءتۇيدى ءسوزىن ق ر پرەزيدەنتى.